ސަރުކާރުން ރާއްޖޭގެ ހުރިހާ ގޭބިސީއަކަށް ފުރަތަމަ ފަހަރަށް ރޯދަ ހަދިޔާ ދެނީ
ކުރިއަށް އޮތް ރޯދަމަސް ވެގެންދާނީ ދިވެހި ދައުލަތުގެ ފަރާތުން ރާއްޖޭގެ ހުރިހާ ގޭބިސީތަކަށް ފުރަތަމަ ފަހަރަށް ރޯދަ ހަދިޔާދޭ ރޯދަ މަހަށް ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައްޔިތުންގެ މަޖިލިސް މިއަހަަރަށް ހުޅުވުމުގެ ޖަލްސާގައި ރިޔާސީ ބަޔާން އިއްވަވަމުން ރައީސް މުޢިއްޒު ވިދާޅުވީ ކުރިޔަށް އޮތް ރޯދަ މަހު ސަރުކާރުން ކޮންމެ ގޭބީސީއަކަށް ރޯދަ ހަދިޔާ ބަހަން ނިންމާފައިވާ ކަަމަށެވެ.
"ކުރިއަށް އޮތް ބަރަކާތްތެރި ރަމަޟާން މަސް އިރާދަކުރެއްވިއްޔާ ވާނީ، ދިވެހި ދައުލަތުގެ ފަރާތުން ދިވެހިރާއްޖޭގެ ހުރިހާ ގޭބިސީތަކަށް، ފުރަތަމަ ފަހަރަށް ރޯދަ ހަދިޔާދޭ ރަމަޟާންމަހަށް" ރައީސް ވިދާޅުވިއެވެ.
މީގެ އިތުރުން އިސްލާމްދީނުގެ މަތިވެރި އުސޫލުތައް ނަގަހައްޓައި ރިވެތި އަހުލާގާއި ސުލޫކު މުޖުތަމައުގައި އަށަގެންނެވުމަށް މުހިންމު މަސައްކަތްތަކެއް ފަށާފައިވާ ކަމަށް ރައީސް ވިދާޅުވިއެވެ.
އެގޮތުން އަހަރުގެ ތެރޭގައި އަންނަ އަޅުކަމުގެ އެންމެ ބަރަކާތްތެރި އެއް ފޯވަހިކަމުގައިވާ ރަމަޟާންމަހުގެ ފަހު ދިހައެއް، ސަރުކާރު ބަންދު ދުވަސްތަކެއްގެ ގޮތުގައި، އަދި ހެޔޮ ޢަމަލުތަކަށް ދައުލަތުން ބާރުއަޅާ ދުވަސްތަކެއްގެ ގޮތުގައި ދިވެހިރާއްޖޭގައި ފުރަތަމަ ފަހަރަށް ކަނޑައަޅާފައިވާ ކަމަށް ރައީސް ވިދާޅުވިއެވެ.
އަދި އަންނަ ފިޠުރު ޢީދާއި މިނޫން އިސްލާމީ މުނާސަބާތަކާ ޤައުމީ މުނާސަބާތައްވެސް ދީނީ އަދި ޤައުމީ ފުރިހަމަ ރޫޙާ އުފާފާގަތިކަމާ އެއްބައިވަންތަކަމާއެކު ސަރުކާރުން އިސްނަގައިގެން ފާހަގަކުރާނެ ކަމަށާއި ރައްޔިތުންގެ ދީނީ ހޭލުންތެރިކަން އިތުރުކުރުމާއި އިސްލާމީ ވަޙްދަތު ދެމެހެއްޓުމަށް ކުރެވޭ މަސައްކަތުގެ ތެރެއިން އިސްލާމީ ޓީވީ ޗެނަލެއް އުފެއްދުމަށް މަސައްކަތް ވެސް މިހާރު ކުރެވެމުންދާ ކަމަށް ރައީސް ވިދާޅުވިއެވެ.
