ނެއްލައިދޫ "އެދުރުވެހި" އިމާރާތް ކަރަންޓީނު ފެސިލިޓީއެއްގެ ގޮތުގައި މަރާމާތުކޮށް ކައުންސިލާއި ހަވާލުކޮށްފި
ހދ. ނެއްލައިދޫ "އެދުރުވެހި" އިމާރާތް ކަރަންޓީނު ފެސިލިޓީއެއްގެ ގޮތުގައި މަރާމާތުކޮށް، އެރަށު ކައުންސިލާއި ހަވާލުކޮށްފިއެވެ.
މިމަސައްކަތް ކޮށްދީފައިވަނީ އައި.ސެވަން ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑްގެ ސީއެސްއާރް ޕްރޮގްރާމުގެ ދަށުންނެވެ.
ފެތުރެމުން އަންނަ ކޮވިޑް-19 އަށް މޮނިޓަރ ކުރުމަށާއި ކަރަންޓީން ކުރުމުގެ ކެޕޭސިޓީ އިތުރުކުރުމުގެ މަޤުސަދުގައި، އެމަސައްކަތް ނިންމާ ރަސްމީކޮށް ހަވާލުކޮށްފައިވަނީ މިއަދު އެދުރުވެހި އިމާރާތުގައެވެ.
އައި.ސެވަންގެ ފަރާތުން ކައުންސިލާއި އިމާރާތް ހަވާލުކޮށްދެއްވާފައިވަނީ އެ ކުންފުނީގެ ޑިރެކްޓަރ އަހުމަދު ސަމްޢޫންއެވެ.
ކަރަންޓީނު ފެސިލިޓީއެއްގެ ގޮތުން އެއިމާރާތް މަރާމާތުކުރުމުގެ މަސައްކަތުގައި އިމާރާތުގެ ސީވޭޖު އަދި ފެންހިންދާ ނިޒާމު އަލުން ޤާއިމުކުރުމާއި، އިމާރާތުގެ ފުރާޅު މަރާމާތުކުރުމާއި، ސީލިންގ މަރާމާތުކުރުމާއި، މުޅިއިމާރާތުގައި ކުލައާއި ވޯލްސީލްލުމާއި، އިމާރާތުގެ ދޮރުތައް މަރާމާތުކުރުމާއި، ތިން ކޮޓަރީގެ ފާޚާނާ ސެޓް ބަދަލުކުރުމާއި، އިމާރާތުގެ ފެން ވައިރިންގ ރަގަނޅުކޮށް ފެން މޯޓަރއެއް ހަރުކުރުމުގެ އިތުރުން ކަރަންޓް ވައިރިންގ އަޅާ ޑީބޯޑް ހަރުކުރުމުގެ މަސައްކަތްވަނީ ކުރެވިފައެވެ. އަދި މި ޕްރޮގްރާމްގެ ދަށުން ބައެއް މެޝިނަރީސްތަކާއި ކޮވިޑް19 އިން ރައްކާތެރިވުމަށް ބޭނުންކުރާނެ ބައެއް އާލާތްތައް ކައުންސިލާއި ވަނީ ހަވާލުކޮށްފައެވެ.
ކައުންސިލާއި ހަވާލުކުރި މެޝިންތަކުގެ ތެރޭގައި ފޮގް މެޝިނަކާއި ޑިސްއިންފެކްޓް ކުރާ މެޝިނާއި އެއަށް ބޭނުންވާ ކެމިކަލް، ޔޫވީޑިޝްއިންފެކްޝަން މެޝިނަކާއި އެއަށް ބޭނުންވާ ކެމިކަލް، ސެނެޓައިޒަރ، މާސްކް، ފަސް ފުލްބޮޑީ ޕީޕީއީގެ އިތުރުން ފޯހެޑް ތަމޯމީޓަރ އެއް ހިމެނެއެވެ.
އައިސެވަން ކޮންސްޓްރަކްޝަންގެ ފަރާތުން ކޮށްދިން މިމަސައްކަތަށް ނެއްލައިދޫ ކައުންސިލުގެ ފަރާތުން ވަނީ އިޚުލާސްތެރި ޝުކުރެއް އަދާކޮށްފައެވެ.
Ads by STO
