ރައީސް, ރާއްޖޭގެ ހުރިހާ ރައްޔިތުންނާ ބައްދަލު ކުރަން ފަށާ ދަތުރު އަންނަ ހަފްތާގައި
ވެރިކަމަށް ވަޑައިގަތުމުގެ ކުރިން ވައުދުވެ ވަޑައިގަތްގޮތަށް ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ހުރިހާ ރައްޔިތުންނާ ބައްދަލު ކުރައްވާނެ ކަމަށާއި, އެ ސިލްސިލާގެ ފުރަތަމަ ދަތުރު މިއަންނަ ހަފްތާގައި ކުރައްވާނެ ކަމަށް ރައީސް ޑރ. މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ, މާލޭގެ ސިޓީ ކައުންސިލްގެ ބައި އިލެކްޝަން ކާމިޔާބު ކުރި ކައުންސިލަރުންނާއި މާލޭގެ މޭޔަރު ހުވާ ކުރުމަށް މިރޭ ދަރުބާރު ގޭގައި ބޭއްވި ރަސްމިއްޔާތެއްގައި ދެއްކެވި ވާހަކަފުޅުގައެވެ.
ރިޔާސީ އިންތިޚާބުގެ ކެންޕެއިންގެ ތެރެއިން ރައީސް ވަނީ އިންތިޚާބުވެ ވަޑައިގެންފިނަމަ ހުރިހާ ރަށަކަށް ވަޑައިގަންނަވާނެ ކަމަށް ވައުދުވެ ވަޑައިގެންފައެވެ. އަދި ފުރަތަމަ ވަޑައިގަންނަވާނީ އެންމެ ބޮޑު އިންސައްތައެއް ދެއްވާ ރަށަށް ކަމަށް ވިދާޅުވިއެވެ.
ރައީސް މިރޭ ވިދާޅުވީ, އެމަނިކުފާނުގެ އަމާޒަކީ ރާއްޖޭގެ ހުރިހާ ރަށަކަށް ވަޑައިގަތުން ކަމަށެވެ.
"ހުރިހާ ރަށެއްގެ ރައްޔިތުންނާ ބައްދަލު ކުރަން އަޅުގަނޑު ނިންމިން, އިރާދަކުރެއްވިއްޔާ އެ ދަތުރުތައް މި އަންނަ ހަފްތާގައި އަޅުގަނޑު ފަށާނަން. ފަށާ ވަގުތު ލިބޭ ވަރަކުން ވަރަށް އަވަހަށް ހުރިހާ ރަށެއްގެ ރައްޔިތުންނާ ބައްދަލު ކުރާނަން" ރައީސް ވިދާޅުވީ, އަބަދު ވެސް ރާއްޖޭގެ ހުރިހާ ރައްޔިތުންނާ ބައްދަލު ކުރަން ބޭނުންވާ ކަމަށާއި ރަށްރަށަށް ދިއުން ވަގުތުވީ މިންވަރަކުން ތަކުރާރު ކުރައްވާނެ ކަމަށެވެ. އަދި މާލޭގެ ރައްޔިތުންނާ ވެސް ބައްދަލު ކުރައްވާނެ ކަމަށް ވިދާޅުވިއެވެ.
ރިޔާސީ އިންތިޚާބުގެ ދެވަނަ ބުރުގެ ނަތީޖާއިން ފެންނަ ގޮތުގައި އެންމެ ބޮޑު އިންސައްތައެއް ރައީސަށް ދިނީ ތ. ގުރައިދުއިންނެވެ. އެހެންކަމުން ރައީސްގެ ދަތުރުފުޅު ފައްޓަވާނީ އެރަށުން ކަމަށް ބެލެއެވެ.
ތ. ގުރައިދޫން ދެވަނަ ބުރުގައި ރައީސް ޑރ. މުޢިއްޒަށް 74.05 އިންސައްތަ ލިބިވަޑައިގަތެވެ. އެއީ 625 ވޯޓެވެ. އެރަށުން އިންތިޚާބުގައި ރައީސްއާ ވާދަކުރެއްވި އެމްޑީޕީގެ ކެނޑިޑޭޓް ރައީސް ޞާލިޙަށް ލިބިވަޑައިގަތީ 25.95 އިންސައްތައެވެ. އެއީ 219 ވޯޓެވެ. އެރަށުގައި ބަހައްޓާފައިވާ ދެ ފޮއްޓަށް ވޯޓު ލުމަށް ރެޖިސްޓްރީކޮށްފައިވަނީ 931 މީހުންނެވެ. އޭގެ ތެރެއިން ވޯޓް ލާފައިވަނީ 851 މީހުންނެވެ.
Ads by STO
