"1ހާސް1ހާސް" ޕްރޮމޯޝަން: އެމްޑަބްލިޔުއެސްސީން ފުރަތަމަ ދެ ހަފްތާގެ ނަސީބުވެރިން ހޮވައިފި
މޯލްޑިވްސް ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އިން އެކުންފުނީގެ ޑޮމެސްޓިކް ކަސްޓަމަރުންނަށް އަމާޒުކޮށްގެން ކުރިއަށްގެންދާ "1ހާސް1ހާސް" ޕްރޮމޯޝަނުގެ ފުރަތަމަ ދެ ހަފުތާގެ ނަސީބުވެރިން ހޮވައިފި އެވެ.
މިމަހުގެ އެއްވަނަ ދުވަހުން ފެށިގެން ސެޕްޓެމްބަރު މަހުގެ ނިޔަލަށް ކުރިއަށްގެންދާ މި ޕްރޮމޯޝަނުގައި ކޮންމެ ހަފުތާއަކުވެސް 10 ނަސީބުވެރި ފަރާތެއް ހޮވުމަށް ވަނީ ހަމަޖެހިފައެވެ.
އެމްޑަބްލިޔުއެސްސީން ބުނެފައިވާ ގޮތުގައި، ޕްރޮމޯޝަންގެ މިމުއްދަތުގެ ތެރޭގައި ޑޮމެސްޓިކް ކަސްޓަމަރުންގެ ތެރެއިން ހުރިހާ ފެންބިލަކަށް ފައިސާ ދައްކާ ފަރާތްތަކާއި ވަކި މަސްތަކަށް ބަހާލައިގެން ބިލަށް ފައިސާ ދައްކަމުންގެންދާ ފަރާތްތަކަށް ވެސް މި ޕްރޮމޯޝަންގައި ބައިވެރިވެވޭނެއެވެ.
"1ހާސް1ހާސް" މިޕްރޮމޯޝަނުގައި ގުރުއަތުން ހޮވިގެން އިނާމު ލިބޭނީ އެވަގުތެއްގައި އެ ފެން މީޓަރެއް ބޭނުންކޮށް، ބިލު ދައްކާ ފަރާތަކަށް ކަމަށް އެމްޑަބްލިއުއެސްސީން ބުނެފައިވެއެވެ. އަދި ގުރުއަތުގައި ހިމެނޭ ފޯނު ނަންބަރަކީ އެޕް ނުވަތަ ޕޯޓަލްގައި ރަޖިސްޓްރީކުރާއިރު ނުވަތަ ކައުންޓަރުން ފައިސާ ދައްކާއިރު ކައުންޓަރަށް ދިން ފޯނު ނަންބަރު ކަމުގައި ވެސް ވާން ޖެހެއެވެ.
މިޕްރޮމޯޝަންގައި ބައިވެރިވުމުގެ ފުރުސަތު މާލެ، ހުޅުމާލެ އަދި ވިލިމާލޭގެ އިތުރުން އެމްޑަބްލިއުއެސްސީއިން ހިދުމަތްދޭ ކ. މާފުށި، ރ. ދުވާފަރު އަދި ހދ. ކުޅުދުއްފުށީގެ ޑޮމެސްޓިކް ކަސްޓަމަރުންނަށް ވެސް ވަނީ ހުޅުވާލާފައެވެ.
މި ޕްރޮމޯޝަނާ ގުޅޭ އިތުރު މައުލޫމާތު އެމްޑަބްލިއުއެސްސީގެ ކަސްޓަމާ ކެއާ ނަންބަރު 105އަށް ގުޅުމުން ލިބޭނެ އެވެ.
އަޅުގަޑުގެ އެޕާރޓުމެންޓަކުނ ފެންކެޑިތާ 3އަހަރު ވެއްޖެ، ތީ ވެސްްްްް އަންސާނުންތ!