އަސްލަމް ރަައީސް ނަޝީދަށް: އެމްޑީޕީއަކީ އެހާ ފަސޭހައިން ރޫޅާލެވޭނެ ޕާޓީއެއްނޫން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ރޫޅާލައްވާނެކަމަށް ބައެއް ބޭފުޅުން ވިދާޅުވިނަމަވެސް، އެ ޕާޓީއަކީ އެހާ ފަސޭހައިން ރޫޅާލެވޭނެ ޕާޓީއެއް ނޫންކަމަށް އެމްޑީޕީގެ ރިޔާސީ ކެންޑިޑޭޓުގެ ރަނިންމޭޓް މުޙައްމަދު އަސްލަމް ވިދާޅުވެއްޖެއެވެ.
އެމްޑީޕީ ރޫޅާލައްވާނެކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މީގެ ކުރިން އެކިފަހަރު މަތިން ވިދާޅުވެފައިވާއިރު، އެމްޑީޕީއަކީ ރުޅާލެވޭނެ ޕާޓީއެއް ނޫންކަން ރައީސް ނަޝީދަށް ވަރަށް ސާފުކޮށް ފެނިވަޑައިގަންނަވާނެކަަމަށް އަސްލަމް ވިދާޅުވިއެވެ.
އަސްލަމް މިހެން ވިދާޅުވީ ހުޅުމާލޭ ދެވަނަ ފިޔަވަހީގައި ރޭ އޮތް ކެމްޕެއިން ހަރަކާތެއްގައި ވާހަކަފުޅު ދައްކަވަމުންނެވެ. އެގޮތުން، އެމްޑީޕީއަކީ އެކެއްގެ ފަހަތުން ދުވާނެ ޕާޓީއެއް ނޫންކަމަށާއި އެޕާޓީ އުފެދިގެން އައީވެސް އެގޮތަށްކަމަށް އަސްލަމް ވިދާޅުވިއެވެ.
އެމްޑީޕީ ރޫޅާލައްވާނެކަމަށް ރައީސް ނަޝީދު ތަކުރާރުކޮށް ވިދާޅުވެފައި ވާއިރު، ދަ ޑިމޮކްރެޓްސްގެ މެންބަރުންގެ ގޮތުގައި އަދި ރައީސް ނަޝީދުގެ ވަރަށް އަރިސް މެންބަރުންގެގޮތުގައި ތިއްބެވި ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފާއި، ތޮއްޑޫ ދާއިރާގެ މެންބަރު ޙަސަން ޝިއާން ވަނީ ދަ ޑިމޮކްރެޓްސް ދޫކުރައްވާ އަލުން އެމްޑީޕީއާއި ގުޅިވަޑައިގެންފައެވެ.
އެމްޑީޕީ ރޫޅާލާނެކަމަށް ވިދާޅުވިނަމަވެސް، އެކަން ނުވާނެ މަންޒަރު ސާފުކޮށް ފެންނަމުންދާކަމަށާއި އޭގެ ބަދަލުގައި ފެންނަނީ ޕާޓީ އިތުރަށް ވަރުގަދަވާ މަންޒަރުކަމަށް ފާހަގަކުރައްވަމުން އަސްލަމް ވިދާޅުވީ އެހެން ޕާޓީތަކުގެ މެންބަރުންވެސް އެމްޑީޕީއާއި ގުޅިވަޑައިގަންވަމުން ގެންދަވާކަމަށެވެ.
"ބަޔަކަށް ހީވި މިޕާޓީ ހަމަ ހަގީގަތުގައި ވެސް ރޫޅާލެވިދާނޭ. ނަމަވެސް އަޅުގަނޑުމެންނަށް ވަރަށް ސާފުކޮށް އެބަ ފެނޭ އެމްޑީޕީއަކީ އެހާ ފަސޭހައިން ރޫޅޭނެ ޕަޓީއެއް ނޫންކަން" އަސްލަމް ވިދާޅުވިއެވެ.
ދަ ޑިމޮކްރެޓްސްގައި ތިއްބެވި މެމްބަރުންތަކެއް އެ ޕާޓީ ދޫކުރައްވައި އަލުން އެމްޑީޕީއަށް ގުޅިވަޑައިގަތުމާއި ގުޅިގެން ރައީސް ނަޝީދު ވިދާޅުވީ ދައުލަތުގެ ފައިސާ ބޭނުންކުރައްވައިގެން މަޖިލީހުގެ މެމްބަރުންނާއި އަދި އެނޫންވެސް މީހުންނަށް ރިޝްވަތު ދެއްވަމުން ރައީސް ޞާލިޙް ގެންދަވާ ކަމަށެވެ. އަދި ލަދެއް ބިރެއް ނެތި ރައީސް ޞާލިޙް އެ ކަންކުރެއްވި ނަމަވެސް، އެކަމުގައި އެމަނިކުފާނަށް ލިބޭނެ މޮޅެއް ނޯންނާނެ ކަމަށްވެސް ރައީސް ނަޝީދު ވިދާޅުވިއެވެ.
