މިނިސްޓްރީން ކުރި ޚަރަދުތަކަކީ ވައްކަމެއް ނޫން، މަސައްކަތް ކުރީ އިޚުލާސްތެރި ކަމާއެކު: އަމީން

ކޮވިޑް-19 އާއި ގުޅިގެން ހެލްތު މިނިސްޓްރީން ކުރި ޚަރަދުތަކަކީ ވައްކަމެއް ނޫން ކަމަށާއި އެމިނިސްޓްރީގެ ހުރިހާ މުވައްޒަފުން ވެސް މަސައްކަތް ކުރީ އިޚުލާސްތެރިކަމާއެކު ކަމަށް ހެލްތު މިނިސްޓަރުކަމުން މިވަގުތު އަމިއްލަފުޅަށް އެކަހެރިވެގެން ހުންނެވި އަބްދުﷲ އަމީން ވިދާޅުވެއްޖެއެވެ.

Ads by Sosun Fihaara

ކޮވިޑާއި ގުޅިގެން ކޮށްފައިވާ ޚަރަދުތައް ހޯދުމަށް އޮޑިޓު ރިޕޯޓެއް އެކުލަވާލާފައިވާއިރު، ހެލްތު މިނިސްޓްރީން ޚިޔާނާތްތެރިވިކަމަށް ތުހުމަތުވާފަދަ ކަންތައްތަކެއް ވަނީ އެރިޕޯޓުން ހާމަވެފައެވެ.

އޮޑިޓު ރިޕޯޓާއި ގުޅިގެން މިއަދު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހެލްތު މިނިސްޓްރީގެ އިސްވެރިން ވަނީ ހާޒިރު ކޮށްފައެވެ.

އެކޮމިޓީގެ ބައްދަލުވުމުގައި މިނިސްޓަރ އަމީން ވިދާޅުވީ އޭނާ އަށް ގަބޫލު ކުރެވޭ ގޮތުގައި އެނިސްޓްރީން މަސައްކަތް ކޮށްފައިވަނީ ވައްކަން ކުރުމުގެ ނިޔަތުގައި ނޫން ކަމަށާއި މަސައްކަތް ކޮށްފައި ވަނީ އޭރު ޤައުމަށް ދިމާވެފައިވާ ނުރައްކާތެރި ހާލަތުން އަރައިގަތުމަށް ކުރަން ޖެހުނު ކަންތައްތަކެއް ކުރުމަށް ކަމަށެވެ.

"އަޅުގަނޑަށް ލިބިފައި ހުރި މައުލޫމާތުތަކަށް ބަލާއިރު މިނިސްޓްރީގެ މުވައްޒަފުން މަސައްކަތް ކޮށްފައި ވަނީ، ނާޖާއިޒު ފައިދާ ހޯދުމަށާއި ކޮޮރަޕްޝަނަށް މަގުފަހިވުމަށާ އަދި ވައްކަމުގެ ކަމެއް ކުރުމަށް ނޫން ކަމަށް އަޅުގަނޑަށް ބްރީފްވެފައިވޭ. އެހެންވީމަ އަޅުގަނޑު ގަބޫލެއް ނުކުރަން އެބޭފުޅުން މަސައްކަތްކޮށްފައި ވަނީ ނާޖާއިޒް ފައިދާއެއް ހޯދުމަށް އަދި މިފަދަ ނިޔަތެއް އޮވެގެން ކަމަށް،" އަމީން ވިދާޅުވި އެވެ.

ހެލްތު މިނިސްޓްރީ އަށް ދިމާވެފައިވާ ކޮރަޕްޝަންގެ ތުހުމަތުތަކާއި ގުޅޭގޮތުން ފުރަތަމަ ފަހަރަށް ވާހަކަ ދައްކަވަމުން އަމީން ވިދާޅުވީ، އެފަދަ ނިޔަތެއް ނެތް ނަމަވެސް އޭރުގެ ހާލަތަށް ބަލައި ބައެއް އިޖުރާއަތްތައް މުޅިން ރަނގަޅަށް ފުރިހަމަކޮށްފައި ހުރި ކަމަށް ދަންނަވަން މިހާރު ދަތި ކަމަށެވެ.

"މިކަން ކުރުމުގެ ތެރޭގައި އިދާރީ ގޮތުންނާއި އިިޖުރާއީ ގޮތުން މައްސަލަތަކެއް ނުުހުންނާނެއޭ ބުނަން އަޅުގަނޑަށް ކަށަވަރެއް ނޫން،" މިނިސްޓަރ އަމީން ވިދާޅުވި އެވެ.

އޮޑިޓާ ޖެނެރަލް ޙަސަން ޒިޔަތު ސޮއި ކުރައްވާ އާއްމު ކުރެއްވި ހެލްތު މިނިސްޓްރީގެ ކޮވިޑް-19 ކޮމްޕްލަޔަންސް އޮޑިޓުން، ކޮރަޕްޝަނަށް ތުހުމަތުވާ ގޮތަށް އެންމެ ބޮޑު ކަމެއްގެ ގޮތުގައި ފާހަގަ ކޮށްފައިވަނީ ކޮވިޑް ޖެހިގެން ހާލު ސީރިއަސްވާ މީހުންނަށް ފަރުވާ ދިނުމުގެ ގޮތުން ރާއްޖެ ގެނައުމަށް މަސައްކަތްކުރި ވެންޓިލޭޓަރުތަކުގެ މައްސަލައެވެ.

ތިން ކުންފުންޏަކާއި އެމަސައްކަތް ހަވާލު ކޮށްފައިވާއިރު އެންމެ ބޮޑަށް އޮޅުވާލާފައި ވަނީ ދުބާއީ ކުންފުންޏަކާ ހަވާލުކޮށްގެން 75 ވެންޓިލޭޓަރު ގަތުމުގައި ހިންގި މުއާމަލާތް ކަމަށް އޮޑިޓް ރިޕޯޓުގައި ބަޔާން ކޮށްފައި ވެއެވެ. ދުބާއީ ވެންޓިލޭޓަރުތައް ގެންނަން ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ހެލްތު މިނިސްޓްރީން ބުނެފައި ވީ ނަމަވެސް އޮޑިޓް ރިޕޯޓުގައި އެކަން ދޮގު ކޮށްފައި ވެއެވެ.

އެވާހަކަތަކަށް ޖަވާބު ދެއްވައި އަމީން ވިދާޅުވީ، އެންމެ ފުރަތަމަ ވެންޓިލޭޓަރު ގެނައުމަށް ދިވެހި ދެ ކުންފުންޏަކާ ހަވާކުރި ނަމަވެސް، އެ ކުންފުނިތަކަށް ވެސް އެ ވެންޓިލޭޓަރުތައް ނުގެނެވިގެން ސަރުކާރުގެ އަމާޒަކަށްވީ ވީހާ ވެސް އަވަހަކަށް ވެންޓިލޭޓަރުތައް ގެނައުން ކަމަށެވެ. އެގޮތުން އެތަށް ފުރާނައެއް ގެއްލުމުގެ ބިރު ހީވެފައި އޮތުމުން ވީހާ ވެސް އަވަހަކަށް ވެންޓިލޭޓަރު ހޯދުމަށް މިނިސްޓްރީން މަސައްކަތް ފެށި ކަމަށް އޭނާ ވިދާޅުވި އެވެ.