އިދިކޮޅުން މިއަދު ބޭއްވި މުޒާހަރާއަށް ރައީސް ސޯލިހު ފާޑުވިދާޅުވެއްޖެ
އިދިކޮޅު ޕީޕީއެމް-ޕީއެންސީން މިއަދު މާލެއާއި ރާއްޖޭގެ ރަށްތަކުގައި ބޭއްވި މުޒާހަރާއަށް ރައީސް އިބްރާހިމް މުހައްމަދު ސޯލިހު ފާޑުވިދާޅުވެއްޖެއެވެ.
ސްޓޭޓް ބޭންކް އޮފް އިންޑިއާ (އެސްބީއައި)ގެ ރާއްޖޭގެ އޮފީހާ އިންވެގެން ހުންނަ އިމާރާތެއްގައި ރޯވެ ހިނގި އަލިފާނުގެ ހާދިސާ ހިނގި ސަރަހައްދަށް ވަޑައިގަތް މީޑީއާތަކާ ވާހަކަ ދައްކަވަމުން ރައީސް ސޯލިހު ވިދާޅުވީ އިސް ފަރާތްތަކެއް އިސްވެ ތިބެ މާލޭގައި އެޗްޕީއޭގެ އެންގުމާ ހިލާފަށް މުޒާހަރާ ކުރުމުން ހިތާމަ ކުރައްވާ ކަމަށެވެ.
"ވަރަށް ހިތާމަ ކުރަން މާލޭގައި މިއަދުވެސް ނުކުމެ އެއްވުން ބާއްވައިފި. ވަރަށް އިސް ބޭފުޅުން ނުކުމެ އެފަދަ ކަމެއް ހިންގީތީ އަޅުގަނޑު ހިތާމަ ކުރަން." ރައީސް ސޯލިހު ވިދާޅުވިއެވެ.
ރައީސް ވިދާޅުވީ އެއްވެ އުޅުމާއި ހިޔާލު ފާޅުކުރުމުގެ މިނިވަން ކަމަށް މި ސަރުކާރުން ހުރަސް ނާޅާނެ ކަމަށާއި ނަމަވެސް އެކަން ކުރަން ވާނީ ގަވައިދާ އެއްގޮތަށް ކަމަށެވެ.
އިދިކޮޅު ކޯލިޝަނުން މިއަދު ބޭއްވި ސައިކަލް ބުރުގައި އެޗްޕީއޭގެ މިންގަނޑުތަކާއި ހިލާފުވި މައްސަލަ ބަލާނެ ކަމަށް ފުލުހުން ވެސް ވަނީ ބުނެފައެވެ.
ފުލުހުން ބުނީ މިއަދު ބޭއްވުނު ސިޔާސީ ހަރަކާތުގައި އެޗްޕީއޭގެ މިންގަނޑުތަކާއި އެއްގޮތަށް ގައިދުރުކަން ނުބަހައްޓާ ހަރަކާތްތެރިވުމާއި މާސްކު ނާޅާ އުޅެފައިވާކަން ފާހަގަކުރެވިފައިވާ ކަމަށެވެ. މިކަމާއި ގުޅިގެން ބަލަންޖެހޭ ކަންކަން ބެލުމަށްފަހު އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށް ފުލުހުން ވަނީ ބުނެފައެވެ.
ސައިކަލް ބުރު ފެނިފަ ކީރިތިކުރައްވަން ފެއްޓެވިންދެއްތޯ