އިސްލާމިކް މިނިސްޓްރީއާއި ޓްރޭޑްނެޓް މޯލްޑިވްސްއާ ދެމެދު އެމްއޯޔޫއެއްގައި ސޮއިކޮށްފި
ޚިދްމަތްތައް ޑިޖިޓަލައިޒްކޮށް އިތުރަށް ތަރައްޤީ ކުރުމަށް އެހީތެރިކަން ފޯރުކޮށްދިނުމަށް މިނިސްޓްރީ އޮފް އިސްލާމިކް އެފެއަރޒް އާއި ޓްރޭޑްނެޓް މޯލްޑިވްސް ކޯޕަރޭޝަން ލިމިޓެޑާއި ދެމެދު މެމޮރަމްޑަމް އޮފް އަންޑަސްޓޭންޑިންގ (އެމް.އޯ.ޔޫ)އެއްގައި މިއަދު ސޮއިކޮށްފިއެވެ.
މިކަމަށްޓަކައި އިސްލާމިކް މިނިސްޓްރީގައި މިއަދު ބޭއްވި ރަސްމިއްޔާތެއްގައި މި އެމް.އޯ.ޔޫގައި މިނިސްޓްރީގެ ފަރާތުން ސޮއިކުރެއްވީ އިސްލާމީ ކަންތައްތަކާ ބެހޭ މިނިސްޓަރު ޑރ. މުޙައްމަދު ޝަހީމް ޢަލީ ސަޢީދުއެވެ. އަދި ޓްރޭޑްނެޓް މޯލްޑިވްސް ކޯޕަރޭޝަން ލިމިޓެޑްގެ ފަރާތުން ސޮއި ކުރެއްވީ އެ ކޯޕަރޭޝަންގެ މެނޭޖިންގ ޑިރެކްޓަރ ސައީދާ އުމަރުއެވެ.
މި ރަސްމިއްޔާތުގައި ވާހަކަ ދައްކަވަމުން ވަޒީރު ޑރ. ޝަހީމް ވިދާޅުވީ، މިނިސްޓްރީގެ ޚިދްމަތްތައް ޑިޖިޓަލައިޒްކޮށް ތަރައްޤީ ކުރުމުން، މިނިސްޓްރީގެ މަސައްކަތްތައް އަވަސްވެ ރައްޔިތުންނަށް ފަސޭހަތަކެއް ވެގެންދާނެ ކަމަށް އުންމީދު ކުރައްވާ ކަމަށެވެ.
މި ހަފްލާގައި ވާހަކަ ދައްކަވަމުން ޓްރޭޑްނެޓް މޯލްޑިވްސް ކޯޕަރޭޝަން ލިމިޓެޑްގެ އެމްޑީ ސައީދާ ވިދާޅުވީ، މިނިސްޓްރީއާއެކު މި ސޮއި ކުރެވުނު އެމްއޯޔޫގެ މަޤްސަދަކީ ރައްޔިތުންނަށް ލިބޭ ޚިދްމަތްތައް ފަސޭހައިން ލިބޭނެ މަގުފަހިކޮށްދިނުން ކަމަށެވެ.
ސަރުކާރު ވުޒާރާތަކާއި ކުންފުނިތަކުން ފޯރުކޮށްދޭ ޚިދްމަތްތައް ޒަމާނީ ކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވަރެކެވެ. މިގޮތުން އެ މަނިކުފާނުގެ ޒައާމަތުގައި އިސްލާމިކް މިނިސްޓްރީން ޚިދްމަތްތައް ތަރައްޤީ ކުރުމަށް ސޮއި ކުރެވުނު މިއީ މިފަދަ ފުރަތަމަ އެމްއޯޔޫއެވެ.
ނަމަ ނަމަ އިޒްރޭލާ ގުޅުންހުރި އެއްވެސް ޓެކްނޮލޮޖީއެއްގެ ބޭނުން ނުހިފާތި . އީފާސް އަކީވެސް އެމީހުންގެ އަތުގަ ކޮންޓްރޮލް އޮތްއެއްޗެއް.