އިޤްތިޞާދީ ނިންމެވުންތައް ނިންމަވަނީ ސިޔާސީ މަންފާއަކަށް ނޫން: އަމީރު
ކޮވިޑް-19އާއެކު ރާއްޖޭގެ އިޤްތިޞާދު ވެއްޓިފައިވާ އޮތް ހާލުން، އަރައިގަތުމަށް ރައީސް އިބްރާހީމް މުޙައްމަދު ޞާލިޙް ނިންމެވުންތަކެއް ނިންމެވި ކަމަށާއި އެއީ ސިޔާސީ މަންފާއަކަށް ނިންމެވި ނިންމެވުންތަކެއް ނޫން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިއަހަރު ފެށުމާއެކު މުދަލާއި ޚިދުމަތުގެ އަގުން ނަގާ ޓެކްސް ވަނީ 6 އިންސައްތަ އިން 8 އިންސައްތައަށް އަދި ފަތުރުވެރިކަމުގެ މުދަލާއި ޚިދުމަތުން ނަގާ ޓެކްސް 12 އިންސައްތައިން 16 އިންސައްތައަށް ބޮޑުކޮށްފައެވެ. އެއާއެކު ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފައެވެ.
ޖީއެސްޓީ ބޮޑުކުރުން ދިފާއު ކުރައްވާ މިއަދު އަމީރު ކުރެއްވި ޓްވީޓެއްގައި ވިދާޅުވީ، އިގްތިސާދީ ދަތި ދަނޑިވަޅުން އަރައިގަތުމަށް ކޮންމެހެން ނިންމަންޖެހޭ ނިންމުންތައް ރައީސް ނިންމަވަނީ އޭގެއިން ސިޔާސީ މަންފާއެއް ހޯއްދަވާކަށް ނޫން ކަމަށެވެ. އަދި ޖީއެސްޓީ ބޮޑު ކުރީ ވެސް އެފަދަ ފައިދާއެއް ހޯދުމަށް ނޫން ކަމަށް ވިދާޅުވިއެވެ.
އަވައްޓެރި ލަންކާއަށް އިޝާރާތް ކުރައްވަމުން އަމީރު ވިދާޅުވީ، ސިޔާސީ ބާރުވެރިކަން ހޯދަން ކުރާ މަސައްކަތުގެ ތެރޭގައި އިގްތިސާދީ ސިޔާސަތުތައް "ކޮމްޕްރޮމައިޒް" ވުމުން އޭގެ ގެއްލުން ބޮޑުކަން ކައިރި ގައުމުތަކުން ފެންނަމުންދާ ކަމަށެވެ.
"އޭގެ ބޮޑު ގެއްލުމާއި ދެރަ އުފުލަންޖެހެނީ ވަރަށް ހިތިކޮށްކަން." އަމީރުގެ ޓްވީޓްގައި ވިދާޅުވިއެވެ.
މީގެއިތުރުން ދިވެހި އިގުތިސާދު މިވަނީ ކޮވިޑްގެ ބަލިމަޑުކަމުގެ ކުރިން އޮތް ހިސާބަށް އަނބުރާ ރުޖޫއަވެފައިކަމަށް މިނިސްޓަރު ވިދާޅުވިއެވެ. 2022 ވަނައަހަރަށް އަމާޒު ހިފި 1.6 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާކަން ފާހަގަކުރައްވާ މިނިސްޓަރު ވިދާޅުވީ މިފެށުނު 2023 ވަނަ އަހަރު 1.8 މިލިއަން ފަތުރުވެރިން ރާއްޖެ ޒިޔާރަތްކުރާނެކަމަށް ލަފާކުރެވޭކަމަށެވެ.
ޖީއެސްޓީ ބޮޑުކުރުން އަމީރު ދިފާއު ކުރައްވާފައިވާއިރު، ސަރުކާރު ކޯލިޝަންގެ މައި ޕާޓީ، އެމްޑީޕީގެ ރައީސް މުހައްމަދު ނަޝީދު ވެސް ގެންދަވަނީ ޖީއެސްޓީ ބޮޑުކުރުމާ ދެކޮޅަށް އަޑު އުފުލަވަމުންނެވެ. އަދި އެމަނިކުފާނުގެ ވެރިކަމެއްގައި ޖީއެސްޓީ ކުޑަ ކުރާނެ ކަމަށްވަނީ ވައުދުވެ ވަޑައިގެންފައެވެ.
