ދުރުރާސްތާ ޕްލޭން ހެދުމަށް 5 އަހަރުން ސަރުކާރު ބަދަލުވުން މައްސަލައަކަށްވޭ: ފާރިސް
ދުރުރާސްތާ ޕްލޭން ހެދުމަށް 5 އަހަރުން ސަރުކާރު ބަދަލުވުން މައްސަލައަކަށްވާ ކަމަށް އަންނަ ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާ އަޙްމަދު ފާރިސް މަޢުމޫން ޢަބްދުލްޤައްޔޫމް ވިދާޅުވެއްޖެއެވެ.
ރިޔާސީ މެނިފެސްޓޯގެ ސިޔާސަތުތަކުގެ މަޢުލޫމާތު ފޯރުކޮށްދިނުމަށްޓަކައި ބޭއްވި އިންޓަވިއުއެއްގައި ވާހަކަދައްކަވަމުން ފާރިސް ވިދާޅުވީ ދުރުރާސްތާ ޕްލޭން ހެދުމަށް 5 އަހަރުން ސަރުކާރު ބަދަލުވުން މައްސަލައަކަށް ވާކަމަށާއި އެކަމުގެ ސަބަބުން ބައެއް ގެއްލުންތައް ކުރިމަތިވާކަމަށެވެ.
"ރާއްޖޭގަ ދުރު ވިސްނުމެއް ނެތި، ދުރު ޓާގެޓެއްނެތި މިހެން މަސައްކަތް ކުރީމަ، މިދިޔަ އަހަރުތަކުގެ ތެރޭގައި ރައްޔިތުންނަށް ގެއްލުންތަކެއްވޭ، ވަރަށް ބޮޑު އިސްރާފުތަކެއް އެބަހުރި، އެކި ގޮތް ގޮތަށް ކޮރަޕްޝަނަށް ފައިސާ ގެއްލިގެން އެބަދޭ، ވަގުތު އެބަ ހޭދަވޭ، ބިންތައް އެބަހުރި އެކަށީގެންވާ ގޮތެއްގައި ބޭނުންނުކުރެވި، އެތައް ބައިވަރު ގެއްލުންތަކެއް އެބަވޭ ރާއްޖެއަށް"
"ދުރު ރާސްތާ ޕްލޭން ހެދުމަށް، ފަސް އަހަރުން ފަސް އަހަރުން ސަރުކާރު ބަދަލުވާ ވުން، މި އޮންނަނީ މައްސަލައަކަށްވެފައި، ޚާއްސަކޮށް ދުރު ރާށްތާ ޕްލޭން ހަދައިގެން ރަނގަޅުކުރެވޭ ކަންތައްތައް، މިސާލަކަށް ތިމާވެށީގެ ކަންތައްތައް..."
ފާރިސް ވިދާޅުވީ ދުރު ރާސްތާ ހަދައިގެން 5 އަހަރުގެ ތެރޭގައި ރަނގަޅުކޮށް، ނަތީޖާ ނުފެންނަ ކަންތައްތައް ހުންނަކަމަށެވެ. މިސާލު ނަންގަވަމުން ފާރިސް ވިދާޅުވީ މިސާލަކަށް ތިމާވެށީގެ ކަންތައްތަކަކީ އެކަމެއް ފުރަތަމަ ފެށުމުން އެކަމުގެ ނަތީޖާއާ ހަމައަށްދާން 5 އަހަރަށްވުރެ ގިނަ ދުވަސް ނަގާ ކަންތައްތައް ކަމަށެވެ.
ފާރިސް އިތުރަށް ވިދާޅުވީ 5 އަހަރަށްވުރެ ގިނަ ދުވަސް ނަގާ ކަންތައްތަކަށް ނުވަތަ މަޝްރޫޢުތަކަށް ސަރުކާރުތަކުން ޝައުޤުވެރިކަން ފާޅުނުކުރާކަމަށާއި އެއީ އެ ސަރުކާރެއްގެ ފަސްއަހަރުގެ ތެރޭގައި އެ ސަރުކާރަކުން ކުރާ ކަންތައްތަކަށް މެޑަލް ޖަހަން ބޭނުންވާތީކަމުގައެވެ.
