ވޭތުވެދިޔަ ފަސް އަހަރަކީ ރާއްޖޭގެ މި ފަހުގެ ތާރީޚެއްގައިވެސް އެންމެ ކުށްމަދު ފަސް އަހަރު: ރައީސް ޞާލިޙު
ވޭތުވެދިޔަ ފަސް އަހަރަކީ ރާއްޖޭގެ މި ފަހުގެ ތާރީޚެއްގައިވެސް އެންމެ ކުށްމަދު ފަސް އަހަރުކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ރައީސް ޞާލިޙު މިހެން ވިދާޅުވީ، 2023 ވަނަ އަހަރުގެ ރިޔާސީ އިންތިޚާބުގެ ކެމްޕެއިން ތެރެއިން ހއ.އަތޮޅަށް ފަށްޓަވާފައިވާ ދަތުރުފުޅުގައި ހއ. ތުރާކުނަށް ވަޑައިގެން އެރަށު އެމްޑީޕީ މެމްބަރުންނާއި ރައީސް ޞާލިޙަށް ތާއީދުކުރައްވާ ބޭފުޅުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
އެގޮތުން ރައީސް ޞާލިޙުގެ ސިޔާސަތުތަކުގެ ތެރޭގައި ހިމެނޭ އެންމެ މުހިންމު އެއް ސިޔާސަތަކީ ރާއްޖެއަކީ އަމާން މުޖްތަމަޢުއެއް ކަމަށް ހެދުން ކަމަށާއި އެކަން އެމަގަށް ކުރަމުން އަންނަކަމަށް އެމަނިކުފާނު ވިދާޅުވިއެވެ.
"މި ވޭތުވެދިޔަ ފަސް އަހަރުގެ ތަފާސްހިސާބުތަކަށް ބަލާއިރުގައި މިއި މި ރާއްޖޭގެ މި ފަހުގެ ތާރީޚުގައި އެންމެ ކުށްމަދު ފަސް އަހަރުކަމުގައި ފުލުހުން ރިޕޯޓުކޮށްފައި އެބައޮތް" ރައީސް ޞާލިޙު ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ، ތަޢުލީމީ ގޮތުން މީހުން ބިނާކުރުމަކީ ވަރަށްބޮޑަށް އިސްކަމެއް ދިން ސިޔާސަތެއްކަމަށާއި އެގޮތުން ހިލޭ ޑިގްރީއަށް ކިޔަވައިދިނުމުގެ ފުރުޞަތާއެކު މިއަދުގެ މިހާތަނަށް 18،000 ދަރިވަރުން ހިލޭ ޑިގްރީ ޕްރޮގްރާމުގެ ދަށުން ކިޔަވަމުންދާކަމަށެވެ.
އޭގެ ތެރެއިން 6،000 ދަރިވަރުން ކިޔަވައި ނިމިފައިވާއިރު، އެތަނުން 13 ދަރިވަރުންނަކީ ތުރާކުނަށް ނިޞްބަތްވާ ދަރިވަރުންކަމަށާއި 23 ދަރިވަރަކު އަދިވެސް ކިޔަވަމުންދާކަމަށް ރައީސް ޞާލިޙު ފާހަގަކުރެއްވިއެވެ.
ކުރިއަށް އޮތްތަނުގައި ތުރާކުނަށް ކޮށްދެއްވާނެ ބައެއް ކަންތައްތައް އެމަނިކުފާނު ވިދާޅުވެފައިވާއިރު އޭގެ ތެރޭގައި އެ ރަށު ބަނދަރު ބޮޑުކޮށްދީ ރަށަށް އަރައި ފައިބަން ދަތިވެފައި އޮތް މައްސަލައަށް ހައްލެއް ގެނެސްދިނުން ހިމެނެއެވެ.
އަދި އެ ރަށު ބިން ކުޑަވެގެން ބިން ހިއްކުމުގެ މަޝްރޫއު އެމްޓީސީސީއާއި ޙަވާލުކޮށްފައިވާނެ ކަމަށާއި އެކަންވެސް ލަސްތަކެއް ނުވެ ފަށާނެ ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
