ބަނގުރާ ކައްކަން ތިއްބާ ހައްޔަރުކުރި ދެ މީހުން ދޫކޮށްލައި ޤައުމަށް ފޮނުވައިލައިފި
މާލޭ ގެއެއްގައި ބަނގުރާ ކައްކަން ތިއްބާ ހައްޔަރުކުރި އިންޑިއާ ދެ މީހުން ބަންދުން ދޫކޮށްލައި ޤައުމަށް ފޮނުވައިލައިފިއެވެ.
ހެންވޭރުގައި ރޯޝަނީ މަގުގައި ހުރި ގެއަކުން ދުން އަރާތީ ޢާންމުން ކަމާބެހޭ ފަރާތްތަކަށް ރިޕޯޓުކުރީ މިދިޔަ އޮކްޓޫބަރުމަހުގެ 14 ވަނަ ދުވަހު ހެނދުނު 6:12 ގައެވެ.
ފުލުހުން އޭރު މީޑިއާތަކަށް ފޮނުވި މެސެޖުގައި ވިދާޅުވެފައިވަނީ ސިފައިންނާއެކު އެ ގެއެއަށް ގޮސް ދޮރުގައި ތެޅުމުން ދޮރު ނުހުޅުވި ކަމަށާއި, އެހެންވެ އެ ގެއަށް ވަންނަން ޖެހުނީ ބާރުގެ ބޭނުންކޮށްގެން ކަމަށެވެ. އެ ގެއިން ދުން އަރަމުންދިޔައީ ބަނގުރާ ކައްކަމުން ދާތީކަން އެނގިފައިވާ ކަމަށާއި, ބަނގުރާ ކައްކަން ބޭނުންވާ ގިނަ ސާމާނު އެ ގެއިން ފެނިފައިވާކަމަށް ވެސް ފުލުހުން ވިދާޅުވެފައިވެއެވެ.
މި މައްސަލައިގައި ހައްޔަރުކުރީ އިންޑިއާގެ ރައްޔިތެއްކަމަށްވާ ސެލްވަމް ޕަވަރޑައި (34 އ) އާއި ސުންޑްރަމުރްތީ ކެސަވަން (34 އ) އެވެ.
އެ ދެ މީހުންގެ ބަންދާމެދު ގޮތެއް ނިންމަން ކްރިމިނަލް ކޯޓަަށް ހާޒިރުކުރުމުން ގާޒީ ޙަސަން ސަޢީދު ޢަމުރު ކުރެއްވީ އެއިން ކޮންމެ މީހަކު ވެސް 30 ދުވަހަށް ބަންދުގައި ބެހެއްޓުމަށެވެ.
އެ ދެ މީހުން މިހާރު ވަނީ ބަންދުން ދޫކޮށްލައިފައެވެ. ބަންދުން ދޫކޮށްލީ ކޯޓަށް ހާޒިރު ނުކޮށެވެ.
ފުލުހުންގެ އޮފިޝަލަކު މިއަދު ''ދެން'' އަށް ވިދާޅުވީ ސުންޑްރަމުރްތީ ކެސަވަންއަށް ރާއްޖެއަށް ނާދެވޭ ގޮތަށް ޑީޕޯޓް ކުރުމަށް މި މަހުގެ 13 ވަނަ ދުވަހު އިމިގުރޭޝަނާއި ހަވާލު ކުރެވިފައިވާ ކަމަށެވެ. އަދި ރާއްޖެއަށް ނާދެވޭ ގޮތަށް ހަމަ އެ ދުވަހު ސްޕޮންސަރ މެދުވެރިކޮށް ސެލްވަމް ޕަވަރޑައި ޤައުމަށް ފޮނުވައިލައިފައިވާ ކަމަށެވެ.
