މަހުގެ ދިހައަކާ ހަމައަށް ދާއިރު، ރައްޔިތުންގެ އަތުން މުސާރަ ހުސްވޭ: ސަލީމް

ރައްޔިތުންގެ ޙާލަތު މިހާރު ހުރި ގޮތުން، މަހުގެ ދިހައަކާ ހަމައަށް ދާއިރު މުސާރަ ހުސްވާ ކަމަށް ރައްޔިތުންގެ މަޖިލީހުގެ ބ.އޭދަފުށި ދާއިރާގެ މެމްބަރު އަޙުމަދު ސަލީމް(ރެޑްވޭވް ސަލީމް) ވިދާޅުވެއްޖެއެވެ.

Ads by Sosun Fihaara

ރައްޔިތުންގެ މަޖިލީހުގެ މިއަދުގެ ޖަލްސާގައި، ބަޖެޓް ކޮމިޓީން ދިރާސާކޮށް އެކުލަވައިލި ބަޖެޓް ރިޕޯޓަށް  ވާހަކަ ދައްކަވަމުން ސަލީމް ވިދާޅުވީ، އެތައް ބިލިއަން ރުފިޔާގެ ބަޖެޓެއް ހިންގުމުގެ ހަކަތައެއް ނެތް ކަމަށާއި. ތަރައްޤީ ގެންނަން ބޭނުންވިޔަސް، އެކަން ކުރަން ވާނީ އެބަޔަކަށް ވެވުނު ވަރަކުން ކަމަށެވެ. އަދި މަޝްރޫޢުތައް ހިންގަން ޖެހޭނީ ދަޢުލަތަށް އާމްދަނީ ލިބޭ މިންވަރެއްގެ މައްޗަށް ބަލައިގެން ކަމަށްވެސް ވިދާޅުވިއެވެ.

"އެހެން ނޫންނަމަ، ނުލިބޭ އެއްޗަކުން، އަޅުގަނޑުމެން އަދި ކިތަންމެ ބޭނުންވިޔަސް، ދުނިޔޭގެ ތަރައްގީވެފައި ހުރި ބޮޑެތި ގައުމުތަކުގައިވެސް، އެއްވެސް ގައުމެއް ތަރައްޤީ ވެގެން ހުއްޓާލި ޤައުމެއް ނެތް. ހަަމަ އަބަދުވެސް ތަރައްޤީ ގެންނަމުން ދަނީ. އެއީ ނިމުމެއް އޮތް ކަމެއް ނޫން."

ސަލީމް އިތުރަށް ވިދާޅުވީ ދަޢުލަތުގެ ދަރަނި އިންތިހާއަށް އިތުރު ވެގެން ދިޔުމަކީ މުޅި ރާއްޖެއަށްވެސް އޭގެ އަސަރު ކުރާނެ ކަމެއް ކަމަށެވެ. ޖީއެސްޓީ ބޮޑު ކުރީމަ، އޭގެ އަސަރު ކުރާނީ ރައްޔިތުންނަށްކަން ފާހަގަކުރައްވައި، ޖީއެސްޓީ ބޮޑު ކުރި ކުރުމަށްވެސް އޭނާ ފާޑުވިދާޅުވިއެވެ. އޭނާ ވިދާޅުވީ ޖީއެސްޓީީ ބޮޑު ކުރަން ޖެހޭ ހިސާބަށް ޤައުމުގެ ޙާލަތު އަދި ނުދާ ކަމަށެވެ.

"މަހުގެ ފުރަތަމަ ދުވަހުން ދިހައަކަށް ދާއިރު ރަައްޔިތުންގެ އަތުން މުސާރަ ހުސްވޭ. ވިޔަފާރިތައް އެ ހުއްޓުނީ ގާތްގަނޑަކަށް. މީގެ ކުރީގަ 20އަށް ނުވަތަ 25އަށް ދަތުރު ކުރޭ." ސަލީމް ވިދާޅުވިއެވެ.