ރައީސް ޞާލިޙަށް ރަސްމީކޮށް ރިޔާސީ ޓިކެޓު އެރުވުން، މިރޭ

އެމްޑީޕީގެ ރިޔާސީ ޓިކެޓް ރައީސް އިބްރާހީމް މުޙައްމަދު ޞާލިޙަށް ރަސްމީކޮށް އެރުވުމުގެ ޖަލްސާ މިރޭ ބާއްވާނެއެވެ.
މި ޖަލްސާ އޮންނާނީ މިރޭ 8:30 ގައި ކާނިވާ ސަރަހައްދުގައެވެ.
މިދިޔަ މަހުގެ 28 ގައި ބޭއްވި އެމްޑީޕީގެ ޕްރައިމަރީގައި އެ ޕާޓީގެ ރައީސް އަދި ކުރީގެ ރައީސް މުޙައްމަދު ނަޝީދާ ވާދަކުރައްވައި ބޮޑު ތަފާތަކުން ރައީސް ޞާލިޙު ވަނީ އެ އިންތިޚާބު ކާމިޔާބު ކުރައްވައިފައެވެ.
ޕްރައިމަރީގެ ދާއިމީ ނަތީޖާތައް ދައްކާ ގޮތުން ރައީސް ނަޝީދަށް ލިބިވަޑައިގަތީ 15،641 ވޯޓެވެ. އެއީ ވޯޓުލީ މީހުންގެ 38.90 އިންސައްތައެވެ. ރައީސަށް ލިބިވަޑައިގަަތީ 24،566 ވޯޓެވެ. އެއީ ވޯޓުލީ މީހުންގެ 61.10 އިންސައްތައެވެ.
ރައީސް ޞާލިޙަށް ރަސްމީކޮށް ރިޔާސީ ޓިކެޓު އަރުވަން ތައްޔާރުވަމުން އަންނައިރު، ރައީސް ނަޝީދަށް ތާއީުދ ކުރާ ފަރާތްތަކުން ވަނީ އެމްޑީޕީގެ ޕްރައިމަރީ އަލުން ބޭއްވުމުގެ އަމުރަކަށް ސިވިލް ކޯޓުގައި އެދިފައެވެ.
މި މައްސަލަ ސިވިލް ކޯޓަށް ހުށަހެޅުއްވީ، ހެންވޭރު ދެކުނު ދާއިރާގެ ކުރީގެ މެމްބަރު އަދި މިހާރުގެ ޕޮލިސް ބޯޑުގައި އިންނަވާ ހާމިދު އަބްދުލްޣަފޫރެވެ. އޭނާގެ ވަކީލެއްގެ ގޮތުގައި ހަމަޖައްސާފައި ވަނީ ރައީސް ނަޝީދުގެ ސަރުކާރުގައި ބަންޑާރަ ނައިބުކަން ކުރެއްވި ފާތިމަތު ދިޔާނާ ސައީދުވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.