އަމީރު މުއިއްޒުއަށް: އަބަދު އޮޅުވާލައި މަކަރު ހެދުމަކީ އެހައިރަނގަޅުކަމެއް ނޫން

ބޭރު ގައުމުތަކުން ނަގާ ލޯނުތަކުގެ އިންޓްރެސްޓް ރޭޓް ފަދަ މައުލޫމާތުތައް މި ސަރުކާރުން ރައްޔިތުންނަށް ހާމަނުކޮށް ސިއްރުކޮށްފައި ހުންނަ ކަމަށް، އިދިކޮޅު ޕީޕީއެމް-ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވުމުން ފިނޭންސް މިނިސްޓަރު އަމީރު އެކަމަށް ރައްދުދެއްވައިފިއެވެ.

Ads by STELCO

ރިޔާސީ އިންތިޚާބުގެ ދެވަނަ ބުރުގެ ކެމްޕޭނަށް ބ. ކަމަދޫއަށް ވަޑައިގެން އެރަށުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން މުއިއްޒު ވިދާޅުވީ މި ސަރުކާރުން ލޯނު ނެގުމަށް ސޮއިކޮށްފައި ހުންނަ އެގްރިމަންޓުތަކުގެ އިންޓަރެސްޓު ރޭޓުވެސް ފާޅުކޮށްލާކަށް މި ސަރުކާރަށް ނުކެރޭކަމަށެވެ.

"ގައުމީ ސަލާމަތަށް ނުރައްކާވާތީ، އެގްރީމަންޓު ތަކުގައި ކިތައް ޕަސެންޓު އިންޓަރެސްޓު އޭގަ ހިމެނެނީ، ކިތައް އަހަރުންތޯ އަނބުރާ ދައްކަން ޖެހެނީ، ބަޔާންކޮށްލީމައި ހަނޑޫ ހަކުރު ފުށް ލިބުމަށް ހުރަސް އެބައެޅޭ" މުއިއްޒު ވިދާޅުވިއެވެ.

މުއިއްޒު މި ވާހަކަފުޅަށް ރައްދުދެއްވަމުން އަމީރު ކުރެއްވި ޓްވީޓެއްގައި ވިދާޅުވީ ލޯނުގެ އެއްވެސް މައުލޫމާތެއް ސިއްރު ނުކުރައްވާ ކަމަށާއި ޤާނޫނުގައިވާ ގޮތުގެ މަތިން އެ މައުލޫމާތުތައް މިހާރުވެސް ރައްޔިތުންގެ މަޖިލީހަށާއި އަދި އެމްއެމްއޭއާވެސް ޙިއްޞާކުރައްވަމުން ގެންދަވާކަމަށެވެ.

އަދި ރައީސް ޔާމީން އަބްދުލްގައްޔޫމްގެ ވެރިކަމުގައި 2013 އިން 2018 އަށް މާލީ ހާލަތާއި ބެހޭ ރިޕޯޓުތަކާއި ދަރަނިތަކުގެ ތަފްޞީލް ރައްޔިތުންގެ މަޖިލީހަށް ފިނޭންސް މިނިސްޓްރީން ފޮނުއްވުމުން، އެ ފޮރުއްވާފައިގެން އުޅުއްވި ބޭފުޅުން އެފަދަ ވާހަކަ މިއަދު ދެއްކެވުން އެހާ ރަނގަޅު ނޫންކަމަށްވެސް އަމީރު ވިދާޅުވިއެވެ.

މުއިއްޒުއަށް ރައްދުދެއްވަމުން އަމީރު ވިދާޅުވީ އަބަދު އޮޅުވާލައްވައި މަކަރު ހެއްދެވުން އެއީ އެހައި ރަނގަޅު ކަމެއް ނޫންކަމަށެވެ.