ޓެކްސް ބިލަށް ލިބުނީ ހަނި އަޣްލަބިއްޔަތެއް ކަމަށް ރައީސް ނަޝީދު ވިދާޅުވުމުން، ރޮޒައިނާގެ ހޫނު ރައްދެއް
އޭރުވެސް، އަދި މިހާރުވެސް އޮތީ އެމްޑީޕީގެ ސަރުކާރެއް ކަމަށާއި، ހަމައެކަނި ތަފާތަކީ ވެރިކަމުގައި ހުންނެވި މީހާ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިހެން ވިދާޅުވީ ޓެކްސް ބޮޑު ކުރާ ބިލު ފާސްވީ ހަނި އަޣްލަބިއްޔަތަކުން ކަމަށާއި، އެފަދަ ބިލުތައް ފާސް ކުރުމަށް، ބޮޑު އަޣްލަބިއްޔަތެއް ޤާނޫނު އަސާސީން ލާޒިމް ކުރާ ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވުމާ ގުޅިގެންނެވެ.
ރައްޔިތުންގެ މަޖިލީހުގައި އިއްޔެ ނެގި ވޯޓުގައި، ޓެކްސް ބޮޑު ކުރުމާ ދެކޮޅަށް ވޯޓު ދެއްވި އެމްޑީޕީގެ 14 މެމްބަރުންގެ ތެރޭގައި، ރައީސް މުޙައްމަދު ނަޝީދުގެ ވެރިކަމުގައި އަލަށް ރާއްޖެއަށް ޖީއެސްޓީ ތައާރަފު ކުރަން ފެންނަ ކަމަށް ވޯޓު ދެއްވި މެމްބަރުން ތިއްބެވިއެވެ. މިކަން ފާހަގަކުރައްވައި، ރޮޒައިނާ ކުރެއްވި ޓްވީޓުގައި ވިދާޅުވީ ނަޝީދުގެ ވެރިކަމުގައި ޓެކްސް ނަގަން ފެންނަ ކަމަށް ވޯޓު ދެއްވީ 40 މެމްބަރުން ކަމަށާއި، ނުފެންނަ ކަމަށް ވޯޓު ދެއްވީ 30 މެމްބަރުން ކަމަށެވެ.
"އަޣްލަބިއްޔަތުގެ ވާހަކަ ރައީސް ނަޝީދު ނުދައްކަވާ، މިއަދު ފާސް ކުރަން ދިނީ 55، ނުދެނީ 26. އޭރުވެސް، މިއަދުވެސް އެމްޑީޕީ ސަރުކާރު. ތަފާތަކީ ވެރިކަމުގަ އިން މީހާ." އޭނާ ވިދާޅުވިއެވެ.
ރޮޒައިނާ ކުރެއްވި އިތުރު ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ ރައީސްގެ ގޮނޑީގައި އިންނަވައިގެން ރައްޔިތުންނަށް ދޮގު މަޢުލޫމާތު ނުދެއްވުމަށް ރައީސް ނަޝީދުގެ ކިބައިން އެދިވަޑައިގަންނަވާ ކަމަށެވެ. ޓެކްސް ބިލު ފާސްކުރަން ވަކި އަދަދަކަށް ވޯޓު ބޭނުންވާނެ ކަމަށް ޤާނޫނު އަސާސީގައި ބަޔާންކުރައްވާފައި ނެތް ކަމަށްވެސް އޭނާ ވިދާޅުވިއެވެ.
ޓެކްސް ބޮޑުކުރަން މަޖިލީހުގެ އިއްޔެގެ ޖަލްސާގައި ފާސްކުރިއިރު، އެ ބިލަށް މިދިޔަ ހޯމަ ދުވަހާއި އަންގާރަ ދުވަހު ވެސް ވޯޓަށް ނޭހުމުން ރައީސް އިބްރާހީމް މުހައްމަދު ސޯލިހަށް ތާއީދުކުރައްވާ މެންބަރުން އެކަމާ ނުރުހުންވެ ވަޑައިގެން، ރައީސްއާވެސް ބައްދަލު ކުރެއްވިއެވެ.
ޖީއެސްޓީ ބޮޑުކުރަން ހުށަހެޅުއްވީ ސަރުކާރުގެ ފަރާތުން އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ.
ސަރުކާރު ހުށަހަޅާފައިވަނީ ޓީޖީއެސްޓީ 12 އިންސައްތައިން 16 އިންސައްތައަށް ބޮޑު ކުރަން އަދި ޖީއެސްޓީ ހަ އިންސައްތައިން އަށް އިންސައްތަ އަށް ބޮޑު ކުރުމަށެވެ.
ތަފާތު ގެވާަހަކަަ ދަންނަހުށިއޭގައިރައްޔިތުންތިބީރުހ ިމިހާރުމިތިބީނުރުހ އެމްޱީޕ ހަލާެ ވެހަފުސްތުކި