ނާޒުކު ފައްތަރެއްގައި ނިންމުނު ނިންމުންތަކެއްގެ ސަބަބުން ޤައުމު ސަލާމަތް ކުރެވިއްޖެ: ޢަބްދުއްރަޙީމް
ވަރަށް ނާޒުކު ޙާލަތެއްގައި ނިންމެވުނު ނިންމުންތަކެއްގެ ސަބަބުން، ޤައުމު ސަލާމަތް ކުރެވިއްޖެ ކަމަށް އިންތިޤާލީ އޮފީހުގެ ވެރިޔާ، އަދި ޕީއެންސީގެ ޗެއާޕާސަން ޢަބްދުއްރަޙީމް ވިދާޅުވެއްޖެއެވެ.
އޮންލައިން ނޫސް "ދައުރު"އަށް ޢަބްދުއްރަޙީމް ވިދާޅުވީ، އިންތިޤާލީ އޮފީހުގެ ވެރިޔެއްގެ ގޮތުގައި މަސައްކަތް ކުރެއްވުމަށް ފުރުސަތު ލިބި، އެކަން ކުރެއްވުމަކީ، ސިޔާސީ މައިދާނުގައި އޭނާ ފަދަ ބޭފުޅަކަށް ލިބިވަޑައިގެންނެވި ވަރަށް ބޮޑު ކާމިޔާބީއެއް ކަމަށެވެ.
"އެންމެ ބޮޑަށް އަޅުގަނޑު ޤަބޫލު ކުރަނީ ވަރަށް ނާޒުކު ފައްތަރަކަށް ޤައުމު ދިޔަ ވަގުތެއްގައި، އަޅުގަނޑަށް ނިންމުނު ނިންމުންތަކެއްގެ ސަބަބުން، މިއަދު ވަރަށް ބޮޑު ކަމަކުން ޤައުމު ސަލާމަތް ކުރެވިއްޖެ."
ޢަބްދުއްރަޙީމް އެ އިޝާރާާތް ކުރެއްވީ، މިދިޔަ ސެޕްޓެމްބަރު މަހު ބޭއްވި ރިޔާސީ އިންތިޚާބު ބޮއިކޮޓް ކުރަން އޭރު ޖަލުގަައި ހުންނަވައިގެން، އިދިކޮޅު ލީޑަރު އަދި ޕީޕީއެމްގެ ރައީސް ޔާމީން ޢަބްދުލްޤައްޔޫމް އެންގެވި އެންގެވުމާ ޚިލާފަށް ޢަމަލު ކުރަން ބާރު އެޅުއްވުން ކަމަށް ބެލެވެއެވެ.
އިދިކޮޅަށް އޮތް ތާއީދު އިތުރުވެފައިވާ ދަނޑިވަޅެއްގައި ރިޔާސީ އިންތިޚާބު ބޮއިކޮޓް ކުރުމުގެ ބަދަލުގައި ޕީޕީއެމް/ޕީއެންސީން ރިޔާސީ ކެންޑިޑޭޓަކު ނެރެގެން ކުރިއަށް ދާން ނިންމެވީ ސީދާ އަބްދުއްރަޙީމް އެކަމަށް ވަރަށް ބޮޑަށް ވަކާލާތު ކުރައްވައިގެންނެވެ. ނަމަވެސް ފަހުން ރައީސް ޔާމީން ވަނީ، ޕީއެންސީގެ ރިޔާސީ ކެންޑިޑޭޓްގެ ގޮތުގައި ނުކުމެވަޑައިގެންނެވި، ޑރ.މުޙައްމަދު މުޢިއްޒުއާއިއެކުގައި ކުރިއަށް ވަޑައިގަތުމަށް އަންގަވައިފައެވެ.
Ads by STO
