ފާރުގައި އިންޑިއާ އައުޓު ލިޔުނު މީހާ ހަތާވީސް ދުވަހަށް ޖަލަށް
މާލޭގައި ހުންނަ ޗައިނާ އެމްބަސީ ފާރުގައި "އިންޑިއާ އައުޓު" ލިޔުނު މީހާ ހަތާވީސް ދުވަހަށް ޖަލަށް ލާން ހުކުމް ކޮށްފި އެވެ.
އިދިކޮޅު ޕްރޮގްރެސިވް ކޮންގްރެސް ކޯލިޝަނުން ރާއްޖޭގައި ކުރިއަށް ގެންދާ "އިންޑިއާ އައުޓު" ކެމްޕެއިނަކީ ދިވެހި ސަރުކާރުން ހުއްދަ ދީގެން ގިނަ އަދަދެއްގެ އިންޑިއާ ސިފައިން ރާއްޖޭގައި ގާއިމްވެ ތިބޭތީ އެކަމާއި ދެކޮޅަށް ކުރިއަށް ގެންދާ ކެމްޕެއިނެކެވެ. ދިވެހިރާއްޖޭގެ މިނިވަންކަމަށް އަސަރު ކުރާކަމަށް ބުނެ އިދިކޮޅުން ކުރިއަށް ގެންދާ ކެމްޕެއިންގައި މީގެ ދުވަސްކޮޅެއް ކުރިން ވަރަށް ފޯރިގަދަ ހަރަކާތްތަކެއް އެކި ހިސާބުތަކުގައި ކުރިއަށް ގެންދިޔަ އެވެ.
ށ. ފޭދޫ މުހައްމަދު އަނީލް ނަމަކަށް ކިޔާ މީހަކު ޗައިނާ އެމްބަސީ ފާރުގައި "އިންޑިއާ އައުޓު" ލިޔުނު މައްސަލައިގައި އޭނާގެ މައްޗަށް ދައުލަތުން އުފުލާފައިވަނީ މުދަލަށް ގެއްލުން ދިނުމުގެ ދައުވާ އެވެ. ޝަރީއަތް ފެށުމުގެ ކުރިން އޭނާ ކުށަށް އިއުތިރާފުވެފައިވާއިރު އޭނާ ބުނީ އެކަން ކުރީ މުހައްމަދު ނަމަކަށް ކިޔާ މީހަކު ބުނެގެން ކަމަށެވެ.
އަނީލްގެ މައްޗަށް އުފުލާފައިވާ ކުށުގެ ދައުވާގެ އަދަބަކީ އެއް މަހާއި ހަ ދުވަހަށް ޖަލަށް ލުމެވެ. އެހެންނަމަވެސް އޭނާ ކުށަށް އިއުތިރާފު ވުމުން އެއް ދަރަޖަ ވަނީ ލުއިކޮށްފަ އެވެ.
މިމައްސަލައިގައި ޖޫރިމަނާއެއް ދައްކައިގެން ޖަލު ހުކުމުން ސަލާމަތްވެވެން އޮތެވެ. މިކަމަށްޓަކައި ޖޫރިމަނާ ދެއްކޭނެކަމުގެ ގާބިލުކަން ހުރިކަން ޝަރީއަތަށް ކަށަވަރުކޮށްދޭން ޖެހެ އެވެ. ޝަރީއަތުގައި އެގާބިލުކަން ހުރިކަމަށް އޭނާ ބުނި ނަމަވެސް އާމްދަނީ ލިބޭ ގޮތުގެ ތަފްސީލު ބަޔާންކޮށްދޭ ލިޔުންތައް ހުށަހަޅާފައިވާ ނުވާތީ ޖޫރިމަނާއަށް އަދަބު ބަދަލުކޮށްދީފައެއް ނުވެ އެވެ.
ހުކުމް ކުރުމުގެ ކުރިން އަނީލް ވަނީ ބަންދުގައި 14 ދުވަހާއި 19 ގަޑިއިރު ޖަލުގައި ހޭދަކޮށްފަ އެވެ. އެހެންވެ ދެން އޭނާ ދެން ޖަލު ބަންދުގައި ހޭދަކުރާނީ 12 ދުވަހެވެ.
އިދިކޮޅުން ކުރިއަށް ގެންދާ "އިންޑިއާ އައުޓު" ކެމްޕެއިން އޮތީ ރައީސުލްޖުމްހޫރިއްޔާގެ ގަރާރަކުން މަނާކޮށްފަ އެވެ. މިކަން މިގޮތަށް ކުރީ ރާއްޖެއާއި އިންޑިއާއާއި ދެމެދުގައިވާ ގުޅުމަށް ބުރޫއަރައި، ގައުމީ ސަލާމަތަށް ނުރައްކާ ވެދާނެތީކަމަށް ސަރުކާރުން ބުނެ އެވެ.
