ރަސްދޫއިން އޮފިޝަލް ވަކިކުރީ ވަކި ސިޔާސީ ޕާޓީއަކަށް ތާއީދުކޮށްގެން

ރިޔާސީ އިންތިޚާބުގެ ވޯޓުލުން ކުރިއަށްދަނިކޮށް އއ. ރަސްދޫގެ ވޯޓު ފޮށީގެ 2 އޮފިޝަލުން ވަކިކުރީ ވަކި ސިޔާސީ ޕާޓީއަކަށް ތާއީދުކުރުމަށް މަސައްކަތްކޮށްފައިވާތީ ކަމަށް އިލެކްޝަންސް ކޮމިޝަން (އީސީ) ގެ ސެކެޓްރީ ޖެނެރަލް ޙަސަން ޒަކަރިއްޔާ ވިދާޅުވެއްޖެއެވެ.

Ads by STELCO

އީސީއިން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޒަކަރިއްޔާ ވިދާޅުވީ އއ. ރަސްދޫގައި މިއަދު ވޯޓުލުން ކުރިއަށްދިޔަ ވަގުތު އެ ވޯޓު ފޮށްޓަށް ހަމަޖައްސާފައިވާ 2 އޮފިޝަލަކު، ވަކި ރިޔާސީ ކެނޑިޑޭޓަކަށް ތާއީދު ހޯދުމުގެ ގޮތުން މަސައްކަތްކޮށްފައިވާކަމަށާއި އެއީ އޮފިޝަލުންގެ އިޤުރާރުގައި މަނާކަމެއްކަން ސާފުކޮށް ބަޔާންކޮށްފައި ވާނެކަމަށެވެ.

އެހެންކަމުން މި 2 އޮފިޝަލުން އިޤުރާރާއި ޚިލާފްވީކަމަށް ނިންމައި، މަޤާމުން ވަކިކޮށްފައިވާނެކަމަށާއި، މި ވޯޓު ފޮށްޓަށް ހަމަޖައްސާފައިވާ ރިޒާވް އޮފިޝަލުން މަސައްކަތަށް ނެރެ، ވޯޓުލުން ކުރިއަށް ގެންގޮސްފައިވާކަމަށް ޒަކަރިއްޔާ ވިދާޅުވިއެވެ.

ވޯޓުލާ މަރުކަޒުގައި ހިނގައިދިޔަ ހަމަނުޖެހުމަކީ، އޮފިޝަލުން ބޭރުކުރުމުން ހިނގައިދިޔަ ހަމަނުޖެހުމެއްކަމަށް ޒަކަރިއްޔާ ފާހަގަކުރައްވާފައިވެއެވެ.