ޓޮމް ތަކުރާރުކޮށް ވިދާޅުވަނީ، ރައީސް ޔާމީނަށް އިންތިޚާބުގައި ވާދަކުރެއްވުމަށް، ހުރަހެއް ނެތް ކަމަށް
ސުޕްރީމް ކޯޓުގެ ޙުކުމް ދެމި އޮތްހާ ހިނދަކު ރައީސް ޔާމީނަށް ކުރިއަށް އޮތް ރިޔާސީ އިންތިޙާބުގެ ފުރުސަތު ނުގެއްލޭނެ ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަޙްމަދު ޠާރިގު (ޓޮމް) ވިދާޅުވެއްޖެއެވެ.
ޓޮމް ވިދާޅުވީ ޤާނޫނު އަސާސީގައި ޖިނާޢީ ހުކުމެއް ތަންފީޒުކުރަމުންދާ މީހަކުކަމުގައި ނުވުން، ކަމުގައި ބުނާ ޙުކުމަކީ، ސްޕްރީމް ކޯޓްގެ ނިހާއީ ޙުކުމް ކަމަށް އެ ވަނީ ކުރިން މާނަ ކޮށްފައިކަމަށެވެ.
"ޤާނޫނުއަސާސީގައި ޖިނާޢީ ޙުކުމެއް ތަންފީޒުކުރަމުންދާ މީހަކު ކަމުގައި ނުވުން، ކަމުގައި ބުނާ ޖިނާޢީ ހުކުމަކީ ސްޕްރީމް ކޯޓްގެ ނިހާއީ ޙުކުމް ކަމަށް އެ ވަނީ ކުރިން މާނަކޮށްފައެވެ. ސކ(ސުޕްރީމް ކޯޓު) ގެ 2011 ގެ ޙުކުމް ދެމިއޮތްހާ ހިނދަކު ރައީސް ޔާމިންގެ ޝަރުތު ނުގެއްލެއެވެ." ޓޮމްކުރެއްވި ޓްވީޓެއްގައި ވިދާޅުވިއެވެ.
މީގެ އިތުރުންވެސް މިކަމާއި ގުޅުވައިގެން މިދިޔަ ޑިސެމްބަރުމަހު ޓޮމް ނެރުއްވި ބަޔާނެއްގައި ވިދާޅުވީ ބާރަ މަސް ދުވަހަށް ވުރެ ބޮޑު ޙުކުމެއް އެމަނިކުފާނަށް އަތުވެއްޖެ ޙާލަތެއްގައި، ކްރިމިނަލް ކޯޓުގެ ޙުކުމް ދަމަހައްޓައި، ސްޕްރީމް ކޯޓުން ނިހާއީ ޙުކުމެއް ކުރެއްވުމާ ހަމައަށް، ރައީސް ޔާމީނަށް ރިޔާސީ އިންތިޚާބުގައި ވާދަކުރެއްވުމުގެ ފުރުސަތު އޮންނާނެ ކަމަށެވެ.
ޤާނޫނުއަސާސީގެ 113 ވަނަ މާއްދާގައިވާ ގޮތުން ރިޔާސީ ކެންޑިޑޭޓެއްގެ ޝަރުތާ މެދު ޚިލާފު އުފެދިއްޖެ ނަމަ، ގޮތް ނިންމުމުގެ ބާރު ވެސް އޮތީ ހަމައެކަނި ސްޕްރީމް ކޯޓަށްކަމަށް އޭނާ ވިދާޅުވެފައިވެއެވެ.
ކާށިދޫ ދާއިރާގެ ކުރީގެ މެންބަރު އިސްމާއިލް އަބްދުލްހަމީދު ދޮޅު އަހަރަށް ޖަލަށް ލާން ކުރި ހުކުމާ ގުޅިގެން މެންބަރުކަމާ މެދު ސުވާލު އުފެދި ސުޕްރީމް ކޯޓުން ނިންމި ގޮތައް ރިޢާޔަތް ކުރައްވައި، ޓޮމް ވިދާޅުވީ މެންބަރެއްގެ ޝަރުތާ މެދު ޚިލާފު އުފެދިއްޖެ ނަމަ ނުވަތަ މެންބަރެއްގެ ގޮނޑި ގެއްލުމާ މެދު ސުވާލު އުފެދިއްޖެ ނަމަ ފަހު ބަސް ބުނާނީ ސުޕްރީމް ކޯޓުން ކަމަށް ޤާނޫނުއަސާސީގައި އޮންނަކަމަށާއި އަދި އިސްތިއުނާފް ކުރުމުގެ ހައްޤު ވެސް ޤާނޫނުއަސާސީގައި ކޮންމެ މީހަކަށް ވެސް ލިބިދީފައި އެބަ އޮތް ކަމަށެވެ.
މި ކަންކަމަށް ރިޢާޔަތްކުރުމާ އެކު 2011 ވަނަ އަހަރު ކުރި އެ ހުކުމުގެ ހުލާސާ އަކީ ސުޕްރީމް ކޯޓުން މައްސަލައެއްގައި ނިހާއީ ޙުކުމެއް ކުރުމާ ހަމަޔަށް، މެންބަރެއްގެ ޝަރުތާ މެދު ސުވާލެއް ނެތުންކަމަށައި ޝަރުތު އުނިވާނީ އެ ޙުކުމަކަށް ސުޕްރީމް ކޯޓުން ތާއީދުކުރުމުން ކަމަށް ޓޮމްވަނީ ތަކުރާރުކޮށް ވިދާޅުވެފައެވެ.
