މަޖިލީހުގެ ނިޒާމުގެ ތެރެއިން ރައީސް ނަޝީދުގެ މައްސަލަ ނިންމާލެވިދާނެގޮތްތަކެއް އަމީން އާންމު ވިދާޅުވެދެއްވައިފި
ރައްޔިތުންގެ މަޖިލީހުގެ ނިޒާމުގެ ތެރެއިން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ނިންމާލެވިދާނެގޮތްތަކެއް މަޖިލީހުގެ އަމީން އާންމު ފާތިމަތު ނިއުޝާ ވިދާޅުވެދެއްވައިފިއެވެ.
ސުޕްރީމް ކޯޓުގައި މިއަދު ކުރިއަށް ގެންދިޔަ ރައީސް ނަޝީދުގެ ދުސްތޫރީ މައްސަލައިގެ އަޑުއެހުމުގައި އެ މައްސަލައަކީ ސުޕްރީމް ކޯޓަށް ހުށަހަޅައިގެން ހައްލު ހޯދަން ޖެހޭ ވަރުގެ ކަމެއް ނޫން ކަމަށާއި އެއީ މަޖިލީހުގެ ތެރެއިން ހައްލު ހޯދެން އޮތް މައްސަލައެއް ކަމަށް، އެ މައްސަލައަށް ތަދައްހުލްވެފައިވާ، 'ދަ ޑިމޮކްރެޓްސް'ގެ ފަރާތުންވެސް ތަކުރާރުކޮށް ދިޔައީ ވިދާޅުވަމުންނެވެ.
އަދި އެ މައްސަލައިގެ ތެރެއަށް ސުޕްރީމް ކޯޓުން ވަންނަން ޖެހޭ ހާލަތެއް ނެތްކަން ފާހަގަކުރައްވާތީ ފަނޑިޔާރުން އެކަމާއި ގުޅޭގޮތުން ކުރެއްވި ސުވާލުތަކަށް ދައުލަތުންނާއި އެމްޑީޕީ އަދި ޕީޕީއެމް/ޕީއެންސީގެ ފަރާތުން ދެއްކި ވާހަކަތަކަށް ފަހު، އަމީން އާންމުގެ ހައިސިއްޔަތުން ނިއުޝާ ވަނީ ޝަރީޢަތުގައި ކަމެއް ފާހަގަކުރަައްވަން ބޭނުންފުޅުވާ ކަމަށް ވިދާޅުވެ، ފުރުސަތަކަށް އެދިވަޑައިގަތެވެ.
އަމީން އާންމު ނިއުޝާއަށް ފުރުޞަތު ދެއްވުމުން އެކަމަނާ ވިދާޅުވީ، ޖަލްސާގައި އިތުރު މަސައްކަތެއް ނުކުރެވޭނެ ކަމަށް ގަވާއިދުގައި ބުނަނީ ޖަލްސާއަށް އެ މައްސަލަ ހުށަހެޅުން ކަމަށާއި މައްސަލަ ހުށަހެޅުން ކަމަށް ބަލަނީ މަޖިލީހުގެ ޤާނޫނީ ޖަލްސާއަކަށް އެ މައްސަލައެއް ހުށަހެޅުމުން ކަމަށެވެ.
އެހެންނަމަވެސް އެ މައްސަލައަކީ ޖަލްސާއަކަށް ހުށަހަޅާފައި އަދި ނުވާ މައްސަލައެއް ކަމަށާއި މަޖިލީހުގެ އާންމު ޖަލްސާތައް ބޭއްވުމާއި އެހެން މަސައްކަތައް ކުރުމަށް އެއްވެސް ހުރަހެއް އަދި ނެތް ކަމަށް އެބޭފުޅާ ވިދާޅުވި އެވެ.
