ހޯޑެއްދޫގައި ހިންގާ ޑްރަގްގެ ބޮޑު އޮޕަރޭޝަން އަދިވެސް ކުރިއަށްދަނީ
ގދ.ހޯޑެއްދޫގައި ހިންގާ ޑްރަގްގެ ބޮޑު އޮޕަރޭޝަން އަދިވެސް ކުރިއަށްދާކަމަށް ފުލުހުން މިއަދު ބުނެފިއެވެ.
ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ގދ.އަތޮޅުގައި ޑްރަގްގެ ބޮޑު އޮޕަރޭޝަނެއް ފެށީ މިދިޔަ ހަފުތާތެރޭގައެވެ.
މިދިޔަ ހުކުރު ދުވަހު ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ މި އޮޕަރޭޝަންގައި ހޯޑެއްދޫން ގިނަ ޢަދަދެއްގެ މަސްތުވާތަކެތި އަތުލައިގެންފައިވާ ކަމަށެވެ. ނަމަވެސް އެއީ ކިހާވަރެއްކަމެއް ހާމައެއް ނުކުރެއެވެ.
އެނގިފައިވާ ގޮތުން މިހާތަނަށް އެ ރަށުން 15 ކިލޯއެއްހައި މަސްތުވާތަކެތި ވަނީ އަތުލައިގެންފައެވެ. ފުލުހުން ހާމަކުރި ގޮތުގައި އެ ތަކެތި ފެނުނީ އެ ރަށު ވަލުތެރޭގައި ވަޅުލާފައި ހުއްޓައެވެ.
ފުލުހުން ހިންގާ މި އޮޕަރޭޝަންގެ ތެރެއިން މިހާތަނަށް ތިން މީހަކު ހައްޔަރުކޮށްފައިވާއިރު, އޭގެތެރެއިން އެކަކު ފުލުހުންގެ ބެލުމުގެ ދަށުގައި ހުއްޓާ ވަނީ ނިޔާވެފައެވެ.
