އިންސާނީ ޙައްޤުތައް ރައްކާތެރި ކުރުމާ ގުޅޭގޮތުން ރާއްޖެއިން ވަޢުދުވާ ކަންކަން ހިމެނޭ ބަޔާން އިއްވަވައިފި
ހިއުމަން ރައިޓްސް 75 ފާހަގަކުރުމަށްޓަކައި ބާއްވާ މަތީ ފަންތީގެ ހަރަކާތްތަކުގެ ތެރޭގައި ހިމެނޭ "ޕްލެޖިންގ ޓްރީ ސެޝަން"ގައި، އިންސާނީ ޙައްޤުތައް ރައްކާތެރި ކުރުމާ ގުޅޭގޮތުން ދިވެހިރާއްޖެއިން ވަޢުދުވާ ކަންކަން ހިމެނޭ ބަޔާން ނައިބު ރައީސް އަލްއުސްތާޛު ހުސައިން މުހައްމަދު ލަތީފް އިއްވަވައިފިއެވެ.
ސްވިޒަރލެންޑްގެ ޖެނީވާގައި މިއަދު ބޭއްވި މި ހަރަކާތުގައި ރާއްޖެއިން ވަނީ 5 ކަމަކަށް ވަޢުދުވެފައެވެ.
ނައިބު ރައީސްގެ ވާހަކަފުޅުގައި، ރާއްޖޭގައި އިންސާނީ ޙައްޤުތައް ނެގެހެއްޓުމުގެ ސަގާފަތް އާލާކުރުމަށްޓަކައި މި ދާއިރާއިން މީހުން ބިނާކުރުމަށް މިހާރުގެ ސަރުކާރުން ދޭ އަހަންމިއްޔަތުކަން ފާހަގަކުރެއްވިއެވެ.
އިންސާނީ ހައްޤުތަކާ ގުޅޭގޮތުން އެކުލަވާލާފައިވާ ދިވެހިރާއްޖޭގެ އޮނިގަނޑުތައް ބައިނަލްއަޤްވާމީ މިންގަނޑުތަކާ އެއްގޮތަށް ދެމެހެއްޓުމަށާއި، ބައިނަލްއަޤްވާމީ މުޢާހަދާތަކަށް އަމަލުކުރާ ގޮތާމެދު މައުލޫމާތު ދިނުމުގެ ނިޒާމު އިތުރަށް ހަރުދަނާ ކުރުމަށާއި، އިންސާނީ ޙައްޤުތައް ނެގެހެއްޓުމަށް އުފައްދާފައިވާ ބައިނަލްއަޤްވާމީ އެކިއެކި ނިޒާމުތަކާއެކު އިތުރަށް ގުޅުން ބަދަހި ކުރުމަށް މިހާރުގެ ސަރުކާރުން ކެނޑިނޭޅި މަސައްކަތް ކުރައްވަމުން ގެންދަވާނެ ކަމަށް ދިވެހިރާއްޖޭގެ ފަރާތުން ވަޢުދު ވެވަޑައިގެންފައި ވެއެވެ.
މީގެ އިތުރުން، މުޖުތަމަޢުގައި ފަރުދީގޮތުން އަދާކުރާ ދައުރާއި ސިޔާސީ މައިދާނުގައި ހަރަކާތްތެރި ވުމުގައި އަންހެނުންނާއި އަންހެން ކުދިންނަށް ހަމަހަމަ ފުރުސަތުތަކެއް ފަހިކޮށްދިނުމަށް ރާއްޖެއިން ވަޢުދުވާކަމަށް ނައިބު ރައީސް ބަޔާންކުރެއްވިއެވެ.
އަދި އެއްވެސް ކުއްޖެއް ބާކީނުކޮށް ހަމަހަމަ ގޮތެއްގައި ތަޢުލީމު ހޯދުމަށް މަގުފަހިކޮށްދިނުމަށާއި ކުޑަކުދިންގެ ރައްކާތެރިކަމަށް ޤައުމީ ފެންވަރުގައި އެކަށައަޅާފައިވާ ނިޒާމުތައް އިތުރަށް ހަރުދަނާ ކުރުމަށްވެސް ރާއްޖެއިން ވަޢުދުވާކަމުގައި އެ މަނިކުފާނު ވިދާޅުވިއެވެ.
