ރައީސް ޞާލިހް ކުރިޔަށް ގެންދާ އެއްވެސް ތަރައްޤީއެއް ނުހުއްޓުވާނަން:ޑރ.މުއިއްޒު
ރައީސް ޞާލިހް ހިނގަމުންދާ ތަރައްގީގެ އެއްވެސް ކަމެއް ނުހުއްޓުވާނަން ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ ރިޔާސީ އިންތިހާބުގެ ކެމްޕޭނަށް މިއަދު ހދ.ހަނިމާދުއަށް ވަޑައިގެން އެރަށުގެ ޕީޕީއެމް ސަޕޯޓަރުންނާއިއެކު ބޭއްވެވި ޖަގަހަ ބައްދަލުވުމެއްގައެވެ.
މުއިއްޒު ވިދާޅުވީ އެންމެ ބޮޑަށް މަސައްކަތް ކުރައްވާނީ ރައީސް ޔާމީން މިނިވަން ކުރުމަށް ކަމަށެވެ. މިހާތަނަށް ކުރެވުނު އެއްވެސް މަސައްކަތަކުން ރައީސް ޔާމީން މިނިވަން ކުރުމުގެ މަސައްކަތުގައި ކާމިޔާބަކާއި ހަމައަށް ނުދެވުނު ނަމަވެސް ކުރިއަށް އޮތް ރިޔާސީ އިންތިހާބު ކާމިޔާބުކޮށް، ރައީސް ޔާމީން މިނިވަން ކުރުމުގައި ބައިވެރިވެ ވަޑައިގަންނަވަން މުއިއްޒު އެދިވަޑައިގެންނެވިއެވެ.
ހިނގަމުންދާ ތަރައްގީގެ އެއްވެސް ކަމެއް ނުހުއްޓުވާނެ ކަމުގެ ޔަގީން ކަން ދެމުން މުއިއްޒު ވިދާޅުވީ ހަނިމާދޫ އެއާޕޯޓް ތަރައްގީ ކުރުމަށް މިހާރު ކުރަމުން ގެންދާ މަސައްކަތަކީ ރަނގަޅަށް ކުރިއަށް ގެންދެވިއްޖެނަމަ ރަށަށް ވަރަށް ފައިދާ ވާނެ މަޝްރޫއެއް ކަމަށެވެ.
"އެއާޕޯޓްގެ މަޝްރޫއު އަކީ ރަށަށް ފައިދާވާ ގޮތައް ކުރިއަށްދާނަމަ ވަރަށް ފައިދާ ވާނެ މަޝްރޫއެއް. މިރަށުން ލިބެން ހުންނަ ތަކެތި މިރަށުން ހޯދައިގެން އެމަސައްކަތް ކުރިއަށް ގެންގޮސް އަދި ވަޒީފާ ދެވޭ ފަރާތްތަކަކީ ވަކި އިންސައްތައެއް ނަމަވެސް މިރަށުގެ މީހުންނަށް ހެދިއްޖެނަމަ މިރަށަށް ފައިދާ ވާނެ. މިހާރަށްވުރެ މާރަނގަޅަށް ރަށަށް ފައިދާވާނެ ގޮތައް ކަންކަން ކުރެވޭނެ." އެ ރަށު ރައްޔިތުންނާ ވާހަކަދައްކަ ވަމުން މުއިއްޒު ވިދާޅުވިއެވެ.
މުއިއްޒު ވިދާޅުވީ ޕީޕީއެމްއަކީ ތަރައްގީއަށް ލޯބި ކުރާ ތަރައްގީ ގެންނަން ބޭނުންވާ ބައެއް ކަމަށާއި އެކަން ރައީސް ޔާމީންގެ ފަސް އަހަރުގެ ޒަޢާމަތުގައި ވާނީ ސާބިތުކޮށްދީފައި ކަމަށެވެ.
މުއިއްޒު ބޮޑުތިލަދުންމައްޗަށް ފެއްޓެވި ދަތުރުފުޅުގައި މިއަދު ފުރަތަމަ ވަޑައިގެންނެވީ ހަނިމާދުއަށެވެ. އެއަށްފަހު ނޮޅިވަރަމް އަދި ކުޅުދުއްފުއްޓަށް ވަޑައިގަންނަވާނެއެވެ. މިރޭ ކުޅުދުއްފުށީގައި ބޮޑު ޖަލްސާއެއް ބޭއްވުމަށް ވެސް ވަނީ ހަމަޖެހިފައެވެ.
