ފްލެޓް ލިބޭ މީހުންގެ ލިސްޓުގައި ޝަރުތު ހަމަނުވާ މީހުން ހިމަނާފައިވާ ނަމަ ފިޔަވަޅު އަޅާނަން: ފިރުޒުލް
ގެދޮރުވެރިޔާ ސްކީމްގެ ދަށުން 4،000 ފްލެޓް ލިބޭ މީހުންގެ ލިސްޓުގައި ޝަރުތު ހަމަނުވާ މީހުން އުސޫލުން ބޭރުން ހިމަނާފައިވާ ނަމަ، އެކަމުގައި ޝާމިލްވާ މީހުންގެ މައްސަލަތައް ބަލައި، ފިޔަވަޅު އަޅާނެ ކަމަށް އިންތިހާބީ ރައީސްގެ އޮފީހުން ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވީ، ނުޙައްޤުން، ނުޤަވާއިދުން އަދި އުސޫލުން ބޭރުން ފްލެޓުތައް ދީފައިވާނަމަ، އެކަންކަން ބަލާނެ ކަމަށެވެ.
“އެހެން ވެސް ކަންތައްތައް ހުރި ކަމަށްވާ ނަމަ، ފިޔަވަޅު އެޅުމުގެ ފުރުސަތު އޮންނާނެ ވާހަކަ ދަންނަވާލަން” ފިރުޒުލް ވިދާޅުވިއެވެ.
ފިރުޒުލް ވިދާޅުވީ ނާއިންސާފުގެ ކުރިމަތީގައި ނާއިންސާފުން ކަންކަން ކުރިއަށް ދާއިރު އެކަމުގައި އެއްވެސް ފިޔަވަޅެއް ނާޅާ ހުރުމަކީ އެންމެ އަދުލުވެރި ގޮތް ނޫން ކަމަށް އިންތިހާބީ ރައީސް ޑރ. މުޙައްމަދު މުޢިއްޒު ދެކެވަޑައިގަންނަވާ ކަމަށެވެ.
ގެދޮރުވެރިޔާ ސްކީމްގެ ދަށުން ފްލެޓަށް އެދި ހުށަހަޅާފައިވާ މީހުންގެ ޝަރުތު ހަމަވާ އެންމެންނަށް ފްލެޓް ދޭން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވަނީ ނިންމަވާފައެވެ.
ގެދޮރުވެރިޔާ ސްކީމްގެ ދަށުން ފްލެޓަށް އެދި 20،000ށްވުރެ ގިނަ މީހުން ފޯމު ހުށަހެޅިއިރު، އޭގެ ތެރެއިން 13،000ށްވުރެ ގިނަ މީހުންގެ ޝަރުތު ހަމަވެއެވެ.
