އަނުޝްކާ އާއި ވިރާތު އަށް ދަރިއަކު ލިބެނީ
ބޮލީވުޑްގެ އެކްޓްރެސް އަނުޝްކާ ޝަރްމާ އާއި އޭނަގެ ފިރިމީހާ ވިރާތު ކޯލީ އަށް ދަރިއަކު ލިބެން އެބައުޅެއެވެ.
އިންޑިއަން ކްރިކެޓް ޓީމުގެ ކެޕްޓަން ވިރާތު ވަނީ އަނުޝްކާ އާއެކު ނަގާފައިވާ ފޮޓޯއަކާއިއެކު އިންސްޓަގްރާމް މެދުވެރިކޮށް މިޚަބަރު އާއްމުންނާއި ޙިއްސާ ކޮށްފައެވެ.
އަނުޝްކާ އިނީ ބަލިވެކަން، އެފޮޓޯއިން ހާމަވާއިރު، އެދެމަފިރުންގެ މޫނުމަތިން ވެސް ފެންނަނީ ހިނިތުންވުމާއި އުޖާލާ ކަމެވެ. ފޮޓޯގެ ކެޕްޝަންގައި ވިރާތު ލިޔެފައިވަނީ އެދެމަފިރިން ތިން މެންބަރުންގެ އާއިލާއަކަށް ވަނީ ކަމަށާއި ދަރިފުޅު އުފަންވަނީ އަންނަ އަހަރުގެ ޖަނަވަރީ މަހުގައި ކަމަށެވެ.
އަނުޝްކާ އާއި ވިރާތު ކައިވެނި ކުރީ 2017 ވަނަ އަހަރުގެ ޑިސެމްބަރު މަހުގެ 11 ވަނަ ދުވަހު، އިޓަލީގެ ޓަސްކަނީ ގައެވެ.
މިދެމަފިރިން ކައިވެނި ކުރި ފަހުން، އަނުޝްކާ ބަލިވެއިން ކަމަށް އެމީހުންގެ ފޭނުން ވަނީ ކުރިން ވަރަށް ގިނައިން އަޑު ފަތުރާފައެވެ. ނަމަވެސް އެދެމަފިރިންވެސް ކުރިން ވަނީ އެވާހަކަތަށް ދޮގު ކޮށްފައެވެ.
ކޮވިޑާއި ގުޅިގެން އިންޑިއާ ފުރަބަންދު ކުރުމުން، އެދުވަސްކޮޅު އަނުޝްކާ ވަނީ އޭނާގެ ފޭނުންނަށް އޭނާއާއި ސުވާލު ކުރެވޭނެހެން އިންސްޓަގްރާމް ސްޓޯރީ ގައި "އާސްކް މީ އެނީތިންގް" (ބޭނުން ސުވާލެއް ކޮށްލާ) ހަދާފައެވެ. އަނުޝްކާ އިނީ ބަލިވެތޯ މީހަކު އޭގައި ކުރި ސުވާލަކަށް އޭނާ ބުނީ އެކަމެއް ވާންވީ ވަގުތު ޖެހުމުން ވާނެ ކަމަށެވެ. އަނުޝްކާ ގެ އެޖަވާބުން އެއިރު ވެސް އޭނާ އިނީ ބަލިވެކަން މީހުންނަށް ނޭނގުނު ނަމަވެސް، މިއަދު އެދެމަފިރިން ވަނީ އެއުފާވެރި ޚަބަރު ރަސްމީކޮށް އަންގާފައެވެ.
މަރުހަބާ