ރައީީސް ޔާމީންގެ އިސްތިއުނާފު ލަސްކުރަނީ ޕީޖީ ޝަމީމް ބައެއްގެ ނުފޫޒުގައި ޖެހިގެން: ޖަމީލު

އިދިކޮޅު ލީޑަރު، ރައީސް ޔާމީން އަބްދުލްޤައްޔޫމްގެ އިސްތިއުނާފު މައްސަލަ ލަސް ކުރަމުންދަނީ، ޕްރޮސެކިއުޓަރ ޖެނެރަލް ޙުސައިން ޝަމީމް، ބައެއްގެ ނުފޫޒުގައި ޖެހިގެން ކަމަށް ރައީސް ޔާމީންގެ އިސް ޤާނޫނީ ވަކީލު ޑރ.މުޙައްމަދު ޖަމީލު އަޙުމަދު ވިދާޅުވެއްޖެއެވެ.

Ads by STELCO

ޗެނަލް13އަށް އެކަނި ދެއްވި ބަސްދީގަތުމެއްގައި ކުރީގެ ނައިބު ރައީސް ޖަމީލު ވަނީ، ވ.އާރަށް މައްސަލައިގެ އިސްތިއުނާފުގެ އެންމެ ފަހުން ތާވަލު ކުރި އަޑުއެހުން ވެސް ޕީޖީގެ އެދުވަޑައިގަތުމަށް ފަސްކުރިއިރު، މިއީ ބައެއްގެ ރޭވުމަށް ކުރާ ކަމެއްގެ ގޮތުގައި ސިފަ ކުރައްވައިފައެވެ.

އަދި މިހާރު މި މައްސަލައަށް ތަފާތު އެކި ފަރާތްތަކުން ނުފޫޒު ފޯރުވަމުން އަންނަ ކަމަށް އެމަނިކުފާނު ތުހުމަތު ކުރެއްވިއެވެ.

"އަޅުގަނޑުގެ އިލްތިމާސަކީ، ކޯޓުން މި މައްސަލައިގައި ފިޔަވަޅު އަޅުއްވާ، (ކޯޓުން) މައްސަލައިގެ އިސްތިއުނާފު ހިނގާނެ މަގެއް ދައްކަވާށޭ. ކޯޓަށް އެ ބާރު ލިބިގެންވެޔޭ، އެހެންވީމަ، އެކަން ކޮށްދެއްވާށޭ." އެމަނިކުފާނު ވިދާޅުވިއެވެ.

އާރަށު މައްސަލައަކީ، ރައީީސް ޔާމީން ސިޔާސީ މައިދާނުން އެއްފަރާތް ކުރުމަށްޓަކައި ސަރުކާރުން ގެންގުޅު ކާޑުކަން ޖަމީލު ފާހަގަކުރެއްވިއެވެ.

"އަޅުގަނޑު ޤަބޫލުކުރަނީ، އަދިވެސް(ސަރުކާރުން) ޤަބޫލުކުރައްވަނީއޭ، މިހާރު މިއޮތް އިންތިޤާލީ މަރުޙަލާގެ ތެރޭގައި، އަލަށް އުފެދެން އުޅޭ ސަރުކާރާއި، ޕީޕީއެމް/ޕީއެންސީތެރެ ބައިބައިކުރަން ތިމަންނަމެންނަށް، މިކަންކަން ކުރަން ބޭނުންވާ ސިޔާސީ އެކްޓަރުން އެބަތިއްބެވި، އެހެންވީމަ، އެފަރާތްތަކުގެ އަދިވެސް މަސްލަހަތު އޮތީ ރައީސް ޔާމީން އަދިވެސް ހައްޔަރުކޮށްގެންނޭ،"

މީގެ އިތުރުން މިހާރު ކުރިއަށްދާ އިންތިޤާލީ މަރުޙަލާގެ ސްޓެބިލިޓީ ގެއްލުވައިލައި، އިންތިޚާބީ ރައީީސް ޑރ.މުޙައްމަދު މުޢިއްޒުގެ ސަރުކާރަށް އުނދަގޫ ކުރުމަކީ ވެސް ރައީީސް ޔާމީނަށް އިންސާފު ލިބުމަށް ހުރަސް އަޅާ ސަބަބެއް ކަމަށް ޖަމީލު ވިދާޅުވިއެވެ.