އުޝާމް ވިދާޅުވީ ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ އެއްވެސް ހާލަތެއް ނެތް ކަމަށް
މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ އެއްވެސް ހާލަތެއް ނެތް ކަމަށް ވިލިމާލޭ ދާއިރާގެ މެންބަރު އަހުމަދު އުޝާމް ވިދާޅުވެއްޖެއެވެ.
އުޝާމް މިފަދައިން ވިދާޅުވީ މިއަދުގެ މަޖިލިސް ޖަލްސާގައި ދަ ޑިމިކޮކްރެޓްސްގެ ފަރާތުން އެ ޕާޓީގެ ލީޑަރު އަލީ އާޒިމް ނިޒާމީ މައްސަލައެއް ނަންގަވައި މަޖިލީހަށް ހުށަހަޅާފައިވަނީ ގަރާރެއްތޯ ނުވަތަ ބިލެއްތޯ ނުވަތަ ކުއްލި މައްސަލައެއްތޯ ސާފު ކުރުމަށް އެންގުމާއި ގުޅިގެންނެވެ.
އުޝާމް ވިދާޅުވީ މަޖިލީހުގެ ޤަވާއިދާއި އެއްގޮތަށް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމާއި މެދުގައި ސުވާލު އުފައްދާ ނިޒާމީ މައްސަލަތައް ނަންގަވަމުންދާ އިރު މަޖިލީހަށް ހުށަހަޅާ ޤަރާރުތަކުގެ ވާހަކަ ޤާނޫނު އަސާސީގައި ދެ ހާލަތެއްގައި ބަޔާންކޮށްފައިވާ ކަމަށެވެ.
އުޝާމް ވިދާޅުވީ ގަރާރެއްގެ ވާހަކަ ޤާނޫން އަސާސީގައި އައިސްފައިވަނީ ދެ ހާލަތެއްގެ މައްޗަށްކަމަށެވެ. އަދި މި ދެ ހާލަތުގެ ތެރެއިން އެއް ހާލަތެއްކަމަށް ޤާނޫން އަސާސީގެ 82 ވަނަ މާއްދާގެ (ބ) ބުނަނީ ރައްޔިތުންގެ މަޖިލީގުގެ ރައީސް އަދި ނަިބު ރައީސްގެ އިތުބާރު ނެތްކަމުގެ މައްސަލަ ކުރިއަށްގެންދިއުމަށް ހުށަހަޅާ ގަރާރުގެ ވާހަކަ އައިސްފައިވާއިރު، ޤާނޫން އަސާސީގެ 105 ވަނަ މާއްދާގައި ބުނަނީ ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބުން މަޤާމުން ވަކި ކުރެވޭނެ ގޮތުގެ ވާހަކަ ބަޔާން ކުރާ ގަވައިދެއް ބަޔާންކޮށްފައިވެއެވެ.
އަދި މަޖިލީހުގެ ރައީސްގެ މައްޗަށް ހުށަހަޅާ އިތުބާރު ނެތްކަމުގެ މައްސަލައާ މެދު އެގޮތަށް ޢަމަލުކުރާ ނަމަ، ފުރަތަމަ ކިޔުން އިއްވަން ޖެހޭނެ ކަމަށާއި އެއަށް ފަހު ބަހުސްކޮށް، ކޮމިޓީ މަރުހަލާ ނިންމާ، ކޮމިޓީގެ ރިޕޯޓް ހުށަހަޅައިގެން ނޫނީ އެފަދަ މައްސަލަތައް ކުރިއަށް ނުގެންދެވޭނެކަމަށް ވެސް އުޝާމް ވިދާޅުވިއެވެ.