ފާރިސްގެ އަމާޒަކީ އެންމެން ޙިއްސާވާ ނޭޝަނަލް ޑިވެލޮޕްމަންޓް މާސްޓާ ޕްލޭންއެއް ވިހިއަހަރަށް ނުވަތަ ތިރީސް އަހަރަށް ހަދައި ލަނޑުދަނޑިތަކެއް ކަނޑައެޅުމެވެ. ފާރިސް ވިދާޅުވީ އެންމެ ފުރަތަމަ ކަމެއްގެ ގޮތުން ސަރުކާރުގެ އިސްވެރިންނާއި، މަޖިލީސް މެންބަރުންނާއި ރަށްރަށުގެ ކައުންސިލް އިދާރާގެ ބޭފުޅުންނާ މަޝްވަރާކުރުމަށް މަހާސިންތާ ބާއްވައި، އެކިއެކި ކަންކަމާއި ގުޅޭގޮތުން މަޝްވަރާކުރުމަކީ އެންމެ އިސްކަމެއްގެ ގޮތުން ކުރަންޖެހޭނެ ކަމެވެ.
އަދި މީގެ އިތުރުން އެކި ފަންތީގެ، އެކި ގިންތީގެ، ކަމާބެހޭ މާހިރުންގެ މަޝްވަރާގެ މަތިން ފުރަތަމަ ކަރުދާހާ ހަމައަށް ވާސިލްވުމެވެ. މި ކަރުދާހުގައި ރާއްޖޭގެ ތަރައްޤީ ގެންދަންޖެހޭ ގޮތުގެ ތަފްޞީލް ހިމަނާފައި ހުންނާނެކަމަށާއި އެންމެންނަށް އެއްބަސްވެވޭ ކަންތައްތަކެއް މީގައި ހިމަނައި، ރިފަރަންޑަމެއްގެ ގޮތުގައި ފާސްކޮށްފިނަމަ، ދެން ވެރިކަމަށް އަންނަ ކޮންމެ ސަރުކާރަކުންވެސް އެއަށް ޢަމަލުކުރަންޖެހޭނެކަމަށް ފާރިސް ވިދާޅުވިއެވެ.
ފާރިސް ވިދާޅުވީ މި މާސްޓާ ޕްލޭން ހެދުމަށް ރާއްޖޭގައި މަސައްކަތްކުރާ ހުރިހާ ސިޔާސީ ޕާޓީއަކަށްވެސް ބައިވެރިވެ އެޕާޓީއެއްގެ ޚިޔާލު ފާޅުކޮށް ހެދޭނެ ކަމަށެވެ. އަދި މި ޕްލޭންގެ ބޭނުމަކީ 5 އަހަރު ތެރޭގައި އޭރަކު އޮންނަ ސަރުކާރަކުން ކުރަން ނިންމާ ކަންތައްތައް، ދެން އަންނަ ސަރުކާރަކުން ހުއްޓުވުމުގެ ބަދަލުގައި، ކުރިއަށް ގެންގޮސް ރައްޔިތުންނަށް ލިބެންޖެހޭ ޙައްޤުތައް ހޯދައިދިނުންކަމުގައި ފާރިސް ވިދާޅުވިއެވެ.
"ކޮންމެ ފަހަރަކު ސަރުކާރު ބަދަލުވާއިރަކަށް މި ލަނޑުދަނޑިތަކެއް ބަދަލެއް ނުކުރެވޭނެ، މި ޓާގެޓުތަކެއް ބަދަލެއް ނުކުރެވޭނެ، އެ ބޭނުމުގަ އެންމެނަށް އެއްބަސްވެވޭ ޕްލޭންއެއް މި ކަރުދާހަކީ"
ފާރިސް ވިދާޅުވީ މިފަދަ ޕްލޭންއެއް އޮވެއްޖެނަމަ ކުރިން ދެންނެވި އިސްރާފުކުރުމާއި، ވަގުތު ބޭކާރުވުމާއި ކޮރަޕްޝަން ފަދަ ކަންތައްތަކަށް ނިމުމެއް ގެނެވޭނެކަމަށެވެ.
30 އަހަރުގެ އެއްދައުރު އޮންނަ ގޮތަށް ޤާނޫނު ބަދަލް ކޮށްލައްވާ !