ގާސިމްގެ ވަޢުދެއް: އަލަށް އުފަންވާ ކޮންމެ ކުއްޖަކަށް 5،000 ރުފިޔާ
އަންނަ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރައްވާ ގާސިމް އިބްރާހިމްގެ މެނިފެންޓޯގައި އުފަންވާ ކޮންމެ ކުއްޖަކަށް 5000 ރުފިޔާގެ ވައުޗަރެއް ދިނުމަށް ނިންމާފައިވާކަން ހާމަކޮށްފިއެވެ.
ރިޔާސީ އިންތިހާބުގެ ކެންޕެއިނަށް ތ. ގުރައިދޫ އަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ ރަނިންމޭޓް ޑރ. އަމީން އިބްރާހިމް ވިދާޅުވީ ވިހައިގެން ލިބޭ ޗުއްޓީގެ އިތުރުން އިތުރު ހަ މަސް ޗުވަހުގެ ޗުއްޓީއެއް ދޭނެ ކަމަށެވެ.
އަދި އަލަށް އުފަންވާ ކޮންމެ ކުއްޖަކަށް 5،000 ގެ އިނާޔަތެއް ދޭނެ ކަމަށާއި ގާސިމްގެ މެނިފެސްޓޯގައި އަންހެނުންނަށް ހާއްސަކޮށްގެން ގިނަ ކަންތައްތައް ހިމަނާފައިވާ ކަމަށް އަމީން ވިދާޅުވިއެވެ.
"ކޮންމެ ދަރިއަކު އުފަންވުމާއި އެކު މާލީއެހީގެ ގޮތުގައި 5000 ރުފިޔާގެ ވައުޗަރ އެއް ދޭނެ" އަމީން ވިދާޅުވިއެވެ.
އަމީން ވިދާޅުވީ އެކި ކަހަލަ އަނިޔާ ލިބޭ އަންހެނުންނަށް އިންސާފު ހޯދާ ދިނުމަށް ހާއްސަ މަސައްކަތްތަކެއް ކުރައްވާނެ ކަމަށާއި ޤާސިމް ވެރިކަމަށް އިސްކޮށްފިނަމަ ރައްޔިތުންގެ ކަންކަން މާ ފުރިހަމައަށް ކޮށްދެއްވާނެކަމަށެވެ.
