ރިޔާސީ ބަޔާން އިއްވާތީ އިދިކޮޅުން މުޒާހަރާ ކުރަނީ، 8 މީހަކު ހައްޔަރުކޮށްފި
2023 ވަނަ އަހަރަށް ރައްޔިތުންގެ މަޖިލީހުގެ ޖަލްސާތައް ފެށުމުގެ ގޮތުން ރިޔާސީ ބަޔާން އިއްވުމަށް ބާއްވާ ހަފްލާ ކުރިއަށް ދަނިކޮށް އިދިކޮޅު ޕީޕީއެމްއިން މަޖިލިސް އިދާރާ ކުރިމަތީގައި މުޒާހަރާ ކުރަން ފަށައިފިއެވެ.
މުޒާހަރާގެ ބައިވެރިން މަޖިލިސް އިދާރާ ކުރިމައްޗަށް އެއްވި ނަމަވެސް ސަލާމަތީ ބާރުތަކުން ވަނީ އެމީހުން ދުރަށް ޖައްސައި ސޯސަން މަގުގައި ހުންނަ އެމްޑީޕީ އޮފީހާއި ހިސާބަށް ގެންގޮސްފައެވެ. އަދި އެހާ ހިސާބަށްވުރެއް މަޖިލިސް އިދާރާއާއި ކައިރި ނުވެވޭނެހެން ސަލާމަތީ ބާރުތަކުން ވަނީ ބެރިކޭޑް ޖަހައިފަ އެވެ.
މައުލޫމާތު ލިބޭ ގޮތުގައި މުޒާހަރާގެ ތެރެއިން 8 މީހަކު ވަނީ ހައްޔަރުކޮށްފަ އެވެ. މުޒާހަރާގެ އެއް ބައިވެރިޔަކު މަގުމައްޗަށް ވެއްޓިފައި އޮތް މަންޒަރުވެސް ފެނުނެވެ. އެހެންނަމަވެސް އޭނާއަށް ލިބުނު އަނިޔާގެ ތަފްސީލެއް އަދި ނުލިބެއެވެ.
އިދިކޮޅުން ވަނީ މިއަދު ރައީސް އިބްރާޙިމް މުހައްމަދު ޞާލިހު ރިޔާސީ ބަޔާން އިއްވާއިރު މުޒާހަރާ ކުރާނެކަން އިއްޔެ އިއުލާން ކޮށްފައެވެ. މުޒާހަރާގެ ބައިވެރިން ގޮވައިލަމުން ދިޔައީ އިދިކޮޅު ލީޑަރު ރައީސް އަބްދުﷲ ޔާމީން މިނިވަން ކުރުމަށެވެ.
މަޖިލިސް އިދާރާ ތެރޭގައި އިދިކޮޅަށް ނިސްބަތްވާ މަޖިލިސް މެމްބަރުންވެސް ވަނީ އަޑު ގަދަކޮށްފަ އެވެ. އެ މެމްބަރުން މަޖިލިސް ތަޅުމުން ބޭރު ކުރުމަށް ޖަލްސާ މެދުކަނޑައިލުމަށްފަހު އަލުން ފެށީ ވަގުތުތަކެއް ފަހުންނެވެ.
އިދިކޮޅު މެމްބަރުންގެ ނަން އިއްވައި މަޖިލިސް ތަޅުމުން ނެރުނީ ހަތަރެސް ފައިގައި ހިފައިގެން ސިފައިންނެވެ. ބައެއް މެމްބަރުން ނެރުނުއިރު ލައިގެން ހުންނެވި ސޫޓު ވަނީ އިރައިގެން ގޮސްފައެވެ.
މިއަދުގެ ޖަލްސާ ފެށިއިރު މަޖިލިސް ތަޅުމުގައި ރިޔާސީ މޭޒުކޮޅުގެ ކުރިމަތީގައި ހުރީ ގިނަ އަދަދެއްގެ ގަސް ވެސް ބަހައްޓައިފަ އެވެ. ބެލެވޭ ގޮތުގައި އެ ގަސްތައް ބަހައްޓާފައި ވަނީ ރިޔާސީ މޭޒުކޮޅާއި އިދިކޮޅު މެމްބަރުންނަށް ކައިރި ނުވެވޭނެ ގޮތް ހެދުމަށެވެ. މީގެ ކުރިން މިގަސްތައް ނުބަހައްޓައެވެ.
