ކެމިކަލް ހަތިޔާރު މަނާކުރުމުގެ ބިލު ތަސްދީޤު ކުރައްވައިފި
ރައީސް އިބްރާހިމް މުޙައްމަދު ޞާލިޙު ކެމިކަލް ހަތިޔާރު މަނާކުރުމުގެ ބިލު، ރައީސް އިބްރާހީމް މުޙައްމަދު ޞާލިޙު ތަސްދީޤު ކުރައްވައިފިއެވެ.
މި ބިލަކީ ދިވެހިރާއްޖޭގައި ކެމިކަލް ހަތިޔާރު ތައްޔާރުކުރުމާއި، އުފެއްދުމާއި، ރައްކާކުރުމާއި، ބޭނުންކުރުން މަނާކުރުމާއި އެތަކެތި ނައްތާލުމުގައި އަމަލުކުރަންޖެހޭ ގޮތްތަކާއި އުސޫލުތައް ކަނޑައަޅައި ބަޔާންކުރުމުގެ ބިލެކެވެ.
މި ފަދަ ޤާނޫނެއް އެކުލަވައިލެއްވިއިރު، މިދިޔަ ނޮވެމްބަރުމަހުގައި މ.ނިރުފެހި ގޭގައި ހިނގައިދިޔަ ވަރަށް ނުރައްކާތެރި އަލިފާނުގެ ހާދިސާއެއްގައި 10 މީހަކު ވަނީ ނިޔާވެފައެވެ. މި ހާދިސާ ހިނގީ، އެ ގޭގެ ގަރާޖެއްގައި ރޯވެގެންނެވެ. ހުއްދަ ނުހޯދައި ހިންގަމުން ދިޔަ އެ ގަރާޖުގައި ގޮވާ ޒާތުގެ އެއްޗެހިވެސް ހުއްޓެވެ.
މިއަދު ބިލު ތަސްދީޤު ކުރެއްވިއިރު، ޤާނޫނު ތަންފީޒުކުރުމުގެ އެންމެހައި ކަންކަން ކުރުމަށްޓަކައި، ޚާއްޞަ ޔުނިޓެއް "ކެމިކަލް ވެޕަންސް ޔުނިޓް" ގެ ނަމުގައި އުފެދޭނެ ކަމަށް ބަޔާންކުރައްވައިފައެވެ.
މި ޤާނޫނުގެ ޖަދުވަލުތަކުގައި ބަޔާންކޮށްފައިވާ ކެމިކަލެއް ރާއްޖެއަށް އިމްޕޯޓްކުރުމާއި އެކްސްޕޯޓްކުރެވޭނީ ޤާނޫނުގެ ދަށުން ހަދާ ޤަވާއިދުގެ ދަށުން ކެމިކަލް ވެޕަންސް ޔުނިޓުން ދޫކުރާ ލައިސަންސް ހޯދައި އެ ލައިސަންސްގައި ބަޔާންކުރާ ޝަރުތުތަކާ އެއްގޮތްވާ ގޮތުގެމަތިން ކަމަށް ވެސް ބަޔާންކޮށްފައިވެއެވެ.
މި ޤާނޫނުގެ ޖަދުވަލު އެކެއް ގައި ހިމެނޭ ކެމިކަލްއާ ގުޅޭ ކުށެއް ކޮށްފިނަމަ 500،000 ރުފިޔާއިން ފެށިގެން އެއް މިލިއަން ރުފިޔާއާ ދެމެދުގެ އަދަދަކުން ޖުރިމަނާކުރުން ނުވަތަ 5 އަހަރުދުވަހާއި 20 އަހަރު ދުވަހާއި ދެމެދުގެ މުއްދަތަށް ޖަލަށް ލުމަށް ހުކުމް ކުރެވިދާނެއެވެ.
މި ޤާނޫޏުގެ ޖަދުވަލު 2 ގައި ހިމެނޭ ކެމިކަލްއާ ގުޅޭ ކުށެއް ކޮށްފިނަމަ 100،000 ރުފިޔާއިން ފެށިގެން 500،000 ރުފިޔާއާ ދެމެދުގެ އަދަދަކުން ޖުރިމަނާކުރުން ނުވަތަ ދެ އަހަރު ދުވަހާއި 10 އަހަރު ދުވަހާ ދެމެދުގެ މުއްދަތަކަށް ޖަލަށް ލުމަށް ހުކުމް ކުރެވިދާނެއެވެ.
އަދި ޖަދުވަލު 3 ގައި ހިމެނޭ ކެމިކަލްއާ ގުޅޭ ކުށެއް ކޮށްފިނަމަ 100،000 ރުފިޔާއިން ފެށިގެން 250،000 ރުފިޔާއާ ދެމެދުގެ އަަދަދަކުން ޖުރިމަނާކުރުންނުވަތަ 2 އަހަރަށްވުރެއް ދިގު ނޫން މުއްދަތަކަށް ޖަލަށް ލުމަށް ހުކުމް ކުރެވިދާނެއެވެ.
މީގެއިތުރުންވެސް މިޤާނޫނުގައި ބަޔާންކޮށްފައިވާ އިތުރު ކުށްތަކަށް ބޮޑެތި އަަދަބުތައް ކަނޑައަޅާފައިވެއެވެ.
