އަންހެން ފަނޑިޔާރުން އިތުރު ކުރެވުމަކީ ކުރިއެރުމެއް: ހިސާން
ޖުޑިޝަރީގައި އަންހެން ފަނޑިޔާރުން އިތުރު ކުރެވުމަކީ 2018 އާއި ހަމައަށް އޮތް ހާލަތާއި އަޅާ ބަލާއިރު ނިސްބަތުން ކުރިއެރުމެއް ކަމަށް ޖުޑިޝަލް ސާވިސް ކޮމިޝަން، ޖޭއެސްސީގެ ރައީސް ހިސާން ހުސައިން ވިދާޅުވެއްޖެ އެވެ.
ކުރިއަށް އޮތް ފަސް އަހަރު އެމްޑީޕީން ތަންފީޒު ކުރާނެ މެނިފެސްޓޯގައި އަންހެނުންނަށް ވާނެ ވައުދުތައް އެކުލަވައިލުމަށް އިއްޔެ ބޭއްވި މަޝްވަރާ ބައްދަލުވުމުގައި ހިސާން ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަން ނިމުނުއިރު އަންހެން ފަނޑިޔާރުން ނިސަބަތުން ވަރަށް މަދު ކަމަށެވެ. އަންހެނުން ބާރުވެރި ކުރުވުމުގެ ސިޔާސަތުގެ ތެރެއިން ޝަރުއީ ދާއިރާއަށް މި ސަރުކާރުން ގެނައި ހެޔޮ ބަދަލާއިމެދު ހިތްހަމަޖެހޭ ކަމަށާއި އެއީ ލިބުނު ކުރިއެރުމެއްކަމަށްވެސް ހިސާން ވިދާޅުވި އެވެ.
2018 ވަނަ އަހަރުގެ ނިޔަލަށް ރާއްޖޭގައި ތިބި 200 ފަނޑިޔާރުންގެ ތެރެއިން އަންހެނުންނަކީ އެންމެ 10 މީހުން ކަމަށް ހިސާން ވިދާޅުވި އެވެ. އެހެންނަމަވެސް މިއަދު އަންހެން ފަނޑިޔާރުންގެ އަދަދު 26 އަށް އިތުރު ކުރެވިއްޖެކަމަށް ހިސާން ވަނީ ވިދާޅުވެފަ އެވެ. މި އަދަދު އަދިވެސް އިތުރު ކުރަންޖެހޭ ކަމަށް އޭނާ ވިދާޅުވި އެވެ.
އެމްޑީޕީން އަންހެނުުންނާ ގުޅޭ ވައުދުތައް އެކުލަވައިލުމަށް ބޭއްވި ބައްދަލުވުމުގެ ތެރެއިން | ފޮޓޯ: އެމްޑީޕީ
މީގެ އިތުރުން ހައި ކޯޓާއި ސުޕްރީމް ކޯޓުގައި ރައީސް ޔާމީންގެ ވެރިކަމުގައި އިންނެވީ އެންމެ އަންހެން ފަނޑިޔާރެއް ކަމަށާއި އޭރު ކުރިމަތިކުރުވި ކަންކަމާއި ގުޅިގެން އޭނާވެސް އިސްތިއުފާ ދެއްވިކަން ހިސާން ފާހަގަކުރެއްވި އެވެ. މިއަދު އިސްތިއުނާފީ ކޯޓުތަކުގެ ފަނޑިޔާރުންގެ ތެރޭގައި 42 އިންސައްތަ އަކީ އަންހެން ފަނޑިޔާރުންކަމަށް ހިސާން ވިދާޅުވި އެވެ.
ހަމަ އެއާއިއެކު ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން، ޑީޖޭއޭ އާއި ޖުޑިޝަލް އެކަޑަމީވެސް އަންހެނެއްގެ ބެލުމުގެ ދަށުން ހިންގެވުމަކީ ފަހުރެއްކަމަށް އޭނާ ވިދާޅުވި އެވެ.
ޑިޖިޓަލްކޮށް ޝަރީއަތްތަކުގައި ބައިވެރިވެވޭގޮތަށް އުސޫލަށް ގެނައި ބަދަލާއި ގުޅޭގޮތުން ވާހަކަ ދައްކަވަމުން ހިސާން ވިދާޅުވީ މީގެ ސަބަބުންވެސް ލުއިތަކެއް ލިބުނީ އަންހެނުންނަށް ކަމަށެވެ. އަދި ވަރި އާއި ކުދިންގެ ހަޟާނާތާ ގުޅޭ މައްސަލަ އަށް ވިޔަސް މިހާރު ޖުޑިޝަރީން ފަސޭހަތަކެއް އަންނަނީ ހޯދައިދެމުން ކަމަށްވެސް އޭނާ ވިދާޅުވި އެވެ.
އަންހެނުން ބާރުވެރި ކުރުވުމަށްޓަކައި އެމީހުންނާއި ގުޅޭގޮތުން އުފައްދާ އަސާސީ ސުވާލުތައް ނިމުމަކަށް ގެންނަންޖެހޭކަމަށް ހިސާން ވިދާޅުވި އެވެ. އެގޮތުން މިވެނި އަދަދަކަށް އަންހެނުން ތިބުމުން ފުދޭތޯ ކުރާ ސުވާލު ނިމުމަކަށް ގެނެވޭނީ އަންހެނުން ބާރުވެރި ކުރުވިގެންކަމަށްވެސް ހިސާން ވަނީ ވިދާޅުވެފަ އެވެ.
