ހައިކޯޓުގެ ފަނޑިޔާރުކަމަށް ކުރިމަތިލުމަށް ހުޅުވާލައިފި
ދިވެހިރާއްޖޭގެ ހައިކޯޓުގެ ފަނޑިޔާރުކަމަށް ކުރިމަތިލުމުގެ ފުރުޞަތު ޖުޑީޝަލް ސާވިސް ކޮމިޝަން (ޖޭއެސްސީ) އިން ހުޅުވާލައިފިއެވެ.
ޖޭއެސްސީއިން ކުރި އިޢުލާނުގައިވާގޮތުން ފަނޑިޔާރުކަމަށް ހުށަހެޅުމުގެ ފުރުޞަތު މިމަހުގެ 12 ވަނަ ދުވަހުގެ ރޭގަނޑު 11:00 އަށް އޮންނާނެއެވެ.
މި މަޤާމަށް ކުރިމަތިލެވޭނީ އެ ކޮމިޝަނުގެ ފަހިރެސް ޕޯޓަލް މެދުވެރިކޮށެވެ.
ހައިކޯޓުގެ ފަނޑިޔާރެއްގެ މަޤާމަށް އިޢުލާނުކޮށްފައި މިވަނީ، ސިއްޙީ ސަބަބުތަކާހުރެ، އެ ކޯޓުގެ ފަނޑިޔާރު އަޙްމަދު ޝަކީލް ރިޓަޔަކުރައްވަން ޖޭއެސްސީއިން ނިންމުމާއި ގުޅިގެންނެވެ. ފަނޑިޔާރު ޝަކީލު ގެންދަވަނީ ހިތުގެ ބައްޔެއްކަމަށްވާ ސިކް ސައިނަސް ސިންޑްރޯމަށް ފަރުވާ ކުރައްވަމުންކަމަށާއި، އެ ބަލީގައި މިހާރު ދެ ފަހަރެއްގެ މަތިން ޕޭސް މޭކަރުވެސް ލައްވައިފައިވާކަމަށް ޖޭއެސްސީން ވަނީ ބުނެފައެވެ.
މީގެ އިތުރުންވެސް މިދިޔަ އޮކްޓޫބަރު މަހު 30 ވަނަ ދުވަހު ހައިކޯޓުގެ އިސް ފަނޑިޔާރުކަމަށް، އެ ކޯޓުގެ ފަނޑިޔާރު އަލްއުސްތާޛު ޙުސައިން ޝަހީދު ވަނީ އައްޔަންކޮށްފައެވެ.
