އަންނަ އަހަރުގެ ބަޖެޓް 50 ބިލިއަނަށް
އަންނަ އަހަރަށް ލަފާކުރާ ދައުލަތުގެ ބަޖެޓް 50 ބިލިއަން ރުފިޔާ އަށް އަރާނެ ކަމަށް ފިނޭންސް މިނިސްޓްރީން ލަފާކޮށްފިއެވެ.
މިނިސްޓްރީން ރައްޔިތުންގެ މަޖިލީހަށް ހުށަހެޅި ފިސްކަލް ސްޓްރެޓެޖީ ބަޔާނުގައިވާ ގޮތުން އަންނަ އަހަރުގެ ޖުމުލަ ހަރަދު 48 ބިލިއަން ރުފިޔާ އަށް އަރާނެ ކަމަށް ލަފާކުރެވޭ އިރު، ރިކަރަންޓް ހަރަދަށް 33 ބިލިއަން ރުފިޔާ ކަނޑައަޅާފައިވެއެވެ.
އަންނަ އަހަރުގެ ބަޖެޓު އެކުލަވައިލުމުގެ މަސައްކަތް ފިނޭންސް މިނިސްޓްރީން މިހާރު ކުރަމުން އަންނަ އިރު، މިކަމުގައި އިންތިހާބީ ރައީސް ޑރ. މުއިއްޒުގެ ފަރާތުން ވެސް އެހީތެރިކަން އަންނަނޯ ހޯދަމުންނެވެ. އެގޮތުން ބަޖެޓްގައި އޭނަ ހިމަނުއްވަން ބޭނުންވާ ކަންކަމަށް ވަނީ ފުރުސަތު ދީފައެވެ.
މުއިއްޒު ރައީސްކަމުގެ ހުވާ ކުރައްވާނީ އަންނަ މަހުގެ 17 ގައެވެ.
އަންނަ އަހަރުގެ ބަޖެޓާ ގުޅޭ ފިސްކަލް ސްޓްރެޓެޖީ ރިޕޯޓުގައިވާ ގޮތުން އަންނަ އަހަރަށް މަޝްރޫއުތައް ހިންގަން 15 ބިލިއަން ރުފިޔާ ކަނޑައަޅާފައިވާ އިރު އޭގެ ތެރެއިން ޕީއެސްއައިޕީ ޕްރޮޖެކްޓްތަކަށް ހާއްސަކުރި އަދަދަކީ 11 ބިލިއަނެވެ. "ނިއު ޕޮލިސީ އިނީޝީއޭޓިވް" ގެ ދަށުން އާ ކަންކަމަށް 1.3 ބިލިއަން ހޭދަކުރަން ކަނޑައަޅާފައިވާ އިރު، ލަފާކޮށްފައިވާ ގޮތުގައި އަންނަ އަހަރު ބަޖެޓު ޑެފިސިޓް ހުންނާނީ 9.8 ބިލިއަން ރުފިޔާގަ އެވެ. އެއީ ރާއްޖޭގެ ޖީޑީޕީގެ ނިސްބަތުން 8.5 ޕަސެންޓެވެ.
އަންނަ އަހަރު ވެސް ދައުލަތުގެ ދަރަނި ހުންނާނެ ކަމަށް ލަފާކޮށްފައި ވަނީ މި އަހަރާ ދާދި އެއްވަރެއްގަ އެވެ. އެއީ 111 ބިލިއަން ރުފިޔާއެވެ.
ދައުލަތުގެ މި އަހަރުގެ ބަޖެޓަކީ 42.8 ބިލިއަން ރުފިޔާއެވެ.
