މަޖިލިސް އިންތިޚާބު އޮންނަ ދުވަސް ސަރުކާރު ބަންދު ދުވަހަކަށް ހަދަން މަސައްކަތް ކުރަނީ
ރައްޔިތުންގެ މަޖިލީހުގެ އިންތިޚާބު އޮންނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް ރައީސުލްޖުމްހޫރިއްޔާއަށް ދަންނަވާފައިވާނެ ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.
ހަބީބް މިހެން ވިދާޅުވީ ރައްޔިތުންގެ މަޖިލީހުގެ އިންތިޚާބުގެ ގައުމީ ލަފާދޭ ކޮމިޓީގެ މިއަދުގެ ބައްދަލުވުމުގައި ވާހަކަދައްކަވަމުންނެވެ.
އެގޮތުން މިއަދު ގެ ބައްދަލުވުމުގައި މަޖިލިސް އިންތިޚާބު ބާއްވާ ދުވަހަކީ ރަސްމީ ދުވަހަކަށްވާތީ ވޯޓުލާން ނިކުންނަ މީހުންގެ އަދަދު މަދުވެދާނެ ކަމަށް ވިދާޅުވެ އިންތިޚާބުގެ ލަފާދޭ ކޮމިޓީގެ ބައެއް މެންބަރުން ވަނީ ކަންބޮޑުވުން ފާޅުކުރައްވާފައެވެ.
އެހެން ކަމުން އެ ކަންބޮޑުވުންތަކަށް އިޝާރާތްކޮށް ހަބީބް ވިދާޅުވީ އިންތިޚާބު އޮންނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް ރައީސުލްޖުމްހޫރިއްޔާއަށް ދަންނަވާފައި ވާނެ ކަމަށެވެ.
ވޯޓުލާ ދުވަހަކީ އަދި ބަންދު ދުވަހެއްގެ ގޮތުގައި ކަނޑައަޅާފައި ނުވާ ކަމަށާއި ނަމަވެސް ވޯޓުލުމަކީ އެންމެންނާވެސް ގުޅިފައިވާ ގައުމީ ކަމަކަށްވާތީ އެ ދުވަސް ބަންދުވާނެ ކަމުގެ ޔަގީންކަން ބޮޑު ކަމަށް ހަބީބް ވަނީ ވިދާޅުވެފައެވެ.
ކުރިއަށް އޮތް މަޖިލިސް އިންތިޚާބު ބާއްވަން ހަމަޖެހިފައިވަނީ އަންނަ މާޗު މަހުގެ 17 ވާ އާދީއްތަ ދުވަހުއެވެ. މީގެ އިތުރުން މި އިންތިޚާބުގައި ޖުމްލަ 284،372 މީހުންނަށް ވޯޓުލުމުގެ ހައްގު ލިބިގެންވާ ކަމަށް އީސީން ހާމަކުރެއެވެ.
