ބިލެތްފަހީ އެއާޕޯޓުގެ މަސައްކަތް ލަސްތަކެއްނުވެ ކުރިއަށްދާނެ: ރައީސް ޞާލިޙް
ށ.ބިލެތްފަހީގައި އެޅުމަށް ވަޢުދުވި އެއާޕޯޓުގެ މަސައްކަތް ލަސްތަކެއްނުވެ ކުރިއަށްދާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ އެރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއެކު ރައީސް އޮފީހުގައި އިއްޔެ ބޭއްވެވި ބައްދަލުވުމުގައި ދެއްކެވި ވާހަކަފުޅުގައެވެ.
އެ ބައްދަލުވުމުގައި ބިލެތްފަހީ ކައުންސިލުން ވަނީ އެ ރަށުގެ ލަފާފުރުމުގައި ހުރި ދަތިތައް ފާހަގަކުރައްވައި ނެރުގެ މައްސަލައާއި ރަށް ގިރުމުގެ މައްސަލައަށް ހައްލެއް ހޯއްދަވައި ދެއްވުމަށް ރައީސަށް ދަންނަވައިފައެވެ.
އަދި ދޯނި އެހެލުމުގައި ދިމާވާ ގޮންޖެހުންތައް ހައްލުކުރުމާ ގުޅޭ ގޮތުން މަޝްވަރާ ކުރެއްވިއެވެ.
އޭގެ އިތުރުން ރަށުގެ ޒުވާނުންނަށް ޚާއްސަ ޒުވާނުންގެ މަރުކަޒެއް ބޭނުންވާ ކަމަށާއި ކުޅިވަރުގެ ދާއިރާއިން ކުރިއަށް ދިއުމަށް ބޭނުންވާ ވަސީލަތްތައް އިތުރު ކޮށްދެއްވުމަށް ވެސް ކައުންސިލުން ވަނީ ރައީސަށް ދަންނަވައިފައެވެ.
ހަމައެއާއެކު ރަށުގެ މަގުތައް ޒަމާނީ ފެންވަރަށް ހެދުމަށާއި އެއާޕޯޓުގެ މަސައްކަތް އަވަހަށް ފެށުމަށް ބޭނުންވާ ކަމަށް ވެސް ދެންނެވިއެވެ. އަދި ކުނިކޮށީގެ މަސައްކަތް ނުފެށި ލަސްވަމުންދާތީ އެކަމުގައި ހުރި ކަންބޮޑުވުންތައް ވެސް ހިއްސާ ކުރެއްވިއެވެ.
އެ ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި ވަނީ ބިލެތްފަހި ކައުންސިލުން ފާހަގަކުރެއްވި ކަންކަމުގެ ތެރެއިން ބަޖެޓުގައި ހިމަނާފައިވާ ކަންކަން ކުރިއަށް ގެންދިއުމަށް މަސައްކަތް ކުރައްވާނެކަމަށް ވިދާޅުވެފައެވެ. އަދި އެއާޕޯޓުގެ މަސައްކަތް ލަސްތަކެއް ނުވެ ކުރިއަށްދާނެކަމަށް ވެސް ވިދާޅުވިއެވެ.
ބިލެތްފަހީގައި އެއާޕޯޓު އަޅަން ނިންމިކަން ޓްރާންސްޕޯޓު މިނިސްޓްރީން އިއުލާނުކުރެއްވީ 2020 ވަނަ އަހަރުއެވެ. މިނިސްޓްރީން އޭރު ވިދާޅުވެފައިވަނީ، 2021 ވަނަ އަހަރު އެއާޕޯޓު ނިންމައިލެވޭނެ ކަމަށެވެ.
Ads by STO
