މުޢިއްޒުގެ ފުރަތަމަ 100 ދުވަސް: ނިމިދިޔަ ސަރުކާރުގެ އެއްބަސްވުންތައް އިސްލާކުރަން ފަށާނެ
އިންތިޚާބީ ރައީސް ޑރ.މުޙައްމަދު މުޢިއްޒުގެ ވެރިކަމުގެ އެންމެ ފުރަތަމަ 100 ދުވަހުގެ ތެރޭގައި ނިމިދިޔަ ސަރުކާރުގެ އެއްބަސްވުންތައް އިސްލާހުކުރުމަށް ހިމަނައިފިއެވެ.
ދަރުބާރުގޭގައި ރޭ ބޭއްވި ހާއްސަ ރަސްމިއްޔާތެއްގައި "ހަފްތާ 14″ ނަމުގައި މަގު ޗާޓް އިފްތިތާހް ކުރެއްވީ އިންތިހާބީ ރައީސް މުއިއްޒެވެ. އެ މަގު ޗާޓުގައި 161 ވައުދު ފުރިހަމަކުރުމަށް ހިމެނެއެވެ. އެ ޗާޓުގެ މަސައްކަތް ބަހާލާފައިވަނީ އަށް ދާއިރާއަކަށެވެ.
އެ ދާއިރާތަކުގެ ތެރޭގައި ހިމެނެނީ މިނިވަންކަމާއި ސިޔާދަތު, އިސްލާމް ދީނާއި ގައުމިއްޔަތު
ގެދޮރުވެރިކަމާއި އުމްރާނީ ތަރައްގީ, އިގްތިސާދާއި ތިމާވެށި އަންހެނުން، ޒުވާނުން، ފަންނިއްޔާތު އަދި ކުޅިވަރު, ސިއްހީ ދުޅަހެޔޮކަމާއި އޯގާތެރި މުޖުތަމައު, ތައުލީމާއި ތަމްރީނު އަދި ސަރުކާރުގެ ސިޔާސަތާއި ގާނޫނީ އިސްލާހެވެ.
އިންތިޚާބީ ސަރުކާރުގެ ފުރަތަމަ 4 ހަފްތާގެ ތެރޭގައި ނިމިިދިޔަ ސަރުކާރުން އެެހެން ޤައުމުތަކާއެކު ވެފައިވާ އެއްބަސްވުންތަކުގައި ދިވެހިރާއްޖޭގެ ސިޔާދަތާއި މިނިވަންކަމަށް ނުރައްކާވާގޮތަށް ހުރި ނުކުތާތައް އުވާލުމުގެ މަސައްކަތް ފަށާނެއެވެ. މި މަސައްކަތް ކުރަން ހަމަޖެހިފައިވަނީ މިނިވަންކަމާއި ސިޔާދަތުގެ ދާއިރާގެ ދަށުންނެވެ.
މި ޙަފްލާގައި ވާހަކަފުޅުދައްކަވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ، ވައުދުތައް ފުއްދެވުމުގެ މަސައްކަތް ފުރަތަމަ ދުވަހުން ފެށިގެން ފަށްޓަވާނެކަމުގެ ޔަޤީންކަން ދެއްވާ ކަމަށެވެ. އަދި ރެއާއި ދުވާލު ކުރައްވާނެ މަސައްކަތަކީ ނަތީޖާ ނެރެދިނުންކަމަށާއި، އެކަންކަން ރައްޔިތުންގެ ލޯމަތިން ފެނިގެންދާނެކަމަށް އިންތިޚާބީ ރައީސް ވިދާޅުވިއެވެ.
