ޤާނޫނީ ފިޔަވަޅު އެޅިޔަސް، އިޙްތިރާމް ދޭންވާނެ: ޒައިދު

ރައީސް ޔާމީން އަބްދުލްގައްޔޫމް މިނިވަން ކުރަން ގޮވާލާ އިދިކޮޅު ދެ ޕާޓީގެ ސަޕޯޓަރުން ރޭ ކުރިއަށް ގެންދިޔަ އިހުތިޖާޖުގެ ތެރެއިން ދޮށީ އުމުރުގެ އަންހެނަކު އަނިޔާވެރި ގޮތަކަށް ހައްޔަރުކުރިކަމަށް ބުނެ ޝޯޝަލް މީޑިއާގައި ފުލުހުންނަށް ފާޑުކިޔުން އަމާޒުވެފައިވާ މިދަނޑިވަޅުގައި އެއަންހެން މީހާއަށް ގާނޫނީ ފިޔަވަޅެއް އެޅި ނަމަވެސް އިހްތިރާމް ކުރަންވާނެކަމަށް ޝެއިޚް އަލީ ޒައިދު ވިދާޅުވެއްޖެއެވެ.

Ads by STELCO

ޝެއިޚް ޒައިދު ވިދާޅުވީ މުޒާހަރާ ތެރެއިން ދޮށީ އުމުރުގެ އަންހެނަކު އިހްތިރާމް ކުޑަކޮށް ހައްޔަރު ކުރުން ރަނގަޅު ނޫން ކަމަށެވެ.

"މުޒާހަރާގެ ތެރެއިން މުސްކުޅި އަންހެނަކު، އިޙްތިރާމް ކުޑަކޮށް ހައްޔަރުކުރެވޭ ވީޑިޔޯއެއް އަޅުގަނޑުވެސް ދެކެފިން. އެގޮތަށް އެކަން ދިޔުން ރަނގަޅެއް ނޫން. މައްސަލައެއްގައި ގާނޫނީ ފިޔަވަޅެއް އަޅާނަމަވެސް ދޮށީ މީހުންނަށް ދޮށީވަންތަކަމުގެ އިޙްތިރާމް ދޭންވާނެ! އެގޮތް ތަޤްވާވެރިކަމާ ގާތް!" ޝެއިހް އަލީ ޒައިދު ވިދާޅުވިއެވެ.

ރޭ އިދިކޮޅު ކުރި އިޙްތިޖާޖުގެ ތެރެއިން ފުލުހުންގެ ބަޔަކު ދުވެ ގޮސް ހައްޔަރު ކޮށްފައި ވަނީ 65 އަހަރުން މަތީގެ އަންހެނެކެވެ. އަދި މައްސަލަ ބަލާނެކަމަށް ކޮމިޝަނާ އޮފް ޕޮލިސް މުހައްމަދު ހަމީދުވަނީ ވިދާޅުވެފައެވެ.