ފުރަތަމަ ބުރަށް ވުރެ އިތުރަށް 350 އޮފިޝަލުން ދެވަަނަ ބުރުގައި ހަރަކާތްތެރިވާނެ: އީސީ
ރިޔާސީ އިންތިހާބުގެ ފުރަތަމަ ބުރަށްވުރެ އިތުރަށް 350 އޮފިޝަލުންނާއެކު ވޯޓުލުން ކުރިއަށް ގެންދިޔުމަށް ފުރިހަމައަށް ތައްޔާރު ވެފައިވާ ކަމަށް އިލެކްޝަންސް ކޮމިޝަން (އީސީ) އިން މިރޭ ބުނެފިއެވެ.
އީސީން މިކަން ހާމަކޮށްފައި ވަނީ އެ ކޮމިޝަނާއި ފުލުހުން ގުޅިގެން ވޯޓުލާން ފެށުމުގެ ކުރިން އެންމެ ފަހު ފަހަރަށް ބޭއްވި ނޫސްވެރިންގެ ބައްދަލުވުމުގައި މައުލޫމާތު ހިއްސާކުރައްވަމުންނެވެ.
އެގޮތުން އީސީގެ ނައިބު ރައީސް އިސްމާއިލް ހަބީބް ވިދާޅުވީ މާދަމާ ވޯޓުލުން ކުރިއަށް ގެންދާނީ ހެނދުނު 8 އިން ހަވީރު 5 އަށް ކަމަށެވެ.
ހަމަ އެހެންމެ އިންތިޚާބުގެ ފުރަތަމަ ބުރުގައި ދިމާވި ކަންތައްތަކުގެ އަލީގައި، ވަރަށް ގިނަ ކަންކަން އިސްލާހުކޮށް ތަރުތީބު ކޮށްފައި ވާނެ ކަމަށް ހަބީބް ވަނީ ވިދާޅުވެފައެވެ.
މިގޮތުން ފުރަތަމަ ބުރަށް ވުރެ އިތުރަށް 350 އޮފިޝަލުން މާދަމާގެ އިންތިޚާބުގައި ހަރަކާތްތެރި ވާނެ ކަމަށް ހަބީބް ވަނީ ވިދާޅުވެފައެވެ.
ހަބީބް ވިދާޅުވީ މި އިންތިޚާބުގައި ޖުމްލަ 5،286 އޮފިޝަލުން ހަރަކާތްތެރިވާއިރު ރިޒާވް އޮފިޝަލުންގެ ގޮތުގައި 150 އޮފިޝަލުން ހަރަކާތްތެރި ވުމަށް ހަމަޖެހިފައިވާ ކަމަށެވެ.
އަދި 500 އަށް ވުރެ ގިނަ މީހުން ވޯޓުލާ 176 މަރުކަޒެއްގައި ދެ ސެޓަޕަކަށް ވޯޓު ލުމުގެ މަސައްކަތް ކުރިއަށް ދާނެ ކަމަށާއި އެފަދަ މަރުކަޒުތަކުގައި ވެރިޔާ އާއި ދެ އެހީތެރިންނާ އެކު 11 އޮފިޝަލުން ހަރަކާތްތެރިވާނެ ކަމަށް ހަބީބް ވަނީ ވިދާޅުވެފައެވެ.
ހަބީބު އިތުރަށް ވިދާޅުވީ މި ފަހަރު ވޯޓުލާ ކިއު މެނޭޖް ކުރުމަށް މީހުން ހަމަޖައްސާފައިވާ ކަމަށާއި ކިއު މެނޭޖްކޮށް، ވޯޓު ލާ މީހުންނަށް މަގު ދައްކައި އެހީތެރިވުމުގެ ގޮތުން ގްރައުންޑް މެނޭޖަރުންގެ ގޮތުގައި 153 މީހަކު ހަރަކާތްތެރިވާނެ ކަމަށެވެ.
Ads by STO
