ވެންޓިލޭޓަރު ގެންނަން އެއްބަސްވުންތަކުގައި ސޮއިކުރި ވެރިން ސަސްޕެންޑްކޮށްފި
ކޮވިޑް-19 އާ ގުޅިގެން ރާއްޖެ ގެނައި ވެންޓިލޭޓަރުތައް ގެނައުމަށް ކުންފުނިތަކާއެކު އެއްބަސްވުންތަކުގައި ސޮއި ކުރި ވެރިންނާއި ހެލްތް މިނިސްޓްރީގެ ބިޑް ކޮމެޓީގެ މެންބަރުންނާއި ފައިނޭންޝަލް އެގްޒެކްޓިވްސްގެ މެންބަރުން ސަސްޕެންޑު ކޮށްފިއެެވެ.
އޮންލައިން ނޫސް "އަވަސް" އިން ރައީސް އޮފީހުގެ ތަރުޖަމާނު އިބްރާހިމް ހޫދު އާ ހަވާލާދީ ބުނެފައިވާ ގޮތުގައި ވެންޓިލޭޓަރުތައް ގެންނަން ކުންފުނިތަކާއި ހަވާލުކުރި އެއްބަސްވުންތަކުގައި ސޮއިކުރި ވެރިންނާއި ހެލްތް މިނިސްޓްރީގެ ބިޑް ކޮމެޓީގެ މެންބަރުންނާއި ފައިނޭންޝަލް އެގްޒެކްޓިވްސްގެ މެންބަރުންވެސް ސަސްޕެންޑްކޮށްފައިވާ ކަމަށެވެ.
އެގޮތުން ސަސްޕެންޑުކޮށްފައި ވަނީ މަކަރާއި ހީލަތް ހެދިކަމަށް ތުހުމަތު ކުރެވޭ ވެންޓިލޭޓަރުތަކުގެ އެއްބަސްވުމުގައި ސޮއިކުރެއްވި ޑެޕިއުޓީ މިނިސްޓަރު ޝިޔާމާ މުހައްމަދެވެ.
މީގެ އިތުރުން ބިޑް ކޮމިޓީގެ މެންބަރުން ސަސްޕެންޑުކޮށްފައިވާއިރު އެ ކޮމިޓީގެ ޗެއާމަނަކީ ޑެޕިއުޓީ މިނިސްޓަރު ނިޝާމާ މުހައްމަދެވެ. ދެން ސިޔާސީ ބޭފުޅެއްގެ ގޮތުގައި އެ ކޮމިޓީގައި ހިމެނިވަޑައިގަންނަވަނީ ސްޓޭޓް މިނިސްޓަރު ޑރ. ޝާހް އަބްދުﷲ މާހިރެވެ. އެ ދެ ބޭފުޅުން ނިސްތްވެވަޑައިގަންނަވަނީ ޖުމްހޫރީ ޕާޓީއަށެވެ. ދެން ބިޑް ކޮމިޓީގައި ހިމެނެނީ ސިވިލް ސާވިސްގެ ފަސް މުވައްޒަފުންނެވެ.
އެބޭފުޅުންގެ އިތުރުން އެ މައްސަލައާ ގުޅިގެން ދެން ސަސްޕެންޑުކޮށްފައި ވަނީ ހެލްތު މިނިސްޓްރީގެ މާލީ ޒިންމާދާރު ވެރިޔާ އަހްމަދު އަސްލަމެވެ.
ކޮވިޑް-19 ގެ ހާލަތާއި ގުޅިގެން ސަރުކާރުން ކުރި ޚަރަދުތަކާއި ގުޅޭގޮތުން އޮޑިޓާ ޖެނެރަލް ނެރުއްވި އޮޑިޓް ރިޕޯޓުތަކުގައި ފެންމަތި ކޮށްފައިވާ ކޮރަޕްޝަންގެ މައްސަލަތައް ތަހުގީގު ކުރުމަށް އެންޓި ކޮރަޕްޝަން ކޮމިޝަން (އޭސީސީ) އަށާއި ފުލުހުންނަށް ރައީސް އިބްރާހިމް މުޙައްމަދު ޞާލިޙު ވަނީ އަންގަވާފައެވެ.
އަދި މި މައްސަލައާ ގުޅިގެން ރައީސް ވަކިގޮތެއް އަންގަވަންދެން މަސައްކަތުން އެކަހެރިވާން ގަސްތުު ކުރާ ކަމަށް ހެލްތް މިނިސްޓަރު އަބްދުﷲ އަމީން މިއަދު ވަނީ ރައީސް ސޯލިހަށް އަންގަވާފައެވެ.
