ސަރުކާރުން ފަސް އަހަރުގެ ދައުރެއް ނިންމާލީ، ކަންނެތް ކަމުގައި : އިމްތިޔާޒް

ރައީސް އިބްރާހިމް މުހައްމަދު ޞާލިހްގެ ސަރުކާރުން ފަސް އަހަރުގެ ދައުރެއް ނިންމާލީ ކަންނެތްކަމުގައި ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

Ads by MWSC

އިންތި މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުންނެވެ.

އެގޮތުން އިންތި ފާހަގަކުރެއްވި ގޮތުގައި މި ސަރުކާރުގެ ފަސް އަހަރުގެ ދައުރެއް ނިމިގެންދިޔައިރު، ރާއްޖެ މިއޮތީ އޮތް ގޮތަށް ކަމަށެވެ.

ހަމަ އެހެންމެ ރައީސް ޞާލިހް ކަންނެތްކަމުގައި ވެރިކަމުގައި ހުރެ ދައުރު ނިންމާލީ ކަމަށް އިންތި ވަނީ ތުހުމަތު ކުރައްވާފައެވެ.

މި ވެރިކަމުގައި އެއްވެސް ކަމެއް ކުރެވިފައި ނުވާ ކަމަށާއި ކޯލިޝަން ވެސް ގެއްލުނީ ލީޑާޝިޕެއް ނެތުމުން ކަމަށް އިންތި ވަނީ ވިދާޅުވެފައެވެ.

އަދި ރައީސް ޞާލިހްގެ ސަރުކާރުން މި ވެރިކަމުގައި ޤައުމަށް ގެންނަން ޖެހޭ ބަދަލުތަކާއި ރައްޔިތުންނާ ގުޅުންހުރި ބޮޑެތި މައްސަލަތަކަށް އެޑްރެސް ކުރުމެއްނެތި ދައުރު ނިންމާލީ ކަމަށް އިންތި ވަނީ ތުހުމަތު ކުރައްވާފައެވެ.

މީގެ އިތުރުން އިންތި ވިދާޅުވީ ދިވެހި ރައްޔިތުންނާއި ރާއްޖެ ތަމްސީލު ވާގޮތަށް މަޖިލިސް އެކުލާވާލުމަކީ މުހިންމު ކަމެއް ކަމަށެވެ.

މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) އަކީ ރައީސް ޞާލިހާއި ހިޔާލު ތަފާތުވެ ރައީސް ނަޝީދު އުފައްދަވާފައިވާ ދަ ޑިމޮކްރެޓްސް އަށް ނިސްބަތްވާ މެންބަރެކެވެ.