ސަރުކާރާ ދެކޮޅު ސައިޓުތައް ބްލޮކްކުރުމަކީ ކަންބޮޑުވުމެއް: ފައްޔާޒު

ސަރުކާރާ ދެކޮޅު ހަބަރު ގެނެސްދޭ ވެބްސައިޓުތައް ބްލޮކްކުރުމަކީ ވަރަށް ބޮޑަށް ކަންބޮޑުވާ ކަމެއް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރާ ދެކޮޅު ވެބްސައިޓުތައް ބްލޮކް ކުރުމަކީ ކަންބޮޑުވާ ކަމެއް ކަމަށާއި އަނިޔާވެރިކަން ނުފެތުރި މިހާރު އޮތް ހަމައެކަނި ސަބަބަކީ ރައްޔިތުންގެ މަޖިލީހުގައި ސަރުކާރަށް މެޖޯރިޓީ ނެތުމުން ކަމަށެވެ.
ފައްޔާޒު މިފަދައިން ވިދާޅުވެފައިވަނީ ސަރުކާރާ ދެކޮޅު ލިޔުންތައް ޝާއިއުކުރާ ދެ ވެބްސައިޓެއް ރޭ ބްލޮކްކުރުމާއި ގުޅިގެންނެވެ. ރޭ ބްލޮކް ކުރި ދެ ސައިޓަކީ ކުރުސީ.ކޮމް އަދި ދިޔަވަރު.ކޮމްއެވެ.
އެ ދެ ސައިޓުން ވެސް ވަނީ ސަރުކާރުގެ ބައެއް ނިންމުންތަކަށް ފާޑުކިޔައި ބައެއް ކަންކަމުގައި ކޮރަޕްޝަންގެ އަމަލުތައް ހުރި ކަމެއް ބުނެ، ނޫހެއް ގޮތަށް ލިޔުންތައް ޝާއިއުކޮށްފައެވެ.
މި ދެ ވެބްސައިޓުގެ މައްސަލައިގައި ސަރުކާރުގެ ބަހެއް މިހާތަނަށް ލިބިފައެއް ނުވެއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.