ހުޅުމާލެ ފޭސްދޭކަށް ދިރުން ގެންނާނެ ކަމަށް ވިދާޅުވެ، މޫކޭ ހުޅުމާލެ އުތުރު ދާއިރާއަށް

ރައްޔިތުންގެ މަޖިލީހުގެ އިންތިޚާބުގެ އެމްޑީޕީގެ ޕްރައިމަރީގައި ވާދަ ކުރައްވަން އާރްޑީސީގެ ކުރީގެ އެމްޑީ، މޫސާ ޢަލީ މަނިކު( މޫކޭ) ނިންމަވައިފިއެވެ.

Ads by MWSC

މިކަން ހާމަކުރެއްވީ، އޭނާ މިއަދު ފޭސްބުކްގައި ކުރެއްވި ޕޯސްޓެއްގައެވެ.

"ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ދިވެހި ރައްޔިތުންގެ ޑިމޮކްރެޓިކް ޕާޓީ (އެމް.ޑީ.ޕީ)ގެ ފަރާތުން ވާދަކުރާނެ ކެނޑިޑޭޓުން ކަނޑައެޅުމަށް އެ ޕާޓީގެ ފަރާތުން ބާއްވާ ޕްރައިމަރީގައި ހުޅުމާލެ އުތުރު ދާއިރާއަށް ވާދަކުރުމަށް ނިންމައިފީމެވެ." މޫކޭގެ ފޭސްބުކް ޕޯސްޓުގައިވެއެވެ.

އޭނާ ވިދާޅުވީ، މާތް ﷲ ގެ ވާގިފުޅާއި އެކު ހުޅުމާލެ "ފޭސް ދޭކަށް ދިރުން" ގެނެސް އަސާސީ ޙައްޤުތައް ހޯދައިދިނުމަށް ބިރެއް، އިމެއްނެތި ވަކާލާތު ކުރުމަށާއި، ކޮޅެއް މެދެއް ނުފެންނަ މާލޭ ދަފްތަރަކީ މާލޭގެ ރައްޔިތުންގެ ގޮތުގައި ބަލައިގަތުމާއި އެކު "ދަފްތަރަށް ޤާނޫނީ ފަރުވާއިން" ދާއިމީ ޙައްލެއް ގެނެސްދިނުމަށް އޭނާ ހުންނެވީ ތައްޔާރަށް ކަމަށެވެ.

"އަޅުގަނޑުގެ އެދުމަކީ މި ދާއިރާއަށް ނިސްބަތްވާ ހުރިހާ ރައްޔިތުންގެ ތާޢީދާއި މަދަދު މިކަމުގައި އަޅުގަނޑަށް ދެއްވުމެވެ."

މޫކޭ ވަނީ، މި ކެމްޕެއިންގައި ބައިވެރިވެ، އޭނާއަށް އެހީވާާން ބޭނުންވާ ފަރާތްތަކުން 9126666 އަށް މެސެޖުކޮށްލުން އެދޭ ކަމަށެވެ.

މަޖިލިސް އިންތިޚާބަށް ސިޔާސީ ޕާޓީތަކުން ތައްޔާރުވަމުން އަންނައިރު، ވާދަވެރި އެމްޑީޕީ އާއި ޕީޕީއެމް/ޕީއެންސީގެ ކޯލިޝަނުން ވަނީ ޕްރައިމަރީ އަށް ވެސް ހުޅުވައިލައިފައެވެ.