އިންޑިއާ އެމްބަސީގައި ހުޅުޖަހަން ގޮވައިލި މައްސަލައިގައި އައްބާސްގެ މައްޗަށް ދައުވާ އުފުލައިފި
ރާއްޖޭގައި ހުންނަ އިންޑިއާގެ ހައި ކޮމިޝަނަށް ނިސްބަތްކޮށް އިންޑިއާ އެމްބަސީގައި ހުޅުޖަހަން، އައްބާސް އާދިލް ރިޒާ ގޮވައިލި މައްސަލައިގައި އޭނާގެ މައްޗަށް ދައުވާ އުފުލައިފި އެވެ.
ޕްރޮސެކިއުޓާ ޖެނެރަލް، ޕީޖީ އޮފީހުން ވިދާޅުވީ، އައްބާސްގެ މައްޗަށް ކްރިމިނަލް ކޯޓުގައި ދައުވާ އުފުލާފައިވަނީ މިއަދު ކަމަށެވެ. އޭނާގެ މައްޗަށް އުފުލަނީ "ފަނާކޮށްފާނެކަމުގެ ބިރު ދެއްކުމުގެ" ދައުވާއެވެ.
ޕީޖީ އޮފީހުން ވިދާޅުވި ގޮތުގައި، އެ ދައުވާ އުފުލަނީ ޤާނޫނު ނަންބަރު ދިވެހިރާއްޖޭގެ ޤާނޫނުލްއުޤޫބާތުގެ 222 ވަނަ މާއްދާގެ (ހ) ގެ 1 ވަނަ ނަންބަރާއި އެ މާއްދާގެ (ށ) ގެ 3 ވަނަ ނަންބަރާ ޙަވާލާދީ، އެ މާއްދާގެ (ނ) ގެ 1 ވަނަ ނަންބަރުގެ ދަށުންނެވެ.
ދަޢުވާކުރާ ސަބަބެއް ކަމުގައި ބަޔާން ކޮށްފައިވަނީ 22 ޑިސެންބަރު 2022 ގައި ސޯޝަލް މީޑިއާ ޕްލެޓްފޯމެއް ކަމަށްވާ "ކްލަބްހައުސް" ގައި ޢައްބާސް ޢާދިލް ރިޟާ ވާހަކަ ދައްކަމުން ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ތުހުމަތުކުރެވޭ މަނީލޯންޑަރިންގެ މައްސަލައެއްގެ ޝަރީޢަތް ކްރިމިނަލް ކޯޓުގައި ކުރިއަށްދާ ގޮތާމެދު ހިތްހަމަ ނުޖެހިގެން ޕެޓްރޯލާއި، ވާބުރި ފަދަ ތަކެތި އެއްޗެހި ހޯދައި، މާލޭގެ އެކި ތަންތަނުގައި ހުޅުޖަހައި، ހަމަނުޖެހުން ހިންގުމަށް ހިތްވަރުދީފައިވާތީއާއި، 23 ޑިސެންބަރު 2022 ގައި ޢައްބާސް ބޭނުންކުރާ ޓުވިޓާ އެކައުންޓުން ދިވެހިރާއްޖޭގައި ހުންނަ އިންޑިއާގެ ހައި ކޮމިޝަނަށް ނިސްބަތްކޮށް އިންޑިއާ އެމްބަސީގައި ހުޅުޖެހުމަށް ގޮވާލާ ޓްވީޓްކޮށްފައިވާތީއެވެ.
މި ކުށަށް ދެވޭ އެންމެ ބޮޑު އަދަބެއްގެ ގޮތުގައި ގާނޫނުލް އުގޫބާތުގައި ކަނޑައަޅާފައިވަނީ 1 އަހަރާއި 7 މަހާއި 6 ދުވަހެވެ.
މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހު މިމައްސަލައާއި ގުޅިގެން އައްބާސް ހައްޔަރުވެސް ކުރިއެވެ. ބަންދުގައި ބެހެއްޓުމަށްފަހު އޭނާ ދޫކޮށްލީ މިމަހުގެ 13 ވަނަ ދުވަހުއެވެ.
މިމައްސަލައިގައި އައްބާސް ބުނީ އޭނާ ޓްވިޓާ ބޭނުން ނުކުރާ ކަމަށާއި އެއީ އޭނާގެ ޓްވީޓެއް ނޫން ކަމަށެވެ.