މީގެ އިތުރުން، މިހާރު ކޯޓުގައި ހިނގަމުންދާ މައްސަލައަކީ ރައްޔިތުންގެ މަޖިލީހުގެ ނިޒާމުގެ ތެރެއިން ހައްލު ކުރެވެން އޮތް މައްސަލައެއްކަން ފާހަގަކުރައްވަމުން ނިއުޝާ ވަނީ އެ މައްސަލަ މަޖިލީހުގެ ތެރެއިން ހައްލުކުރެވެން އޮތް ހަތަރު ގޮތެއް ވިދާޅުވެދެއްވާފައެވެ.
މަޖިލީހުގެ ތެރެއިން ރައީސް ނަޝީދުގެ މައްސަލަ ހައްލުކުރެވިދާނެކަމަށް ނިއުޝާ ވިދާޅުވި 4 ގޮތް
- މަޖިލީހުގެ ގަވާއިދުގެ 108 ވަނަ މާއްދާގެ (ށ) ދަށުން މަޖިލީހުގެ އާންމު ކޮމިޓީގެ އަމިއްލަ އިސްނެންގެވުމުގެ މަތިން ގަވާއިދަށް ގެންނަ އިސްލާހެއް ނިންމައި މަޖިލީހުގެ ތަޅުމަށް ހުށަހެޅުން.
-
މަޖިލީހުގެ ގަވާއިދުގެ 167 ވަނަ މާއްދާގެ ދަށުން މަޖިލީހުގެ ހިންގުމުގެ އުސޫލަށް ބަދަލު ގެނައުމަށް އާންމު މެމްބަރަކު ގަރާރެއް ހުށަހެޅުން.
- މަޖިލީހުގެ ގަވާއިދުގެ 249 މާއްދާގެ (ށ)ގެ ދަށުން ގަވާއިދަށް ގެންނަން ފެންނަ އިސްލާހު މައްސަލައެއްގެ ގޮތުގައި ހުށަހެޅުން؛ މިހާރު ވެސް އެފަދަ މައްސަލައެއް އޮތްކަމާއި އެ މައްސަލަ އެޖެންޑާކުރަން އަންގާފައިވުން.
- ގަވާއިދުގެ 205 މާއްދާގައި މިހާލަތުގައި އަމަލުކުރާނެ ގޮތެއް ނެތަތީ، އެކަމާ މެދު އަމަލުކުރާނެ ގޮތަކާ މެދު ރައްޔިތުންގެ މަޖިލީހުން ގޮތެއް ނިންމުން.
އެމްޑީޕީން ސުޕްރީމް ކޯޓަށް ހުށަހެޅި ރައީސް ނަޝީދުގެ މައްސަލައިގައި އެ ކޯޓުގައި މި މައްސަލަ ބައްލަވާފައިވަނީ ފަނޑިޔާރު އަލްއުސްތާޛް މަޙާޒު ޢަލީ ޒާހިރު، ފަނޑިޔާރު ޑރ. އަޒްމިރާލްދާ ޒާހިރު، ފަނޑިޔާރު އަލްއުސްތާޛް ޙުސްނުއްސުޢޫދު، ފަނޑިޔާރު އަލްއުސްތާޛް ޢަލީ ރަޝީދު ޙުސައިން، ފަނޑިޔާރު ޑރ. މުޙައްމަދު އިބްރާހީމްއެވެ. މައްސަލައިގެ ރިޔާސަތުގައި އިންނެވީ ފަނޑިޔާރު މަހާޒްއެވެ.
މިމައްސަލައިގައި މިއަދު ބޭއްވި ދެވަނަ އަޑުއެހުމުގައި ވަކާލާތު ކުރަން ބޭނުންވި ހުރިހާ ފަރާތްތަކަކުން ވަކާލާތުކޮށް ފަހުބަސް ވިދާޅުވުމަށް ފުރުސަތު ދިނުމަށްފަހު ގާޒީ މަހާޒް ވަނީ މިމައްސަލައިގެ އަޑުއެހުންތައް ނިމުނީ ކަމަށް އިއުލާންކުރައްވާފައެވެ.
