ރާއްޖެއަށް އިންޤިލާބީ ބަދަލެއް ގެނެސްދެއްވަން ކުރިއަށް އޮތް 100 އަހަރާމެދު ޤާސިމް ވިސްނަވާ: އަމީން

ރާއްޖެއަށް އިންޤިލާބީ ބަދަލެއް ގެނެސްދެއްވުމަށް ކުރިއަށް އޮތް 100 އަހަރާމެދު ޖުމްހޫރީ ޕާޓީގެ ރިޔާސީ ކެންޑިޑޭޓު، އަދި އެ ޕާޓީގެ ރައީސް ޤާސިމް އިބްރާހީމް ވިސްނަވާ ކަމަށާއި، އެ މަނިކުފާނަކީ ރާއްޖޭގެ ރައީސުލްޖުމްހޫރިއްޔާއަށް އެންމެ އެކަށީގެންވާ ބޭފުޅާކަމަށް ޖޭޕީގެ ތަރުޖަމާނު އަބްދުﷲ އަމީން ވިދާޅުވެއްޖެއެވެ.

Ads by MWSC

މިނިވަން ދުވަހާ ގުޅިގެން ޖޭޕީން ރޭ ބޭއްވި ޖަލްސާގައި ވާހަކަފުޅުދައްކަވަމުން އަމީން ވިދާޅުވީ މިނިވަންކަމުގެ ވާހަކަދައްކާއިރު ޤާސިމްގެ ވިސްނުންފުޅު ހުރީ ވަރަށް ކުރީގައިކަމަށެވެ.

ރޭގެ ޖަލްސާގައި ޤާސިމްގެ ވާހަކަފުޅަށް ރިޢާޔަތްކުރައްވަމުން އަމީން ވިދާޅުވީ، އާޓިފިޝަލް އިންޓަލިޖެންސްގެ ދަންފަޅިއެއް ދުނިޔެ ފުރޮޅާލަން އުޅޭ އިރު އަޅުގަނޑުމެން މިތިބީ "ބަރުލަމާނީތޯ، ރޫޅާލާނީތޯ، ރާވާނީތޯ، ބަނދަރު ހަދާނީތޯ، ނަރުދަމާ އަޅާނީތޯ" މި ޒުވާބުގައިކަމަށާއި، މިފަދަ ޒަމާނެއްގައި އާޓިފިޝަލް އިންޓަލިޖެންސްގެ ދަންފަޅީގައި އަޅުގަނޑުމެން މިނިވަންކަން ހިފަހައްޓާނެ ގޮތެއް ނެތްކަމަށެވެ.

އެހެން ޤައުމުތަކުގެ މިނިވަން ކަމުގެ ވާދަވެރިކަން އޮންނާނީ ކަނޑުބަޑިއަކުން ނޫންކަމަށާއި އެ ވާދަވެރިކަން އޮތީ އާޓިފިޝަލް އިންޓަލިޖެންސްއިން ކަމަށް ފާހަގަކުރައްވަމުން އަމީން ވިދާޅުވީ، ޤާސިމްގެ ވިސްނުންފުޅު ހުރީ ކުރިއަށް އޮތް 100 އަހަރަށް ކަމަށެވެ.

މީގެ އިތުރުން، ދިވެހި ފައިސާ ޑިޖިޓަލް ފައިސާއަށް ބަދަލުކުރައްވާނެ ކަމަށާއި އާޓިފިޝަލަ އިންޓަލިޖެންސްގެ އިޤްތިސާދު ރާއްޖޭގައި ބިނާކުރައްވާނެކަމަށް ޤާސިމް ވިދާޅުވެފައިވާތީ އެ ދުރުވިސްނުންވެސް އެމަނިކުފާނުގެ ގެންގުޅުއްވާކަމަށް އަމީން ވިދާޅުވިއެވެ.

ހަމައެއާއެކު ދުނިޔޭގެ އެކި ޤައުމުތަކުގެ ސިޔާސީ ވާދަވެރިކަމަށް ބަލާއިރު ދުނިޔޭގެ ހުރި ހުރިހާ ފީނާ ބޯޓުފަހަރާއި އުދުހޭ ބޯޓުފަހަރާއި މަނަވަރުތައް މިހިސާބަށް މިސްރާބުޖަހަން ފަށައިފައިވާކަމަށް ޤާސިމް ވިދާޅުވުމާއި ގުޅިގެން އެކަމަށްވެސް އަމީންގެ ވާހަކަފުޅުގައި އަލިއަޅުއްވާފައިވެއެވެ.

