ބޯހިޔާވަހިކަމެއް ހައްލެއް ނުވޭ, ރަސްމާލެ މަޝްރޫއަކީ ކޮރަޕްޝަން: ޖަމީލު

މިހާރުގެ ސަރުކާރުން ފުށިޑިދިއްގަރުފަޅު ހިއްކައިގެން ކުރިއަށް ގެންދަން ނިންމާފައިވާ ރަސްމާލެ މަޝްރޫއަކީ ސީދާ ކޮރަޕްޝަން ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
އެކްސްގައި ޖަމީލް ކުރެއްވި ޕޯސްޓެއްގައި ވިދާޅުވީ ކޮންމެ ރައީސަކުވެސް ރައްޔިތުންގެ ބޯހިޔާވަހިކަމަށް މަސައްކަތްކޮށްދެއްވާފައިވާ ކަމަށާއި ރައީސް މައުމޫނު ފެއްޓެވި މަސައްކަތް އިތުރަށް ރައީސް ނަޝީދު ކުރިއަށް ގެންދެވި ކަމަށެވެ.
އަދި ރައީސް ޔާމީން ވެގެންދިޔައީ މުޅިން އެހެން ހަރުފަތަކަށް ބޯހިޔާވަހިކަން ގެންދެވި ރައީސަކަށް ކަމަށާއި ހުޅުމާލެ ފޭސް 2 ހިއްކައި ޓަވަރުތައް އަޅާ ރައްޔިތުންނަށް އެންމެ ފައިދާ ހުރި ގޮތަށް އެކަންކުރައްވާފައިވާ ކަމަށެވެ.
" ރާއްޖޭގެ އެންމެ އަގު ބޮޑު ބިމަކީ މާލެ އަދިހުޅުމާލެ ބިން. ރައީސް އިބޫވެސް މިވަނީ ބޯހިޔާވަހިކަމަށް ބުރަ މަސައްކަތް ކުރައްވާފަައި. ރައީސް މުއިއްޒު ވެސް މިވަނީ ބޯހިޔާވަހިކަމަށް އިސްކަމެއްދީފަ. މިހުރިހާ ރައީސުންނަށް ޙައްގު ޝުކުރު" ޖަމީލް ވިދާޅުވިއެވެ.
އެހެންނަމަވެސް ރައީސް މުއިއްޒު ހުޅުމާލެވެސް ހިމެނޭ ގޮތަށް މާލޭ ސަރަހައްދުން 70 ހެކްޓަރ ބިން ބަޔަކަށް ދިނުމަށްފަހު މާދުރުގައި އޮތް ފަޅެއް ހިއްކުމުން އެއީ ހިލޭ ވީކަމެއް ނޫން ކަމަށާއި އެއީ މާލޭގެ އަގު ބޮޑު ބިންދިނުމަށްފަހު ކުރަން ހެޔޮވާވަރުގެ ކަމެއްތޯ ޖަމީލް ވަނީ ސުވާލުކޮށްފައެވެ. ގިރާވަރާއި ގުޅީފަޅަކީ ބްރިޖުން ގުޅާލެވޭނެ، ތަރައްގީ ކަށަވަރު ކުރެވޭނެ ތަންތަން ކަމަށް ވެސް ޖަމީލް ވިދާޅުވިއެވެ.
" ވީއިރު ރައީސް މުއިއްޒުގެ ފުށިދިއްގަރު ފަޅުން މޮޅު ޖާދޫއެއް އުފަންވެ، ރައްޔިތުންގެ ބޯހިޔާވަހިކަން ހައްލެއް ނުވޭ. މިއީ ދެބަސްވެވެން ނެތް ބޮޑު ކޮރަޕްޝަނެއް" ޖަމީލް ވިދާާޅުވިއެވެ.
ޖަމީލް ވިދާޅުވީ އެއީ ހުޅުމާލެ ބިން ބަޔަކަށް ދިނުމަށް ރޭވި ރޭވުމެއް ކަމަށާއި އެކަމުގައި ގޮތް ނޭގޭ އެތައް ކަމެއް ހިމެނޭކަމެއް ކަމަށެވެ. "މިއީ ދެކޮޅުނުޖެހޭ މަޝްރޫއެއް. ގުޅާލެވޭނެ ގޮތެއް ނެތް ތަނެއް" ޖަމީލް ވިދާޅުވިއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.