މަޖިލީހުގެ "ކޮންޓްރޯލް" ރައީސް ޞާލިޙް ނެންގެވިއޭ ވިދާޅުވުމުން ލަދުގަތް: ރައީސް ނަޝީދު

ރާއްޖޭގެ ރައްޔިތުންގެ މަޖިލީހުގެ "ކޮންޓްރޯލް" ނެންގެވި ކަމަށް ވެރިކަމުގައި ހުންނެވި ރައީސް އިބްރާހީމް މުޙައްމަދު ޞާލިޙް ވިދާޅުވުމުން ލަދުގަތް ކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by Sosun Fihaara

ތ. ތިމަރަފުށީގައި މިއަދު ބޭއްވި ޖަލްސާއެއްގައި ދެއްކެވި ވާހަކަފުޅުގައި ރައީސް ނަޝީދު ވިދާޅުވީ، މަޖިލީހުގެ ކޮންޓްރޯލް ރައީސް ޞާލިޙް ނެންގެވީ، މަޖިލީހުގެ މެންބަރުންގެ ކުންފުނިތަކަށް ސަރުކާރުގެ ޕްރޮޖެކްޓްތައް އެވޯޑްކޮށްގެން ކަމަށެވެ.

"އަޅުގަނޑު ލަދުގަތް، ރައީސް ޞާލިޙް ވިދާޅުވި މަޖިލީހުގެ މެޖޯރިޓީ ކޮންޓްރޯލް އެމަނިކުފާނު ނަންގަވައިފއޭ. އަޅުގަނޑު ދެން އެ ދުވަހު ހިސާބު ޖަހާލިން އެއީ ކިތައް ކޮންޓްރެކްޓް ބާއޭ. ކޮންޓްރޯލް ނަންގަވަން ކިތައް މެންބަރުންނަށް ކިތައް ކޮންޓްރެކްޓް ދެއްވި ބާއޭ." ރައީސް ނަޝީދު ވިދާޅުވިއެވެ.

ރައީސް ނަޝީދުގެ ވާހަކަފުޅުގައި އިތުރަށް ވިދާޅުވީ، މެންބަރުންގެ ކުންފުނިތަކަށް މިގޮތަށް ކޮންޓްރެކްޓްތައް ދިނުމުން ކޮންޓްރެކްޓްތައް ސަބް ކޮންޓްރެކްޓް ކުރާ ކަމަށެވެ. އަދި އެކަން ހަވާލު ކުރަނީ އެކަށީގެން ނުވާ ކުންފުނިތަކަށް ކަމަށާއި، އެހެންކަމުން މަޝްރޫއުތައް ނުހިނގާ ކަމަށް ވިދާޅުވިއެވެ.

ރައީސް ނަޝީދު އިތުރަށް ވިދާޅުވީ، އެގޮތަށް ހަވާލު ކުރާ ކުންފުނިތަކުން މަސައްކަތް ހުއްޓުނީމަ، މަސައްކަތް ބާތިލް ނުކުރެވޭ ކަމަށެވެ. އެއީ މެންބަރު ކޮންޓްރޯލް އޮންނާތީ ކަމަށް ވިދާޅުވިއެވެ.

"އެކަށީގެން ނުވާ ކުންފުނިތަކަށް ކޮންޓްރެކްޓް ދެނީ ކޮންޓްރޯލް ހޯދަން" ރައީސް ނަޝީދު ވިދާޅުވިއެވެ.

އޭގެ އިތުރުން ޒުވާނުންނަށް ސަރުކާރުގެ ކުންފުނިތަކުން ވަޒީފާދޭ ދިނުމާއި ގުޅޭގޮތުން ވެސް ރައީސް ނަޝީދު ވާހަކަފުޅު ދެއްކެވިއެވެ. މިގޮތުން ވިދާޅުވީ، އެކަން ކުރަނީ ކޮންޓްރޯލް ހޯދަން ކަމަށެވެ.

"ހިފެހެއްޓު އޮބަހެއްޓުން، މިއީ އަޅުގަނޑުމެން ޤަބޫލު ކުރާ އުސޫލެއް ނޫން. އެމްޑީޕީގެ އަމާޒަކީ ރައްޔިތުން ދޫކޮށްލުން. ނުހފެއްޓުން، މިނިވަންވުން، ފިތުރަތުގެ ގޮތަކީ ވެސް އެއީ" ރައީސް ނަޝީދު ވިދާޅުވީ، ތަރައްޤީ އަކީ މިނިވަން މީހާ ހޯދާއެއްޗެއް ކަމަށެވެ. އަދި އެއީ އަމިއްލަ ހާލަތު ބަދަލު ކުރަން ކުރާ ކަމެއްގެ ނަތީޖާ ކަމަށް ވިދާޅުވިއެވެ.