ސަލަފް އުވާލަން އިއުލާންކުރީ އަދާލަތަށްވުރެ މުޖުތަމައުގައި ބަސްވިކުމާއި ނުފޫޒުގަދަވުމުން: ޓޮމް

ޖަމިއްޔަތުއް ސަލަފް އުވާލަން އިއުލާންކުރީ އަދާލަތު ޕާޓީއަށް ވުރެ, މުޖުތަމައުގައި ބަސްވިކުމާއި ނުފޫޒު ގަދަވުމުންކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު (ޓޮމް) ވިދާޅުވެއްޖެއެވެ.
ޓޮމް ވިދާޅުވީ އެޖަމިއްޔާ އުވާލުމަށް އިއުލާން ކުރުމުން ހައިރާން ނުވާކަމަށެވެ.
"ޖަމިއްޔަތުއްސަލަފް އުވާލަން އިއުލާންކުރުމުން އަޅުގަނޑު ހައިރާނެއްނުވެއެވެ. ޖަމިއްޔާތަކާބެހޭ ޤާނޫނަށް އެންމެފަހުން މަޖިލީހުން ގެނައި ބަދަލުގެ އަމާޒުހުރީ އެޖަމިއްޔާއަށް ކަން އެނގެއެވެ. މައްސަލައަކީ އަދާލަތު ޕާޓީއަށް ވުރެ މުޖުތަމައުގައި ބަސްވިކުމާއި ނުފޫޒު ގަދަވުމެވެ." ޓޮމް ވިދާޅުވިއެވެ.
އުވާލުމަށް ނިންމާ އިއުލާން ކޮށްފައިވާ ޖަމިއްޔާތަކުގެ ލިސްޓުގައި ކުރީގެ ރައީސް މައުމޫންގެ މައުމޫން ފައުންޑޭޝަނާއި ސަލަފް ޖަމްއިއްޔާވެސް ހިމެނެއެވެ. މިދެ ޖަމިއްޔާ ހިމެނޭހެން ޖުމްލަ 1989 ޖަމިއްޔާއެއް އުވާލަން ޔޫތު މިނިސްޓްރީ އިން އިއުލާން ކުރީ މިދިޔަ އަންގާރަ ދުވަހުއެވެ.
މިކަމާއި ގުޅިގެން ޔޫތު މިނިސްޓަރު އަހުމަދު މަހްލޫފް ވިދާޅުވީ ޖަމުޢިއްޔާތައް އުވާލަން އާއްމުކޮށްފައިވާކަން އެމަނިކުފާނަށްވެސް ފެނިވަޑައިގަތީ ނޫސްތަކުންކަމަށެވެ. މިނިސްޓަރު ވިދާޅުވީ އޭގެތެރޭގައި ޖަމުޢިއްޔާތަކުގެ ރަޖިސްޓްރާގެ ދަށުގައި ނުހިމެނޭ ބައެއް ޤައުމީ ކުޅިވަރު އެސޯސިއޭޝަންތަކާއި ބައެއް ކުޅިވަރު ކްލަބްތައް ހިމެނޭ ކަމަށެވެ. އަދި އެލިސްޓު އިސްލާހު ކުރަން އަންގަވާފައިވާނެ ކަމަށް މިނިސްޓަރު ވިދާޅުވިއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.