އެންމެފަހު ވަޢުދެއްގެ ގޮތުން މޫސުމަށް އަންނަ ބަދަލުތަކާއި ދިވެހިންގެ އިންސާނީ ޙައްޤުތަކާ ގުޅިލާމެހިފައިވާކަން ފާހަގަކުރައްވައި، ދިވެހިންގެ ދިރިއުޅުމުގެ ވައްޓަފާޅިއާއި ދިވެހިންގެ މުސްތަޤްބަލު ކަށަވަރު ކުރުމަށްޓަކައި މޫސުމަށް އަންނަ ބަދަލުތަކަށް ވިލުންވެރިކަން އިތުރު ކުރުމަށް ރާއްޖެއިން މަސައްކަތް ކުރާނެކަން ނައިބު ރައީސް ވަނީ ފާހަގަކުރައްވާފައެވެ.
މެންބަރު ޤައުމުތަކުން މާނަހުރި ކަންތައްތަކެއް ކުރުމަށް ބާރުއެޅުމުގެ ގޮތުން އ.ދ.ގެ އިންސާނީ ޙައްޤުތަކާބެހޭ ހައިކޮމިޝަނަރުގެ އޮފީހުން އިންތިޒާމުކޮށްގެން ކުރިއަށްގެންދާ މި ކެމްޕެއިންގައި، 100 އަށްވުރެ ގިނަ މެންބަރު ޤައުމުން ވަނީ އެ ޤައުމުތަކުން ވަޢުދުވާ ކަންކަން ހުށަހަޅާފައެވެ.
ނައިބު ރައީސް ސްވިޒަރލެންޑްގެ ޖެނީވާއަށް ވަޑައިގެންފައި ވަނީ އިންސާނީ ޙައްޤުތައް ރައްކާތެރި ކުރުމާބެހޭ ބައިނަލްއަޤްވާމީ މުއާހަދާ "ޔުނިވަރސަލް ޑިކްލަރޭޝަން އޮފް ހިއުމަން ރައިޓްސް" އަށް 75 އަހަރު ފުރުމުގެ މުނާސަބަތު ފާހަގަކުރުމަށްޓަކައި ބާއްވާ މަތީ ފަންތީގެ ހަރަކާތްތަކުގައި ބައިވެރިވެ ވަޑައިގަތުމަށެވެ. މި ހަރަކާތްތައް ކުރިއަށްގެންދިއުމަށް ހަމަޖެހިފައި ވަނީ މި ހިނގާ ޑިސެންބަރު މަހުގެ 11-12 ވަނަ ދުވަހުގެ ނިޔަލަށެވެ.
މީ ކީއްކުރަން ސަރުކާރުން ބޮޑެތި ޚަރަދުކޮށްގެން ކުރާ ކަމެކޭ މިކަން މިކުރަނީ ސަރުކާރުން ހީކުރަނީ ދުނިޔޭގެ ތަންތަނުގެ ބޮޑުންނާއި ބައްދަލު ވުމުން އެއިން ކެއްކޭނެ ޑޮންޑޮނެއް ހުންނާނެ ކަމަށްތޭ ނުހުންނާނެއޭ އިންސާނީ ހައްގު ތަކާއި ބެހޭ ބައްދަލުވުމަށް ރާއްޖޭން އެކަކު ވެސް ދާން ނުޖެހެއޭ އެކަމަށް ދާނެއޭ މަދުވެގެން 1 މިލިއަން ޑޮލަރު ޚަރަދަށް ރައްޔިތުން ފެލާލާ ނަގާފައިސާއިން މީގެ ބަދަލުގައި މާބޮޑަށް ރަނގަޅު ނޫންތޭ މާލޭގައި ސަލާމް ޖަހަން ތިބޭ މީހުން ނަގައިގެން ގޮސް ސިފައިންގޭގެ ސިވިލް ވަޒީފާ އެއް އެމެންނަށް ދީފައި ސިފައިންގެ ބެލުމުގެ ދަށުން އެމެން ނަށް ކޮންމެވެސް މަސައްކަތެއް ދަސްކޮށްދީ އެމެން ނަކީ އުފެއްދުން ތެރި މީހުންނަށް ހެދިއްޔާ މިސަރުކާރުން ކުރާނެ ކަމަކީ ސަރުކާރުގެ ބަޖެޓް ހުލި ކޮށްލާނީ ރައީސް އާއި އޭނާގެ އަނބިމީހާ އާއި އަދި ނައިބާއި އޭނާގެ އަނބިމީހާ އާއި ވަޒީރުން ނާއި އެމެންގެ އަނބިން ރާއްޖޭން ބޭރަށް ދަތުރު ކުރުމަށް އެކަން މިކުރަނީ…