އީވާ ސަލާން ވިދާޅުވުމުން، ރައީސް ނަޝީދުގެ އިތުބާރު ނެތް މައްސަލައިގެ ޖަލްސާ ނުބޭއްވުނު
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތް ކަމަށް ބުނެ ހުށަހަޅާފައިވާ ގަރާރު މިއަދަށް އެޖެންޑާކުރި ނަމަވެސް، މަޖިލީހުގެ ނައިބު ރައީސް އީވާ އަބްދުﷲ ސަލާން ވިދާޅުވުމުން ޖަލްސާ ނުބޭއްވޭނެކަން އަންގައިފިއެވެ.
ރައީސް ނަޝީދު މަޤާމުން ވަކިކުރަން އެމްޑީޕީގެ 49 މެމްބަރުން ސޮއިކުރައްވައި ހުށަހަޅުއްވާފައިވާ އިތުބާރު ނެތްކަމުގެ ގަރާރުގެ 14 ދުވަހުގެ ނޯޓިސް ހަމަވެ، މިއަދަށް އެ މައްސަލައިގައި ގޮތެއް ނިންމަން ތާވަލުކޮށްފައިވެއެވެ.
މިއަދުގެ ޖަލްސާ ކެންސަލް ކުރީ އީވާ އާލާސްކަންފުޅާ އުޅުއްވާތީ ސަލާމުގައި ހުންނެވުމުން ކަމަށް މަޖިލީހުގެ އިދާރާއިން ވިދާޅުވެފައިވާއިރު، މިއަދުގެ ޖަލްސާ ކެންސަލްކުރިކަން އިއުލާނުކުރައްވަމުން އަމީން އާއްމު ފާތިމަތު ނިއުޝާ ވިދާޅުވީ އީވާ އާލާސްކަންފުޅާ އުޅުއްވާކަން މަޖިލީހުގެ އިދާރާއަށް ލިއުމުން އެންގެވީ މިއަދު ހެނދުނު ކަމަށެވެ.
މީގެ އިތުރުން، މަޖިލީހުގެ ރައީސް ވަކިކުރަން ހުށަހަޅާ ގަރާރެއްގެ ނޯޓިސް މެމްބަރުންނަށް ފޮނުވުމަށް ފަހު އެ ނޯޓިހުގެ މުއްދަތު ހަމަވެފައިިވާ ނަމަ އެންމެ ފުރަތަމަ އަށް އަންނަ ރަސްމީ ދުވަހު އެ ޖަލްސާ ބާއްވަން ޖެހޭ ކަމަށާއި އެހެންވީމާ މާދަމާގެ ޖަލްސާއަށް ވެސް އެޖެންޑާ ކުރާނީ އެ މައްސަލަ ކަމަށް ނިއުޝާ ވިދާޅުވެފައިވެއެވެ.
"މާދަމާގެ މަޖިލީހުގެ ޖަލްސާއަށް ވެސް މި ގަރާރު އަލުން އެޖެންޑާކޮށް، އެ ޖަލްސާގެ ރިޔާސަތު ބެލެހެއްޓެވުމަށް މަޖިލީހުގެ ނައިބުރައީސަށް ދަންނަވާނެކަން އިއްޒަތްތެރި މެމްބަރުންނަށް ދަންނަވަން،" މެންބަރުންނާއި މުޚާތަބުކުރައްވަމުން ނިއުޝާ ވިދާޅުވި އެވެ.
އީވާ ފޮނުއްވި ސިޓީގައި، މަޖިލީހުގެ ގަވާއިދުގެ 246 ވަނަ މާއްދާގެ ދަށުން ސަލާމް ފޮނުއްވާފައިވާއިރު މެޑިކަލް ސެޓްފިކެޓާއި ބްލަޑް ރިޕޯޓްތައްވެސް ފޮނުއްވާފައިވާކަމަށްވެއެވެ. އަދި އެ ލިޔުންތައް މަޖިލީގެ މެޖޯރިޓީ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމާއި މައިނޯރިޓީ ލީޑަރު މެދު ހެންވޭރު ދާއިރާގެ މެމްބަރު އަލީ އާޒިމާ ހިއްސާކޮށްދެއްވުމަށްވެސް އީވާ އެދިވަޑައިގެންފައިވެއެވެ.
