ރިޔާސީ ކެންޑިޑޭޓުންގެ މާލީ ބަޔާނާއި ގުޅޭ އުޞޫލެއް އެކުލަވައިލަނީ
ރިޔާސީ ކެންޑިޑޭޓުންގެ މާލީ ބަޔާނާއި ގުޅޭ އުސޫލެއް އެކުލަވާލައި، ރިޔާސީ އިންތިޚާބުގެ ކުރިން އެ އުޞޫލު އާންމުކުރާނެ ކަމަށް އޮޑިޓަ ޖެނެރަލްގެ އޮފީހުން ވިދާޅުވެއްޖެއެވެ.
އެ އޮފީހުން ވިދާޅުވީ، ރިޔާސީ ކެންޑިޑޭޓުންގެ މާލީ ބަޔާނާއި ގުޅޭ ގުޅޭ އުޞޫލެއް އެކުލަވާލުމުގެ މަސައްކަތް އިލެކްޝަންސް ކޮމިޝަން (އީސީ) އާއި އެންޓި-ކޮރަޕްޝަން ކޮމިޝަން (އޭސީސީ) ގެ އިތުރުން މޯލްޑިވްސް މަނިޓަރީ އޮތޯރޮޓީ (އެމްއެމްއޭ) ގުޅިގެން ކުރަމުންދާ ކަމަށެވެ.
އަދި އެ އުޞޫލާ ގުޅޭ ޑްރާފްޓެއް މިހާރު އެކުލަވާލެވިފައިވާއިރު މިހާރު ކުރިއަށްދަނީ ތިން މުއައްސަސާ މެދުގައި އުޞޫލާ ގުޅިގެން މަޝްވަރާ ކުރުންކަމަށްވެސް އެ އޮފީހުން މަޢުލޫމާތު ދެއްވައިފައިވެއެވެ.
ކެންޑިޑޭޓު ކެމްޕޭނަށް ހުޅުވާ ބޭންކު އެކައުންޓުންކޮށްފައިވާ ހުރިހާ މުއާމަލާތެއް އެނގޭނެ ބޭންކު ސްޓޭޓްމަންޓްގެ އިތުރަށް ސައްހަ މައުލޫމާތުކަން އަންގައިދޭން ފައިސާގެ ރަސީދާއި އިންވޮއިސް އަދި ބިލުތަކުގެ ކޮޕީ ވެސް މާލީ ބަޔާނާ އެކީ ހުށަހަޅަން ޖެހޭނެކަމަށް ރިޔާސީ އިންތިޚާބުގެ ޤާނޫނުގައި އޮވެއެވެ.
ކުރިއަށް އޮތް ރިޔާސީ އިންތިޚާބުގައި ވާދަކުރަން ބޭނުންވާ ކެންޑިޑޭޓުންނަށްށް ނަން ހުށަހެޅުމުގެ މި މަހުގެ 23 ގައި ހުޅުވައިލާފައިވެއެވެ.
ރިޔާސީ އިންތިޚާބުގައި ވާދަކުރާ ކެންޑިޑޭޓުން އިންތިޚާބަށް ކުރާ ހުރިހާ ޚަރަދަކާއި ކެމްޕޭނަށް ލިބޭ ހުރިހާ ފައިސާގެ މުޢާމަލާތްތަކެއް ހިންގަން ވަކި ޚާއްޞަ އެކައުންޓެއް ހުޅުވަންޖެހޭއިރު، އީސީން ދަނީ އެ އެކައުންޓްތައް ފަސޭހަކަމާއެކު ހުޅުވޭނެ އިންތިޒާމް ހަމަޖައްސައިދޭން މަސައްކަތްކުރަމުންނެވެ.