އެގޮތުން، މި ސަރަހައްދަށް އިންޑޯ ޕެސިފިކް "ކޮންފްލިކްޓް ނުވަތަ މައްސަލަތައް" އަންނަމުންދާ ކަމަށާއި، އެ މައްސަލަތައް އަންނަ އިރު އެ މައްސަލަތަކުގެ ވެށްޓަށް ރާއްޖެ ތައްޔާރުނޫންކަމަށް ފާހަގަކުރައްވަމުން އަމީން ވިދާޅުވީ، އެ މައްސަލަތެރޭގައި ރާއްޖެއަކީ ކުޑަ ކުޑަ ނިކަމެތި ފައިސާގެ ބާރެއްނެތް، އިލްމީ ބާރެއްނެތް ދުޅަހެޔޮކަމުގެ ބާރެއް ނެތް ޤައުމެއް ކަމުގަވާނަމަ، އެ މައްސަލަތަކުގެ ތެރޭގައި ރާއްޖޭގެ ނަންވެސް ވަސްވެސް އަދި އަސަރުވެސް ނެތި ފިލައިގެންދާނެކަމަށެވެ.

މި ހާލަތުގައިވެސް، ރާއްޖެއިން ތިބޭނީ "ހަތިޔާރު ހިފައިގެން" ކަމަށާއި ކޮންމެ އަހަރަކުވެސް ތަމްރީނުތައްވެސް މީހުންނަށް ދެމުންގެންދާނެކަމަށާއި އެހެންނަމަވެސް އެ ހާލަތަށް ރާއްޖެ ތައްޔާރުވެފައި އޮތުމަށް ބޭނުންވަނީ ހަތިޔާރާއި ތަމްރީނު އެކަނި ނޫންކަމަށް އަމީން ވިދާޅުވިއެވެ. އަދި އެކަމަށް ބޭނުންވަނީ ސިކުނޑީގެ ބޭނުންހިފާނެ ޖީލެއްކަމަށާއި ރައްޔިތުންނަށް ބޭނުންވަނީ ޒަމާނީ ޓެކްނޮލޮޖީއާއި، އާޓިފިޝަލް އިންޓަލިޖެންސްއާއި ޑިޖިޓަލް ކަަރެންސީއާއި ޑިޖިޓަލް އިކޮނޮމީއަށް ހިޖުރަކުރާނެ ޒަމާނެއްކަމަށެވެ.

އަދި މިނިވަންކަމުގް ވާހަކަ އަޅުގަނޑުމެން ދައްކާއިރު، އަޅުގަނޑުމެންގެ އަސްކަނިން ދުރަށް ވިސްނަން ޖެހޭކަމަށާއި ހަމައެކަނި އިންވެސްޓުމަންޓުތައް ރާއްޖެއަށް ގެނައުމުގެ ބަދަލުގައި އެ އަސްކަނިން ބޭރުން އިންވެސްޓުމަންޓުކުރާނެ ގޮތްތަކެއްވެސް ހޯދަން ޖެހޭކަމަށް އަމީން ވިދާޅުވިއެވެ.

މީގެ އިތުރުން، ރާއްޖޭގެ ރައްޔިތުންނަކީ ޒަމާނީ އިލްމު އުގެނޭ ބަޔަކަށް ވާންޖެހޭކަމަށާއި ޑިގްރީ ޑިޕްލޮމާ މާސްޓާސް އަދި ޕީއެޗްޑީ ހަދާ ދަރިވަރުންގެ ފެންވަރު ބަލައި މާދަމާއަށް ބޭނުންވާ އިލްމާއި ހުނަރަކީ ކޮބައިތޯ ބަލަންޖެހޭކަމަށްވެސް އަމީން ފާހަގަކުރެއްވިއެވެ.

މިކަންތައްތަކަކީ ހަޤީޤީ މިނިވަންކަން ހޯދުމަށް ބޭނުންވާ ކަންތައްކަމަށާއި، އެ ނަޒަރުން ވިސްނައި މިނިވަންކަމުގެ ވާހަކަ ދައްކާއިރު ޤާސިމްއަކީ ރައީސުލްޖުމްހޫރިއްޔާއަކަށް ގެނައުމަށް އެންމެ އެކަށީގެންވާ ބޭފުޅާކަމަށް އަމީން ވިދާޅުވިއެވެ.